មន្ត្រីជំនាញពីអគ្គនាយកដ្ឋានពន្ធនាគារ បានបញ្ចប់ការស៊ើបអង្កេតមន្ត្រីពន្ធនាគារដែលពាក់ព័ន្ធជាមួយទណ្ឌិតជាចោរប្លន់ម្នាក់ ប្រព្រឹត្តបទល្មើសក្នុងពន្ធនាគារខេត្តព្រៃវែង រួចហើយ។ ទោះយ៉ាងណា ការស៊ើបអង្កេតនោះនៅមិនទាន់ចេញជាលទ្ធផលផ្លូវការនៅឡើយ។
លទ្ធផលស៊ើបអង្កេតអំពីភាពមិនប្រក្រតីនៅក្នុងពន្ធនាគារខេត្តព្រៃវែង ពាក់ព័ន្ធនឹងការអនុញ្ញាតឲ្យទណ្ឌិតជាចោរប្លន់មួយរូប ប្រើប្រាស់កុំព្យូទ័រ និងទូរស័ព្ទដៃ ធ្វើសកម្មភាពចេញមកក្រៅប្រព្រឹត្តបទល្មើសនោះ ប្រហែលជាអាចនឹងប្រកាសលទ្ធផលនៅថ្ងៃច័ន្ទ ទី២៤ ខែកក្កដា។
អនុប្រធានអគ្គនាយកដ្ឋានពន្ធនាគារ និងជាអ្នកនាំពាក្យ លោក នុត សាវនា មានប្រសាសន៍ថា ក្រុមជំនាញបានបញ្ចប់ការស៊ើបអង្កេតកាលពីថ្ងៃសុក្រ ទី២១ កក្កដា តែមិនទាន់ចេញលទ្ធផលផ្លូវការបាននៅឡើយ ដោយសារថ្ងៃសៅរ៍ និងថ្ងៃអាទិត្យ អត់មានមន្ត្រីធ្វើការ ហើយប្រធានអគ្គនាយកដ្ឋានពន្ធនាគារកំពុងជាប់រវល់នៅប្រទេសអូស្ត្រាលី ដូច្នេះនៅថ្ងៃច័ន្ទ ទី២៤ ខែកក្កដា ប្រហែលជានឹងបូកសរុបលទ្ធផលស៊ើបអង្កេត និងប្រកាសឲ្យដឹងតែម្ដង។
ទោះយ៉ាងណា លោក នុត សាវនា ឲ្យដឹងដែរថា ក្នុងការស៊ើបអង្កេតនោះ គឺក្រុមមន្ត្រីជំនាញបានហៅអ្នកពាក់ព័ន្ធរួមមាន មន្ត្រីពន្ធនាគារ និងជនជាប់ឃុំប្រហែលជា ៥ ទៅ ៦នាក់ ដើម្បីសាកសួរ ប៉ុន្តែនៅមិនទាន់ដឹងថាអ្នកណាពាក់ព័ន្ធករណីនេះក្នុងកម្រិតណានោះទេ៖ «»។
ការចុះស៊ើបអង្កេតនេះ បន្ទាប់ពីស្នងការនគរបាលខេត្តកណ្ដាល លោក អ៊ាវ ចំរើន បានបង្ហោះតាមហ្វេសប៊ុក (facebook) ផ្លូវការរបស់លោកកាលពីថ្ងៃទី១៨ ខែកក្កដា ទាក់ទងទៅនឹងអ្នកទោសមួយរូបឈ្មោះ យ៉ែម ប្រុស នៅក្នុងពន្ធនាគារខេត្តព្រៃវែង ដែលបានប្រើប្រាស់កុំព្យូទ័រយួរដៃ និងទូរស័ព្ទដៃទាក់ទងស្នេហាជាមួយស្ត្រីតាមរយៈគណនីហ្វេសប៊ុកចំនួន៥។ លោក អ៊ាវ ចំរើន សរសេរបន្តថា ទណ្ឌិត យ៉ែម ប្រុស បានបោកបញ្ឆោតលួងលោមស្ត្រីតាមហ្វេសប៊ុកឲ្យលង់ស្នេហ៍ រហូតបង្ហាញរូបភាពអាក្រាតទៅវិញទៅមក ហើយជនល្មើសរូបនោះបានថតរូបទុក និងបានគំរាមទារប្រាក់ចំនួន ៥ពាន់ដុល្លារ ជាថ្នូរមិនបង្ហោះរូបអាក្រាតជាសាធារណៈ។
ទណ្ឌិត យ៉ែម ប្រុស បានសារភាពថា រូបគេអាចលេងកុំព្យូទ័រ និងទូរស័ព្ទដៃបាននៅក្រៅបន្ទប់ឃុំឃាំង ដោយទទួលបានការអនុញ្ញាតពីលោក អ៊ុំ រ៉ាយឿង អនុប្រធានពន្ធនាគារខេត្តព្រៃវែង ដែលកន្លងទៅ អ្នកទោសរូបនេះធ្លាប់ទិញសម្ភារៈប្រើប្រាស់មួយចំនួនឲ្យគាត់។ អ្នកទោសរូបនេះបានជាប់ពន្ធនាគារកាលពីឆ្នាំ២០១០ នៅខេត្តកំពត បន្ទាប់មកត្រូវបានផ្ទេរមកឃុំខ្លួននៅពន្ធនាគារខេត្តព្រៃវែង វិញ ដោយអ្នកទោសរូបនេះជាប់ពន្ធនាគារសរុបចំនួន ១០ឆ្នាំ ពាក់ព័ន្ធនឹងបទល្មើសព្រហ្មទណ្ឌចំនួន ៨ករណី ពោលគឺប្លន់ ៧លើកនៅខេត្តកំពត និងប្លន់ ១លើកនៅខេត្តតាកែវ។
លោក នុត សាវនា ឲ្យដឹងដែរថា ទណ្ឌិតជាចោរប្លន់រូបនេះ ត្រូវបានផ្ទេរទៅពន្ធនាគារព្រៃសវិញហើយកាលពីថ្ងៃទី១៩ កក្កដា ដើម្បីងាយស្រួលស៊ើបអង្កេតលើករណីនេះ ព្រោះថាបើទុកឲ្យនៅកន្លែងដដែល ខ្លាចមន្ត្រីពន្ធនាគារខេត្តព្រៃវែង បញ្ចុះបញ្ចូលឲ្យផ្តល់ចម្លើយខុសពីការពិត។
រីឯប្រធានពន្ធនាគារខេត្តព្រៃវែង លោក ជួប សារីម បានថ្លែងថា លោកមិនអាចរៀបរាប់លម្អិតបានទេ ខណៈដែលមន្ត្រីអគ្គនាយកដ្ឋានកំពុងចុះស្រាវជ្រាវ។
ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ប្រសិនបើករណីនេះមានការជាប់ពាក់ព័ន្ធជាមួយមន្ត្រីណាម្នាក់ ដែលឃុបឃិតឲ្យទណ្ឌិតប្រើប្រាស់ឧបករណ៍ផ្សេងៗដើម្បីប្រព្រឹត្តបទល្មើសនោះ គឺនឹងអាចមានទោសដូចគ្នាដែរ៖ «»។
មាត្រា២ នៅក្នុងច្បាប់ស្ដីពីពន្ធនាគារឆ្នាំ២០១២ ចែងថា ច្បាប់នេះមានគោលដៅអប់រំ កែប្រែ និងស្ដារនីតិសម្បទា ដើម្បីធ្វើសមាហរណកម្មជនជាប់ឃុំទៅក្នុងសង្គមវិញ និងទប់ស្កាត់បទល្មើសសាជាថ្មី។
ទោះបីជាច្បាប់ចែងដូច្នេះក្តី ប៉ុន្តែការគ្រប់គ្រងពន្ធនាគារនៅប្រទេសកម្ពុជា តែងតែត្រូវបានគេរិះគន់ថា មានភាពរញ៉េរញ៉ៃ ដូចជាការប្រព្រឹត្តអំពើពុករលួយ ការប្រើប្រាស់គ្រឿងញៀន ការជក់បារី និងល្បែងស៊ីសង ជាពិសេសអតីតអ្នកទោសមួយចំនួនធ្លាប់លើកឡើងថា ពន្ធនាគារស្រុកខ្មែរមិនអាចកែប្រែអ្នកទោសពីអាក្រក់មកល្អបានទេ ជួនកាលអ្នកទោសខ្លះកែពីលួចទៅប្លន់ កែពីជក់គ្រឿងញៀនទៅជួញដូរគ្រឿងញៀន ជាដើម។
ទោះយ៉ាងណា អគ្គនាយកដ្ឋានពន្ធនាគារនៃក្រសួងមហាផ្ទៃ តែងតែច្រានចោលការចោទប្រកាន់ទាំងនេះ៕
