![]()
តំណាងសហគមន៍ ៣២គ្រួសារ មានទំនាស់ដីធ្លីរ៉ាំរ៉ៃនាខេត្តព្រះសីហនុ បានអះអាងថា ការចេញលិខិតជួយអន្តរាគមន៍ដែលលោក ហេង សំរិន ប្រធានរដ្ឋសភាបញ្ជូនមកឲ្យអភិបាលខេត្តព្រះសីហនុ បន្តជួយដោះស្រាយវិវាទដីធ្លីជូនពលរដ្ឋនៅឃុំអូរត្រេះ ស្រុកស្ទឹងហាវ មិនឃើញមន្ត្រីចុះដល់ទីតាំងដីទំនាស់ទេ។
មន្ត្រីសង្គមស៊ីវិលស្នើដល់រដ្ឋបាលខេត្តព្រះសីហនុ ពិសេសប្រមុខដឹកនាំរដ្ឋាភិបាលជួយចាត់មន្ត្រីឯករាជ្យចុះជួយដោះស្រាយវិវាទដីធ្លីរ៉ាំរ៉ៃនេះចប់ឲ្យបានឆាប់។
តំណាងពលរដ្ឋ ៣២គ្រួសារ លោកស្រី ឡុច ទូច ថ្លែងនៅថ្ងៃទី១៤ ខែមិថុនា ថា លិខិតអន្តរាគមន៍របស់លោក ហេង សំរិន ប្រធានរដ្ឋសភា ដែលតម្រូវឲ្យលោក យន្ត មីន អភិបាលខេត្តព្រះសីហនុ ជួយពិនិត្យសម្របសម្រួលដំណោះស្រាយទំនាស់ដីធ្លីជូនពលរដ្ឋទាំង ៣២គ្រួសារ មិនទាន់មានលទ្ធផលទេ។
លោកស្រីបន្តថា នៅគ្រាទំនាស់នៅមិនទាន់ដោះស្រាយចប់ផង ស្រាប់តែកាលពីដើមសប្ដាហ៍នេះ អនុប្រធានភូមិ៤ និងមេឃុំអូរត្រេះ បានចេញលិខិតជូនបុគ្គលមួយចំនួនឲ្យមកសង់ផ្ទះនៅលើដីកំពុងមានទំនាស់របស់ពលរដ្ឋទាំង ៣២គ្រួសារ នៅឃុំអូរត្រេះ ស្រុកស្ទឹងហាវ ថែមទៀត។
តំណាងពលរដ្ឋរូបនេះ ស្នើដល់អភិបាលខេត្តព្រះសីហនុ លោក យន្ត មីន ពិសេសលោកនាយករដ្ឋមន្ត្រី ហ៊ុន សែន ឲ្យជួយដោះស្រាយទំនាស់ដីធ្លីរ៉ាំរ៉ៃជូនពលរដ្ឋពួកគាត់ទាំង ៣២គ្រួសារ បញ្ចប់ជម្លោះនេះឲ្យបានឆាប់ផង៖ «ឯកឧត្ដម យន្ត មីន អភិបាលខេត្តព្រះសីហនុ គាត់សន្យាជាមួយខ្ញុំថា នឹងជួយពន្លឿនដោះស្រាយឲ្យស្របតាមលិខិតអន្តរាគមន៍របស់សម្ដេច ហេង សំរិន ប្រធានរដ្ឋសភាពាក់ព័ន្ធការជួយរកដំណោះស្រាយដីធ្លីជូនពលរដ្ឋ ៣២គ្រួសារ នៅសហគមន៍អូរខ្សាច់ ឃុំអូរត្រេះ ស្រុកស្ទឹងហាវនេះ។ គាត់ថា នឹងកោះអញ្ជើញអាជ្ញាធរភូមិ ឃុំ ស្រុក និងអាជ្ញាធរពាក់ព័ន្ធឡើងទៅមើលលើដីទំនាស់ជាក់ស្ដែង ដើម្បីឈានទៅរកដំណោះស្រាយដីទំនាស់របស់ពលរដ្ឋទាំង ៣២គ្រួសារហ្នឹង»។
លោកស្រី ឡុច ទូច រៀបរាប់ថា ពលរដ្ឋសហគមន៍អូរខ្សាច់ ចំនួន ៣២គ្រួសារ គឺមានវិវាទជាមួយឈ្មោះ ប៉ុន សារឿន អតីតចៅសង្កាត់រងសង្កាត់លេខ១ និងបច្ចុប្បន្នមានគេប្រាប់គាត់ថា មានតួនាទីជាអនុរដ្ឋលេខាធិការក្រសួងបរិស្ថាន។ លោកស្រី ឡុច ទូច អះអាងថា ក៏ធ្លាប់បានដាក់ពាក្យបណ្ដឹងរដ្ឋប្បវេណីទៅសាលាដំបូងខេត្តព្រះសីហនុ កាលពីឆ្នាំ២០១៤ ស្នើសុំមោឃៈ និងរំលាយប័ណ្ណកម្មសិទ្ធិដីធ្លីដែលត្រូវភាគីទំនាស់លោក ប៉ុន សារឿន ឃុបឃិតលួចធ្វើប្លង់រំលោភដីពលរដ្ឋមានផ្ទៃដីសរុបចំនួន ២៧ហិកតារ។
តំណាងរូបនេះចោទលោក ប៉ុន សារឿន ថា បានឃុបឃិតជាមួយមន្ត្រីខ្លះនៅមន្ទីររៀបចំដែនដីខេត្តព្រះសីហនុ និងមន្ត្រីពាក់ព័ន្ធដទៃទៀត លួចធ្វើប្លង់កម្មសិទ្ធិរំលោភយកដីពលរដ្ឋ មានទីតាំងនៅភូមិ៤ ឃុំអូរត្រេះ ស្រុកស្ទឹងហាវ ទាំងពលរដ្ឋបានមិនដឹងខ្លួន។ លោកស្រីបន្តថា ពលរដ្ឋសហគមន៍អូរខ្សាច់ទាំង ៣២គ្រួសារ ធ្លាប់បានប្រមូលផ្តុំគ្នាតវ៉ា និងទាមទាររកយុត្តិធម៌ពីស្ថាប័នពាក់ព័ន្ធ មានរដ្ឋបាលខេត្តព្រះសីហនុ សាលាដំបូងខេត្តនេះ រហូតដល់ស្ថាប័នកំពូលៗថ្នាក់ជាតិ ឲ្យជួយដោះស្រាយជម្លោះនេះ ប៉ុន្តែមិនទាន់មានលទ្ធផលវិជ្ជមានទេមកដល់ពេលនេះ។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ដែលធ្លាប់ចុះពិនិត្យផ្ទាល់ដល់ទីតាំងដីទំនាស់ជាក់ស្ដែង នៅសហគមន៍អូរខ្សាច់ ឃុំអូរត្រេះ ស្រុកស្ទឹងហាវ។ អ្នកស្រីបានទទូចដល់ថ្នាក់ដឹកនាំស្ថាប័នពាក់ព័ន្ធ ពិសេសរដ្ឋបាលខេត្តព្រះសីហនុ ឲ្យជួយសម្របសម្រួលដោះស្រាយទំនាស់ដីធ្លីនេះឲ្យបានឆាប់ និងមានលទ្ធផលវិជ្ជមានទាំងអស់គ្នា។
អ្នកឃ្លាំមើលសង្គមរូបនេះ ក៏ស្នើដល់មន្ត្រីជំនាញនៅតាមមន្ទីរ ឬស្ថាប័នរដ្ឋនីមួយៗ ពិសេសតុលាការ មុននឹងចេញប្លង់កម្មសិទ្ធិដីធ្លីជូនបុគ្គល ឬកាត់ក្តីទៅលើសំណុំរឿងដីធ្លី ត្រូវចុះស៊ើបអង្កេតដល់ទីតាំងកើតមានទំនាស់ជាក់ស្ដែងឲ្យបានត្រឹមត្រូវជាមុន៖ «សំណុំរឿងនេះ ទោះបីមានការយកចិត្តទុកដាក់ពីតុលាការ និងអាជ្ញាធរក្តី ក៏ប៉ុន្តែយើងពិនិត្យឃើញថា រាល់ការយកចិត្តទុកដាក់ទាំងអស់ហ្នឹង ទើបបានឈានទៅកោះអញ្ជើញខាងភាគីពលរដ្ឋរងគ្រោះ ៣២គ្រួសារ ដើម្បីទៅជជែកចរចាគ្នាតែប៉ុណ្ណោះ ប៉ុន្តែចំពោះការមានវិធានការទៅភាគីទំនាស់ម្ខាងទៀត គឺមិនទាន់មានទេ ជាពិសេសពេលបច្ចុប្បន្ននេះ ក៏ឃើញមានអ្នកឆ្លៀតឱកាសខ្លះ ប៉ុនប៉ងចូលទៅសង់ផ្ទះបន្ថែមនៅលើដីទំនាស់នោះថែមទៀត។ ទោះយ៉ាងណា យើងឃើញថា ខាងភាគីពលរដ្ឋរង់គ្រោះហាក់មានបង្ហាញឯកសារពាក់ព័ន្ធ និងមានសាក្សីជាច្រើន ដែលពួកគាត់បានបង្ហាញឲ្យអាជ្ញាធរឃើញថា ការកាន់កាប់ដី និងអាស្រ័យផលនៅលើដីនោះ ពិតជាបានកាន់កាប់ដីនោះជាក់ស្ដែង ប៉ុន្តែគ្រាន់តែគាត់មិនមានឯកសារគតិយុត្តិប៉ុណ្ណឹងឯង»។
អ្នកស្រី សុធារី សង្ស័យថា ទំនាស់ដីធ្លីដែលកើតមានជាង ២០សហគមន៍នាខេត្តព្រះសីហនុ អាចផ្ដើមពីការឃុបឃិតគ្នាពីសំណាក់អាជ្ញាធរចាប់ពីថ្នាក់មូលដ្ឋានខ្លះ រហូតដល់មន្ត្រីជំនាញពាក់ព័ន្ធ មានមន្ទីររៀបចំដែនដី និងមន្ត្រីខ្លះនៃរដ្ឋបាលខេត្តព្រះសីហនុ ជាដើម ជាថ្នូរទទួលបានផលប្រយោជន៍។
ចំណែកអ្នកសម្របសម្រួលសម្ព័ន្ធសហគមន៍កសិករកម្ពុជា ប្រចាំខេត្តព្រះសីហនុ លោក ញ៉ិល ភាព បានអះអាងថា ទំនាស់ដីធ្លីដែលកើតមានរ៉ាំរ៉ៃជាង ២០សហគមន៍នាមូលដ្ឋាននេះកន្លងមក គឺផ្ដើមចេញពីការឃុបឃិតចែកផលប្រយោជន៍គ្នារវាងមន្ត្រីនៅតាមស្ថាប័នពាក់ព័ន្ធខ្លះក្រោមឱវាទរដ្ឋបាលខេត្តព្រះសីហនុ។ ក្នុងនោះលោក ញ៉ិល ភាព ក៏បានរិះគន់ប្រព័ន្ធតុលាការថា មិនឯករាជ្យ ជាពិសេសរាល់ការកាត់ក្ដីទៅលើសំណុំរឿងដីធ្លី ភាគច្រើនគឺមិនបានចុះពិនិត្យផ្ទាល់ដល់ទីតាំងកើតមានទំនាស់ជាក់ស្ដែងនោះទេ៖ «គឺតុលាការមានភាពលំអៀង មិនបានចុះស្រាវជ្រាវទៅលើសំណុំរឿងដីធ្លីភាគច្រើនដល់ទីតាំងកើតមានទំនាស់នោះទេ។ តុលាការកាត់ក្តីតាមការនឹកឃើញ កាត់ក្តីតាមតែការបង្គាប់បញ្ជារបស់អ្នកមានអំណាច ដែលអ្នកមានអំណាចទាំងនោះប្រើទឹកលុយ រំលោភដីប្រជាពលរដ្ឋរួចហើយ ហើយបែរជាទៅឈ្នះក្ដី រីឯប្រជាពលរដ្ឋជាម្ចាស់ដីធ្លីពិតប្រាកដជាអ្នករស់នៅលើដីពិតប្រាកដ និងរស់អាស្រ័យផលនៅលើដីជាក់ស្ដែង ប៉ុន្តែបែរជាទៅរងគ្រោះបាត់បង់ដីធ្លី និងឈានដល់ជាប់គុកច្រវាក់ថែមទៀតទៅវិញ»។
លោក ហេង សំរិន ប្រធានរដ្ឋសភា បានដាក់លិខិតជូនលោក យន្ត មីន អភិបាលខេត្តព្រះសីហនុ ពិនិត្យដោះស្រាយទំនាស់ដីធ្លីជូនពលរដ្ឋ ៣២គ្រួសារ នៅឃុំអូរត្រេះ ស្រុកស្ទឹងហាវ។ កិច្ចអន្តរាគមន៍នេះ ធ្វើឡើងតាមសំណើរបស់តំណាងពលរដ្ឋចំនួន ៣២គ្រួសារ ឈ្មោះ ឡុច ទូច តាមរយៈតំណាងរាស្ត្របក្សប្រឆាំង លោក អេង ឆៃអ៊ាង និងជាប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា។
ក្នុងលិខិតដាក់ជូនរដ្ឋសភា លោកស្រី ឡុច ទូច បង្ហាញថា ពលរដ្ឋទាំង ៣២គ្រួសារបានកាន់កាប់ដីមានទំនាស់នេះ តាំងពីឆ្នាំ១៩៨៩ ដល់ឆ្នាំ១៩៩០ ដោយទទួលស្គាល់ពីអាជ្ញាធរមូលដ្ឋាន និងបានដាំដំណាំកសិកម្មនៅលើដីនោះថែមទៀត។ ប៉ុន្តែបច្ចុប្បន្ននេះ ត្រូវឈ្មោះ កើត រី គឹម ចាន់នី ប៉ុន សារឿន វង្ស សោភា និងឈ្មោះ សុខ ហួន បានឃុបឃិតគ្នាក្លែងស្នាមមេដៃឈ្មោះ ឡុញ តាយ ក្នុងកិច្ចសន្យាទិញលក់ដី ហើយបានលួចធ្វើប័ណ្ណកម្មសិទ្ធិ ដែលឈ្មោះ ឡុញ តាយ បានស្លាប់តាំងពីថ្ងៃទី២១ ខែមីនា ឆ្នាំ១៩៩៤។ ប៉ុន្តែបែរជាកាលបរិច្ឆេទចុះថ្ងៃខែក្នុងកិច្ចសន្យាទិញលក់ដីទំនាស់នេះ បានកើតឡើងក្រោយពេលឈ្មោះ ឡុញ តាយ បានចែកឋានទៅវិញ។
ករណីនេះ លោកស្រី ឡុច ទូច បានរៀបរាប់ថា ពលរដ្ឋពួកគាត់ក៏ធ្លាប់ដាក់ពាក្យប្ដឹងភាគីទំនាស់ទៅកាន់តុលាការអស់រយៈពេលយូរឆ្នាំមកហើយ ប៉ុន្តែមិនទាន់មានដំណោះស្រាយទេ។ លោកស្រីបន្តថា នៅគ្រាវិវាទដីធ្លីនេះមិនទាន់បានដំណោះស្រាយផង ស្រាប់តែកាលពីខែវិច្ឆិកា ឆ្នាំ២០១៦ បែរជាមានឈ្មោះ ហេង សុខា បាននាំមនុស្សមួយក្រុមទៅរុះរើផ្ទះសមាជិកសហគមន៍របស់គាត់ដែលសង់លើទីតាំងដី ២៧ហិកតារនេះថែមទៀត។
អភិបាលខេត្តព្រះសីហនុ លោក យន្ត មីន មានប្រសាសន៍ថា នឹងអញ្ជើញភាគីវិវាទពាក់ព័ន្ធខាងតំណាងប្រជាពលរដ្ឋ ៣២គ្រួសារ និងភាគីឈ្មោះ ប៉ុន សារឿន ជាដើម មកជួបពិភាក្សាគ្នាមុននឹងឈានទៅសម្របសម្រួលឲ្យស្របតាមសំណើរបស់ប្រធានរដ្ឋសភា បានដាក់ផ្ទាល់មករូបលោក។ ប៉ុន្តែនឹងទទួលបានលទ្ធផលបែបណានោះ គឺមិនទាន់ដឹងទេ ព្រោះការពិនិត្យដោះស្រាយកំពុងដំណើរការ។
ទាក់ទិនទំនាស់នេះ ឯកសារច្បាប់មួយចំនួនបានបង្ហាញថា ភាគីលោក ប៉ុន សារឿន បានឈ្នះក្ដីជាបន្តបន្ទាប់ទៅលើវិវាទដីធ្លីជាមួយពលរដ្ឋទាំង ៣២គ្រួសារ រស់នៅឃុំអូរត្រេះ ស្រុកស្ទឹងហាវ គឺចាប់ពីសាលាដំបូងខេត្តព្រះសីហនុ រហូតទៅ។ ទំនាស់នេះ លោក ប៉ុន សារឿន ក៏ធ្លាប់ដាក់ពាក្យប្ដឹងតំណាងពលរដ្ឋចំនួន ៤នាក់ ទៅកាន់សាលាដំបូងខេត្តព្រះសីហនុ ដោយចោទពីបទប្រើអំពើហិង្សាដោយទុច្ចរិតទៅលើអ្នកកាន់កាប់អចលនវត្ថុ ប្រព្រឹត្តនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ កាលពីឆ្នាំ២០០៨។ តំណាងពលរដ្ឋទាំង ៤នាក់ ដែលលោក ប៉ុន សារឿន ប្ដឹងមាន ឈ្មោះ ឡុច ទូច ឃឹម មុំ អេង វ៉ាន់ និង កៅ ហួរ។ ពួកគាត់ភាគច្រើនជាស្ត្រីមេម៉ាយ មានវ័យចំណាស់ និងមានជំងឺប្រចាំកាយទៀតផង។
ទោះជាយ៉ាងណា តំណាងពលរដ្ឋទាំង ៣២គ្រួសារ បានចោទភាគី លោក ប៉ុន សារឿន អតីតចៅសង្កាត់រងសង្កាត់លេខ១ និងបច្ចុប្បន្នមានតួនាទីជាអនុរដ្ឋលេខាធិការក្រសួងបរិស្ថាន ថាបានឃុបឃិតជាមួយមន្ត្រីមន្ទីរពាក់ព័ន្ធ និងអាជ្ញាធរមូលដ្ឋានមួយចំនួននាខេត្តព្រះសីហនុ លួចធ្វើប្លង់កម្មសិទ្ធិទៅលើដីលំនៅឋាន និងដីចម្ការដំណាំកសិកម្ម ទាំងពួកគាត់មិនបានដឹងខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
