សហជីពសេរីកម្មករនៃព្រះរាជាណាចក្រកម្ពុជា បានចាត់ទុកការមិនកំណត់ថ្ងៃឈប់សម្រាកដើម្បីឲ្យកម្មករចេញទៅបោះឆ្នោតនៅឯស្រុកកំណើតកាលអំពីអំឡុងថ្ងៃទី៣ ទី៤ និងទី៥ មិថុនា ថាជាការរឹតត្បិតសិទ្ធិសេរីភាពបញ្ចេញមតិរបស់កម្មករខ្លាំងបំផុតមិនធ្លាប់មាន ហើយពួកគេស្នើឲ្យមានការកំណត់ថ្ងៃឈប់សម្រាកសម្រាប់កម្មករនៅពេលបោះឆ្នោតជាតិឆ្នាំ២០១៨ ខាងមុខឡើងវិញ។
ទោះជាយ៉ាងណា សហជីពសេរីកម្មករបញ្ជាក់ថា មានកម្មករភាគច្រើនបំផុតបានព្យាយាមពុះពារសម្រុកត្រឡប់ទៅបោះឆ្នោតនៅឯស្រុកកំណើត បើទោះជាត្រូវថៅកែរោងចក្រកាត់ប្រាក់ឈ្នួលពួកគេក្ដី។
សហជីពសេរីកម្មករនៃព្រះរាជាណាចក្រកម្ពុជា ដែលបង្កើតឡើងដោយលោក ជា វិជ្ជា អតីតអ្នកតស៊ូមតិសម្រាប់កម្មករដ៏ល្បីល្បាញនៅកម្ពុជា យល់ឃើញថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់កាលពីថ្ងៃទី៤ មិថុនា គឺជាការបោះឆ្នោតលើកដំបូង ដែលមានការរឹតត្បិតសិទ្ធិសេរីភាពបញ្ចេញមតិរបស់កម្មករខ្លាំងបំផុត ដោយសារក្រសួងការងារ និងបណ្ដុះបណ្ដាលវិជ្ជាជីវៈ ពុំបានចេញសេចក្ដីណែនាំឲ្យតាមបណ្ដារោងចក្រ ផ្ដល់ថ្ងៃឈប់សម្រាកគ្រប់គ្រាន់ជូនកម្មករ ដើម្បីឲ្យពួកគេចេញទៅបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឯស្រុកកំណើត។
អនុប្រធានសហជីពសេរីកម្មករកម្ពុជា លោក ម៉ាន់ សេងហាក់ បានថ្លែងនៅថ្ងៃទី១១ មិថុនា ថា នៅពេលបោះឆ្នោតម្ដងៗ គឺគិតចាប់តាំងពីការបោះឆ្នោតក្នុងឆ្នាំ១៩៩៣ មក ក្រសួងការងារ តែងតែផ្ដល់ថ្ងៃសម្រាកសម្រាប់កម្មករអាចវិលត្រឡប់ទៅបោះឆ្នោតនៅស្រុកកំណើត ប៉ុន្តែទើបតែការបោះឆ្នោតឆ្នាំ២០១៧ នេះប៉ុណ្ណោះ ដែលមិនឃើញក្រសួងការងារ ចេញសេចក្ដីណែនាំឲ្យរោងចក្រ ផ្ដល់ថ្ងៃឈប់សម្រាកជូនកម្មករ។ លោកបន្ថែមថា សេចក្ដីអំពាវនាវរបស់គណៈកម្មាធិការជាតិរៀបចំការបោះឆ្នោត (គ.ជ.ប) និងក្រសួងការងារ ដើម្បីឲ្យរោងចក្រជួយសម្រួលឲ្យកម្មករបានទៅបោះឆ្នោតនោះ គឺពុំមានប្រសិទ្ធភាពឡើយ៖ «ឆ្នាំ២០១៧ នេះ ឃើញថាសេចក្ដីអំពាវនាវរបស់ គ.ជ.ប គ្មានប្រសិទ្ធភាពសម្រាប់រោងចក្រណាឡើយ ហើយក្រសួងការងារ ក៏អត់មានសេចក្ដីណែនាំដែរ បែរជាចេញសេចក្ដីអំពាវនាវ ឬសេចក្ដីប្រកាសព័ត៌មាន ដូចអ្វីដែល គ.ជ.ប បានអំពាវនាវ»។
ទោះជាយ៉ាងណា លោក ម៉ាន់ សេងហាក់ បន្ថែមថា មានរោងចក្រជិត ៨០ភាគរយ បានជួយសម្រួលដល់កម្មករបានទៅបោះឆ្នោត ប៉ុន្តែការជួយសម្រួលទាំងនោះ គឺភាគីរោងចក្របានសម្រេចដោះដូរថ្ងៃឈប់សម្រាកទៅបោះឆ្នោតរបស់កម្មករ ទៅជាថ្ងៃឈប់សម្រាកសម្រាប់ថ្ងៃអាទិត្យ ថ្ងៃឈប់ដំណាច់ឆ្នាំ ឬថ្ងៃបុណ្យទៅវិញ រីឯរោងចក្រខ្លះទៀតដែលមិនព្រមជួយសម្រួល គឺសម្រេចកាត់ប្រាក់ឈ្នួលរបស់កម្មករ ដូចមានករណីកើតឡើងនៅក្នុងរោងចក្រសៅលែន (Southland) ស្ថិតនៅផ្លូវវ៉េងស្រេង ជាដើម។
ថ្វីត្បិតតែការបោះឆ្នោតឃុំ-សង្កាត់ឆ្នាំ២០១៧ មិនមានការផ្ដល់ថ្ងៃសម្រាកក្ដី ប៉ុន្តែលោក ម៉ាន់ សេងហាក់ បញ្ជាក់ទៀតថា ក្នុងចំណោមកម្មករជាង ៧សែននាក់ដែលបម្រើការងារក្នុងវិស័យកាត់ដេរនៅទូទាំងប្រទេស គឺមានចំនួនប្រហែល ៨០ភាគរយបាននាំគ្នាសម្រុកទៅបោះឆ្នោតនៅឯស្រុកកំណើត ហើយចំនួននេះបើប្រៀបធៀបនឹងការបោះឆ្នោតកន្លងមក គឺមានការកើនឡើងខ្លាំងជាងគេ។
ឆ្លើយតបនឹងការលើកឡើងនេះ អាស៊ីសេរី មិនអាចទាក់ទងសុំការឆ្លើយបំភ្លឺពីមន្ត្រីនាំពាក្យក្រសួងការងារ លោក ហេង សួរ បានទេនៅថ្ងៃទី១១ មិថុនា ដោយសារទូរស័ព្ទចូល តែត្រូវលោកចុចបិទវិញ។
ចំណែកមន្ត្រីនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ថ្លែងថា លោកអរគុណចំពោះការបញ្ចេញមតិបែបនេះ ប៉ុន្តែលោកថា ការអនុវត្តរបស់ គ.ជ.ប គឺផ្អែកទៅតាមច្បាប់បោះឆ្នោតថ្មីទាំងស្រុង ដែលជាស្មារតីព្រមព្រៀងរវាងគណបក្សនយោបាយទាំងពីរ កែសម្រួល និងធ្វើវិសោធនកម្មប៉ុណ្ណោះ។ លោកបញ្ជាក់ថា ច្បាប់បោះឆ្នោតថ្មី គឺអនុញ្ញាតឲ្យកម្មករមានជម្រើសអាចចេញទៅចុះឈ្មោះបោះឆ្នោតនៅកន្លែងស្នាក់នៅដែលស្ថិតនៅក្បែរទីតាំងពួកគេធ្វើការងារ និងអាចវិលត្រឡប់ទៅចុះឈ្មោះនៅស្រុកកំណើត គឺខុសច្បាប់បោះឆ្នោតចាស់ ដែលតម្រូវឲ្យកម្មករទៅចុះឈ្មោះបោះឆ្នោតនៅស្រុកកំណើត។
ពាក់ព័ន្ធករណីចង់ស្នើឲ្យ គ.ជ.ប ជួយសម្រួលកម្មករបានឈប់សម្រាកទៅបោះឆ្នោតជាតិឆ្នាំ២០១៨ ខាងមុខនេះ ត្រូវបានលោក ហង្ស ពុទ្ធា ឆ្លើយតបថា លោកមិនទាន់ហ៊ានបកស្រាយយ៉ាងណាឡើយ ព្រោះនៅពេលនេះ គ.ជ.ប មិនទាន់រួចដៃចំពោះការបោះឆ្នោតក្រុមប្រឹក្សាឃុំ-សង្កាត់នៅឡើយ។ ម្យ៉ាងវិញទៀត លោកថាការសម្រេចណាមួយ គឺអាស្រ័យលើ គ.ជ.ប៖ «ស្អីៗទាំងអស់ គឺសម្រេចទៅលើ គ.ជ.ប។ ចាំមើលបន្ទាប់ពីមានអនុសាសន៍នេះហើយ គ.ជ.ប សម្រេចយ៉ាងណាទៀត ខ្ញុំនឹងជម្រាបជូននៅពេលក្រោយទៀត»។
ចំណែកប្រធានសហជីពសេរីកម្មករប្រចាំរោងចក្រ អ៊ឹម វ៉េ (MV) កាត់ដេរអន្តរជាតិ (សាខាទី៣) ស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ លោក ញឹក សាវុធ ថ្លែងថា រោងចក្ររបស់លោកដែលមានកម្មករសរុបជាង ២.៣០០នាក់ គឺមានចំនួនប្រហែល ៩០ភាគរយបានទៅបោះឆ្នោត ដោយកម្មករខ្លះសុខចិត្តឲ្យថៅកែកាត់ប្រាក់ខែ និងខ្លះទៀតទទួលបានច្បាប់ពីរោងចក្រ។ លោកបន្ថែមថា កម្មករសេសសល់មិនបានទៅបោះឆ្នោត ដោយសារពួកគេមានស្រុកកំណើតនៅតំបន់ដាច់ស្រយាល និងខ្លះទៀតខ្វះខាតថវិកាធ្វើដំណើរ ស្របពេលក្រសួងការងារ មិនបានចេញសេចក្ដីប្រកាសថ្ងៃឈប់សម្រាក និងការខ្ចីលុយពីរោងចក្រសម្រាប់កម្មករ ប្រសិនបើកម្មករនោះខ្វះខាតថវិកាដើម្បីទៅបោះឆ្នោត៖ «ខាងរោងចក្រហៅមកប្រាប់ថា ដោយសារទំនិញគាត់ប្រញាប់ចេញ គឺអនុញ្ញាតឲ្យច្បាប់បានមួយថ្ងៃប៉ុណ្ណោះ»។
សហជីពសេរីកម្មករនៃព្រះរាជាណាចក្រកម្ពុជា ស្នើឲ្យក្រសួងការងារ ផ្ដល់ថ្ងៃឈប់សម្រាកជូនកម្មករយ៉ាងហោចណាស់បានចំនួន ៣ថ្ងៃ គឺដើម្បីឲ្យពួកគាត់អាចមានពេលវេលាគ្រប់គ្រាន់នាំគ្នាទៅបោះឆ្នោតជ្រើសរើសតំណាងរាស្ត្រឆ្នាំ២០១៨ ខាងមុខនេះ។ ម្យ៉ាងវិញទៀត ប្រសិនបើការបោះឆ្នោតធ្វើឡើងចំដើមខែ ពួកគេក៏ស្នើឲ្យក្រសួងការងារ ជួយសម្រួលជាមួយភាគីរោងចក្រ ដើម្បីអាចឲ្យកម្មករអាចខ្ចី ឬបើកប្រាក់ខែមុន ដើម្បីយកទៅប្រើប្រាស់ជាមធ្យោបាយសម្រាប់ធ្វើដំណើរទៅបោះឆ្នោតនៅស្រុកកំណើត៕
