ក្រុមអ្នកស្រឡាញ់ភេទដូចគ្នា តំណាងអង្គការមិនមែនរដ្ឋាភិបាល មន្ត្រីសិទ្ធិមនុស្សអង្គការសហប្រជាជាតិប្រចាំកម្ពុជា និងអ្នកធ្វើការពាក់ព័ន្ធនឹងជំងឺអេដស៍ជាង ១០០នាក់ សហការគ្នាធ្វើពិធីបើកជាផ្លូវការនៃសប្ដាហ៍មោទនភាពអ្នកស្រឡាញ់ភេទដូចគ្នានៅកម្ពុជា នៅរសៀលថ្ងៃទី១២ ខែឧសភា។
សប្ដាហ៍មោទនភាពនៃអ្នកស្រឡាញ់ភេទដូចគ្នា ដែលសមាជិកសហគមន៍អ្នកស្រឡាញ់ភេទដូចគ្នា និងអ្នកពាក់ព័ន្ធប្រារព្ធបើកពិធីនៅឆ្នាំនេះ ក្រោមប្រធានបទថា "គ្រួសារអ្នកស្រឡាញ់ភេទដូចគ្នា និងខ្ញុំគឺខ្ញុំ"។
នាយកប្រតិបត្តិអង្គការខាណា លោក ជួប សុខចំរើន ថ្លែងថា ពិធីនេះបង្ហាញពីសាមគ្គីភាពរវាងអ្នកស្រឡាញ់ភេទដូចគ្នា ដែលប្រឈមការរើសអើងមាក់ងាយនៅប្រទេសកម្ពុជា ហើយក៏បង្ហាញថា ជាពេលវេលា ដែលកម្ពុជាគួរមានច្បាប់ប្រឆាំងការរើសអើងនេះ៖ «ការគាំទ្រ និងការលើកទឹកចិត្ត គឺជំរុញពួកគាត់ ធ្វើឲ្យគាត់កាន់តែមានឆន្ទៈ និងចូលរួមនៅក្នុងសង្គមរបស់យើងកាន់តែល្អថែមទៀត។ យើងឃើញថា ពួកគាត់មានទេពកោសល្យច្រើនណាស់ ទាំងការសម្ដែង ទាំងការបង្ហាញអំពីភាពប៉ិនប្រសប់ ទាំងផ្នែកសិល្បៈ ទាំងផ្នែកចំណេះដឹងក៏មានច្រើន។ អ៊ីចឹង បើសិនជាយើងអាចចាប់ផ្ដើមពីឪពុកម្ដាយ បញ្ឈប់ការប្រមាទ ការមាក់ងាយ ការរើសអើង ការដេញកូនចេញពីគ្រួសារគ្រាន់តែភាពខុសពីអ្វី ដែលយើងថា មិនត្រូវនឹងធម្មជាតិ ហើយគាត់គ្រាន់បង្ហាញពីការពេញចិត្តពួកគាត់ យើងដេញពួកគាត់ គឺជាការបាត់បង់មួយធំធេង។ គាំទ្រដល់អ្នកស្រឡាញ់ភេទដូចគ្នា ដើម្បីឲ្យពួកគាត់បន្តចូលរួមនូវការអភិវឌ្ឍផ្សេងៗ»។
ទិវាអន្តរជាតិប្រឆាំងការរើសអើងអ្នកស្រឡាញ់ភេទដូចគ្នា និងអ្នកប្ដូរភេទ ដែលត្រូវបានប្រទេសចំនួន ១០៨ប្រទេស ប្រារព្ធធ្វើនៅក្នុងខែឧសភា ជារៀងរាល់ឆ្នាំ។ ប្រទេសកម្ពុជា បានប្រារព្ធពិធីនេះជាទ្រង់ទ្រាយតូចជាង ១០ឆ្នាំមកហើយ ដើម្បីទាមទារឲ្យមានការលើកកម្ពស់សិទ្ធិអ្នកស្រឡាញ់ភេទដូចគ្នា។
អ្នកស្រឡាញ់ភេទដូចគ្នាត្រូវបានគេរើសអើង ទាំងនៅក្នុងសង្គមគ្រួសារ និងនៅក្នុងសង្គមជាតិ។
ប្រធានបណ្ដាញអ្នកស្រឡាញ់ភេទដូចគ្នា "ចតុមុខ" និងជាស្ត្រីស្រឡាញ់ភេទដូចគ្នា កញ្ញា ឈុន មុន្នីវិច្ឆរ៉ា ថ្លែងថា ពួកនាងជារឿយៗ ជួបនឹងបញ្ហាប្រឈមការរារាំងពីឪពុកម្ដាយ ឬអាណាព្យាបាលមិនឲ្យស្រឡាញ់ភេទដូចគ្នាទេ៖ «ទីមួយគាត់យល់ថា ខ្លាចបាត់បង់អនាគត។ ទីពីរគាត់យល់ថា មានការបោកប្រាស់ ឬក៏ឆបោកគ្នាទៅវិញទៅមក ហើយទីបី គាត់ថា ខ្លាចអត់មានអ្វីតពូជពង្សវង្សត្រកូល។ អ៊ីចឹងអ្វីដែលសំខាន់ជាងគេ គឺផ្ដើមចេញពីឪពុកម្ដាយ ឬអាណាព្យាបាល ដែលនៅកៀកគាត់បំផុត ហើយមាត់ទៀតក៏ទាក់ទងនឹងអាជ្ញាធរ គាត់ក៏អត់ហ៊ានចេញច្បាប់ឲ្យរៀបអាពាហ៍ពិពាហ៍ដែរ ដោយសារច្បាប់យើងអត់ទាន់មានទេ»។
ចូលរួមក្នុងពិធីនេះដែរ តំណាងការិយាល័យឧត្ដមស្នងការអង្គការសហប្រជាជាតិប្រចាំកម្ពុជា អ្នកស្រី វ៉ាន់ហ៊ី លី (Wan-Hea Lee) មានប្រសាសន៍ថា សិទ្ធិរបស់អ្នកស្រឡាញ់ភេទដូចគ្នា គឺជាសិទ្ធិមនុស្សរបស់បុគ្គលគ្រប់រូប ដោយគ្មានការបែងថា អ្នកនោះជានរណា ឬស្រឡាញ់នរណាឡើយ។
អ្នកស្រីថ្លែងថា ស្របពេលដែលនៅកម្ពុជា មានសហគមន៍អ្នកស្រឡាញ់ភេទដូចគ្នាយ៉ាងសកម្ម ដែលប្រទេសដទៃមិនមានសហគមន៍នេះឡើយ។ អ្នកស្រឡាញ់ភេទដូចគ្នានៅប្រទេសខ្លះ មិនត្រឹមតែគេមាក់ងាយផាត់ចេញពីសង្គមប៉ុណ្ណោះទេ គឺត្រូវគេសម្លាប់ទៀត។ អ្នកស្រីផ្ដល់យោបល់ថា កម្ពុជាត្រូវឈានមួយជំហានទៀត ដើម្បីលើកស្ទួយសិទ្ធិរបស់អ្នកស្រឡាញ់ភេទដូចគ្នា ព្រោះពេលនេះ ការស្រឡាញ់មនុស្សភេទដូចគ្នាមិនខុសច្បាប់ទេ ហើយការរើសអើងក៏មិនខុសច្បាប់ដែរ។
អ្នកស្រីថា នេះជាភាពចន្លោះប្រហោងដែលគួររួមគ្នាបិទ ដោយការបង្កើតឲ្យមានច្បាប់ប្រឆាំងការរើសអើង៖ «ហើយច្បាប់នេះ ត្រូវអនុវត្តចំពោះមនុស្សគ្រប់រូបដែលត្រូវគេបំភ្លេចចោល អ្នកដែលនៅក្នុងសហគមន៍ស្រឡាញ់ភេទដូចគ្នា អ្នកដែលត្រូវបានរើសអើងដោយសង្គម សាលា មន្ទីរពេទ្យ និងវិស័យផ្សេងទៀត។ អង្គការសង្គមស៊ីវិលយល់ស្របមតិលោកអ្នក ដែលដាក់ប្រធានបទឆ្នាំនេះថា សិទ្ធិបង្កើតគ្រួសារ។ ខ្ញុំសុំអះអាងថា គ្រួសារ គឺជាកត្តាសំខាន់ចំពោះសង្គម ដូចដែលបញ្ជាក់នៅក្នុងគោលការណ៍សិទ្ធិមនុស្ស ហើយគោលការណ៍នេះ អនុវត្តចំពោះយើងទាំងអស់គ្នា។ ព្រោះយើងជាមនុស្ស យើងមិនចាំបាច់មានហេតុផលអ្វី ដើម្បីទាមទារសិទ្ធិមនុស្សនោះ។ ភាពចន្លោះប្រហោងដែលយើងបានកំណត់ សុទ្ធតែអនុវត្តបាន។ ខ្ញុំសង្ឃឹមថា ការចំណាយឋាមពលប៉ុន្មានឆ្នាំមកនេះ យើងនឹងអាចនាំសហគមន៍អ្នកស្រឡាញ់ភេទដូចគ្នាឆ្ពោះទៅមុខមួយជំហានទៀត ដើម្បីឲ្យប្រទេសកម្ពុជា ក្លាយជាអ្នកការពារសិទ្ធិអ្នកស្រឡាញ់ភេទដូចគ្នានាំមុខគេ»។
អ្នកស្រីរំពឹងថា ក្នុងសប្ដាហ៍មោទនភាពនៃអ្នកស្រឡាញ់ភេទដូចគ្នា ក្នុងមួយសប្ដាហ៍នេះ គឺអាចផ្ដល់ឱកាសឲ្យពួកគេបានជួបផ្លាស់ប្ដូរយោបល់គ្នា អំពីភាពប្រឈម ទាំងក្នុងវិស័យអប់រំ សុខាភិបាល ដើម្បីលើកស្ទួយសិទ្ធិពួកគេ និងការចងក្រងគ្នាជាគ្រួសារនៃអ្នកស្រឡាញ់ភេទដូចគ្នា ដែលស្នូលសំខាន់នៃសង្គម។
អនុប្រធានក្រុមការងារថ្នាក់ជាតិសម្រាប់អ្នកស្រឡាញ់ភេទដូចគ្នា វេជ្ជបណ្ឌិត ឡាំ ប៊ុនសេង ឲ្យដឹងថា អ្នកស្រឡាញ់ភេទដូចគ្នានៅក្នុងប្រទេសកម្ពុជា ពេលនេះ មានរាប់ម៉ឺននាក់ ហើយអ្នកទាំងនេះជាធនធានសង្គម ព្រោះមានចំណេះដឹង និងទេពកោសល្យរបស់គេរៀងៗខ្លួន។
ការបើកពិធីជាផ្លូវការនៃសប្ដាហ៍អ្នកស្រឡាញ់ភេទដូចគ្នា នៅថ្ងៃទី១២ ខែឧសភា នេះ ត្រូវបានចូលរួមដោយបណ្ដាញអ្នកស្រឡាញ់ភេទដូចគ្នា មានជាអាទិ បណ្ដាញចតុមុខ សហគមន៍ឥន្ទធនូកម្ពុជា អង្គការមិនមែនរដ្ឋាភិបាល និងស្ថាប័នរដ្ឋាភិបាលផ្នែកសុខភាព និងជំងឺអេដស៍ មន្ត្រីស្ថានទូត និងអង្គការសហប្រជាជាតិផង។ កម្មវិធីនេះ នឹងបន្តទៅតាមបណ្ដាខេត្តរហូតដល់ទី២២ ខែឧសភា៕
