មន្ត្រីសិទ្ធិមនុស្សអន្តរជាតិថា ការដឹកនាំរបស់លោក ហ៊ុន សែន ក្រោយការដួលរំលំ នៃរបបខ្មែរក្រហម រាប់សិបឆ្នាំទៅហើយក្តី ក៏នៅតែយកតាមលំនាំ តាមរបៀបដឹកនាំរបស់ពួកខ្មែរក្រហមដដែល។ ថ្ងៃទី១៧ ខែមេសានេះ ជាខួបលើកទី៤៣ ដែលរបប ប៉ុល ពត បណ្ដេញពលរដ្ឋចេញពីក្រុងទាញប្រទេសឲ្យធ្លាក់ចូលក្នុងរបបផ្ដាច់ការ វាលពិឃាដ។
នាយកប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) លើកឡើងថា អតីតកម្មាភិបាលខ្មែរក្រហម លោក ហ៊ុន សែន នៅតែអនុវត្តរបៀបដឹកនាំបែបខ្មែរក្រហម និងចូលចិត្តប្រើហិង្សាក្នុងការគ្រប់គ្រងប្រទេស។ ម្យ៉ាងទៀត មិនខុសពីខ្មែរក្រហម លោក ហ៊ុន សែន មិនត្រូវការអ្នកដែលហ៊ានរិះគន់ ប្រឆាំងនឹងការដឹកនាំរបស់លោកនោះឡើយ៖ «ក្រោយទាហានវៀតណាម ដកចេញពីកម្ពុជា លោក ហ៊ុន សែន ត្រូវបានលើកបន្តុបឲ្យដឹកនាំរបបមួយ ដែលប្រើប្រាស់អំពើទារុណកម្ម ការចាប់ចងមនុស្សដាក់គុកដាក់ច្រវ៉ាក់ តាមអំពើចិត្ត និងការប្រើអំពើហិង្សា និងការគំរាមកំហែងគ្រប់រូបភាព ទៅលើអ្នកណាក៏ដោយ ឲ្យតែហ៊ានរិះគន់គាត់។ លោក ហ៊ុន សែន មិនមែនជាមេដឹកនាំ ដែលស្រលាញ់ប្រជាធិបតេយ្យនោះទេ ព្រោះលោក ហ៊ុន សែន មិនគាំទ្រឲ្យមានសេរីភាពសារព័ត៌មាន និងសេរីភាពក្នុងការបញ្ចេញមតិនោះទេ។ ក្នុងការដឹកនាំរបស់គាត់ គាត់តែងតែធ្វើយ៉ាងណា ចង់បានរបៀបឯកបក្ស។ តាំងពីគាត់កាន់អំណាចជាង ៣០ ឆ្នាំមកនេះ គាត់ប្រើអំពើហិង្សារាប់មិនអស់ ដូចជាការធ្វើរដ្ឋប្រហារនៅឆ្នាំ១៩៩៧ ការបោកគ្រាប់បែកលើអ្នកតវ៉ា ដែលដឹកនាំដោយលោក សម រង្ស៊ី នៅមុខរដ្ឋសភា ក្នុងឆ្នាំ១៩៩៧ ការសម្លាប់អ្នកសារព័ត៌មាន ការសម្លាប់មន្ត្រីបរិស្ថាន និងចាប់មនុស្សដាក់គុកដាក់ច្រវាក់រាប់មិនអស់។ ចុងក្រោយនេះទៀត គាត់បានរម្លាយគណបក្សប្រឆាំង ចោលទាំងស្រុងតែម្ដង»។
លោក ប្រ៊ែដ អាដាម បញ្ជាក់ទៀតថា ចំណាត់ការ ក្នុងការចាប់ប្រធានគណបក្សសង្គ្រោះជាតិលោក កឹម សុខា ដាក់ពន្ធនាគារ រម្លាយគណបក្សប្រឆាំង បណ្ដេញអង្គការសង្គមស៊ីវិល និងបិទប្រព័ន្ធផ្សព្វផ្សាយឯករាជ្យនៅកម្ពុជា ជាដើមនេះ គឺលោក ហ៊ុន សែន បានរុញច្រាននាវាកម្ពុជា ឲ្យបើកបញ្ច្រាសទិស ត្រឡប់ថយក្រោយវិញ យ៉ាងហោចណាស់ ២៥ឆ្នាំទៅក្រោយ។ ម្យ៉ាងទៀត លោក ប្រ៊េដ អាដាម បន្តថា ការអួតអាងរបស់លោក ហ៊ុន សែន ដែលថាលោក ហ៊ុន សែន ជាអ្នកអភិវឌ្ឍប្រទេសកម្ពុជានោះ គឺមិនពិតដូចមាត់ថានោះទេ៖ «លោក ហ៊ុន សែន អះអាងថា គាត់ជាអ្នកអភិវឌ្ឍប្រទេសកម្ពុជា។ ប៉ុន្តែ តាមការពិត បើយើងពិនិត្យលើរបាយការណ៍សិក្សាផ្នែកសេដ្ឋកិច្ចកម្ពុជា បង្ហាញថា លោក ហ៊ុន សែន ជាមេដឹកនាំដែលពុករលួយខ្លាំង ព្រោះក្នុងរយៈពេលកាន់អំណាចរបស់គាត់ គាត់កើនទ្រព្យសម្បត្តិឯកជនរាប់ពាន់លានដុល្លារឯណោះ។ តើទ្រព្យទាំងនេះ បានមកពីណា បើគាត់មានប្រាក់ខែត្រឹមតែជានាយករដ្ឋមន្ត្រីនោះ? មិនតែប៉ុណ្ណោះ ក្រុមគ្រួសាររបស់គាត់ និង បក្សពួករបស់គាត់ សុទ្ធតែជាកំពូលអ្នកមានទ្រព្យ ដូចជាឧត្ដមសេនីយ៍ជាច្រើន រួមមានលោក គន់ គីម លោក ហ៊ីង ប៊ុនហៀង លោក នេត សាវឿន ជាដើម។ ហើយទ្រព្យទាំងអស់នេះ គឺបានមកពីអំពើពុករលួយ មិនមែនបានមកពីប្រាក់ខែនោះទេ»។
លោក ប្រ៊ែដ អាដាម បន្ថែមទៀតថា ដោយសារតែអំពើពុករលួយ យ៉ាងសម្បើមនេះឯងហើយ ទើបធ្វើឲ្យការអភិវឌ្ឍប្រទេស មានសភាពយឺតយ៉ាវខ្លាំង។ តាមការសិក្សារបស់ធនាគារអភិវឌ្ឍអាស៊ី (ADB) និងអង្គការមូលនិធិរូបិយវត្ថុអន្តរជាតិ (IMF) បង្ហាញថា សេដ្ឋកិច្ចកម្ពុជា គួរតែរីកលូតលាស់ជាងនេះឆ្ងាយណាស់ ប្រសិនបើមានការដឹកនាំប្រទេស ប្រសើរជាង ការដឹកនាំរបស់លោក ហ៊ុន សែន។ លោក ប្រ៊ែដ អាដាម បញ្ជាក់ទៀតថា ប្រាក់ដ៏សន្ធឹកសន្ធាប់ បានធ្លាក់ទៅតែក្នុងហោប៉ៅ និង កុងធនាគាររបស់លោក ហ៊ុន សែន និងក្រុមបក្សពួករបស់លោកប៉ុណ្ណោះ ស្របពេលដែលពលរដ្ឋខ្មែរទូទៅ កំពុងតែប្រឹងត្រដររស់នៅ ក្នុងស្ថានភាពលំបាក និងការខ្វះខាតផ្នែកជីវភាព។
ប៉ុន្តែ មន្ត្រីនាំពាក្យរបស់គណបក្សប្រជាជនកម្ពុជា លោក សុខ ឥសាន ចាត់ទុកការលើកឡើងរបស់លោក ប្រ៊ែដ អាដាម ថា ជាសម្តីអមិត្ត និងមិនយល់សភាពការណ៍ពិតនៅកម្ពុជា ទើបចេះតែធ្វើសេចក្ដីសន្និដ្ឋានច្បោលៗ។ ម្យ៉ាងទៀតលោក សុខ ឥសាន អះអាងថា ជនបរទេសមិនយល់ដឹង សុខទុក្ខប្រជាជនខ្មែរ ដូចអ្នកដែលបានរស់ឆ្លងកាត់សង្គ្រាមនោះទេ៖ «ខ្ញុំយល់ថាលោក ប្រ៊ែដ អាដាម មិនបានឆ្លងកាត់សង្គ្រាម និងទុក្ខវេទនាក្នុងរបបប្រល័យពូជសាសន៍ ប៉ុល ពត ដូចប្រជាជនកម្ពុជាទេ។ ដូច្នេះការវាយតម្លៃរបស់គាត់ មិនអាចចាត់ទុក ថា ជាការពិតជាក់ស្ដែងនោះទេ»។
លោក សុខ ឥសាន បន្តថា កុំតែបានគណបក្សប្រជាជន ដែលមានលោក ហ៊ុន សែន ចូលរួមរំដោះប្រទេសកម្ពុជា ពីរបបខ្មែរក្រហម ម្ល៉េះសម ប្រទេសកម្ពុជាគ្មានទេ ប្រទេសកម្ពុជា ដូចសព្វថ្ងៃនេះនោះ។
ទោះជាយ៉ាងនេះក្តីលោក ប្រ៊ែដ អាដាម បញ្ជាក់ថា លោក ហ៊ុន សែន និងគណបក្សប្រជាជនកម្ពុជា មិនមែនជាអ្នករំដោះប្រទេសកម្ពុជានោះទេ។ តាមពិត គឺប្រទេសវៀតណាម ឯណោះទៅវិញទេ ដែលជាអ្នកផ្តួលរំលំរបបខ្មែរក្រហម ដោយគ្រាន់តែយកចលនារបស់គណបក្សប្រជាជនកម្ពុជា ជាលេស ក្នុងការឈ្លានពានប្រទេសកម្ពុជា ហើយលើកបន្តុបលោក ហ៊ុន សែន ឲ្យកាន់ការជារដ្ឋមន្ត្រីការបរទេស ក្រោមបញ្ជាផ្ទាល់ពីទីក្រុងហាណូយ ប៉ុណ្ណោះ៕
