ពលរដ្ឋរងគ្រោះដីធ្លីនៅបុរីកីឡាប្រហែល២០នាក់ នៅថ្ងៃទី២៨ មេសា បានរៀបចំពិធីរាប់បាត្រព្រះសង្ឃចំនួន៤អង្គ នៅសហគមន៍បុរីកីឡា ដើម្បីទាមទារឱ្យដោះលែងមន្ត្រីការពារសិទ្ធិមនុស្សអាដហុកទាំង៤ និងមន្ត្រី គ.ជ.ប ១រូប ដោយពួកគេចាត់ទុកថា ការបន្តឃុំខ្លួនមន្ត្រីសិទ្ធិមនុស្ស និងមន្ត្រី គ.ជ.ប ទាំងនេះ គឺជារឿងអយុត្តិធម៌បំផុត។
ការរៀបចំកម្មវិធីតាមបែបសាសនានេះ គឺបន្ទាប់ពីមន្រ្តីសមាគមអាដហុក៤រូប មានលោក នី សុខា លោក យី សុខសាន្ត លោក ណៃ វ៉ង់ដា អ្នកស្រី លឹម មុន្នី និងមន្ត្រីអគ្គលេខាធិការរង គ.ជ.ប លោក នី ចរិយា ត្រូវបានតុលាការក្រុងភ្នំពេញ សម្រេចបន្តឃុំខ្លួនបណ្ដោះអាសន្នចំនួន៦ខែទៀត ក្រោយពីឃុំខ្លួនអស់រយៈពេល១ឆ្នាំកន្លងមក។ ក្រៅពីនេះ ក្រុមពលរដ្ឋបុរីកីឡា ក៏បានទាមទារឱ្យរកយុត្តិធម៌ជុំវិញករណីឃាតកម្មលើអ្នកវិភាគនយោបាយលោក កែម ឡី សកម្មជនការពារសិទ្ធិកម្មករ លោក ជា វិជ្ជា និងសកម្មជនការពារព្រៃឈើ លោក ឈុត វុទ្ធី ជាដើម៕
