លោកនាយករដ្ឋមន្ត្រី ហ៊ុន សែន បានបញ្ជាក់នៅក្នុងទំព័រហ្វេសប៊ុក (Facebook) របស់លោក ថា នៅព្រឹកថ្ងៃទី២៨ ខែមេសានេះ លោកបានដឹកនាំគណៈប្រតិភូជាន់ខ្ពស់ចាកចេញទៅកាន់ទីក្រុងម៉ានីល ប្រទេសហ្វីលីពីន ដើម្បីចូលរួមកិច្ចប្រជុំកំពូលអាស៊ានលើកទី៣០ ក្រោមប្រធានបទ«រួមគ្នាជាដៃគូ ដើម្បីធ្វើការផ្លាស់ប្ដូរ រួមចំណែកជាមួយពិភពលោក»។
នៅក្នុងកិច្ចប្រជុំកំពូលអាស៊ានដែលនឹងធ្វើឡើងនៅថ្ងៃទី២៩ មេសានេះ ក្រុមមេដឹកនាំអាស៊ាន នឹងពិភាក្សាដើម្បីផ្លាស់ប្ដូរទស្សនៈគ្នា លើបញ្ហាជាសារវន្តនានា ដែលអាស៊ាន និងពិភពលោកកំពុងប្រឈម ដើម្បីលើកតម្កើងសន្តិភាព សន្តិសុខ និងវិបុលភាព សម្រាប់តំបន់ និងពិភពលោក។
លោក ហ៊ុន សែន បន្តថា នៅក្នុងក្របខ័ណ្ឌកិច្ចប្រជុំកំពូលអាស៊ានលើកទី៣០នេះ លោកនឹងជួបថ្នាក់ដឹកនាំអាស៊ាន តំណាងអន្តរសភាអាស៊ាន និងតំណាងយុវជនអាស៊ានផងដែរ។
កាលពីថ្ងៃទី២៦ មេសា សមាជិកសភាអាស៊ាន (APHR) បានចេញសេចក្ដីថ្លែងការណ៍ឲ្យមេដឹកនាំអាស៊ានទាំងអស់ដោះស្រាយបញ្ហារំលោភសិទ្ធិមនុស្ស និងលទ្ធិប្រជាធិបតេយ្យកំពុងតែស្រុតចុះនៅប្រទេសមួយចំនួនក្នុងតំបន់។ ពួកគេបានលើកឡើងថា នៅក្នុងកិច្ចប្រជុំអាស៊ានលើកទី៣០នេះ ជាឱកាសមួយសម្រាប់មេដឹកនាំអាស៊ាន ដើម្បីបញ្ជាក់ជំហររបស់ខ្លួនថា តើត្រូវឈរនៅទីតាំងណា ក្នុងការដោះស្រាយវិបត្តិទាំងនេះ ព្រោះថា មេដឹកនាំអាស៊ានធ្លាប់បានអះអាងថា នឹងយកប្រជាពលរដ្ឋជាធំ៕