Clik here to view.
លោក ឈុន សិទ្ធី ត្រូវបានស្មៀននិងមន្ត្រីជាប់កិច្ចសន្យាឃុំស្ទឹងកាច់ម្នាក់ ប្ដឹងតុលាការចោទប្រកាន់ពីបទប្រមាថ និងរំលោភសិទ្ធឯកជន។ ភរិយាលោក ឈុន សិទ្ធី គឺអ្នកស្រីលន់ សៅបុត្រ ប្រតិកម្មនិងសេចក្ដីសម្រេចរបស់ចៅក្រមនៃសាលាដំបូងខេត្តប៉ៃលិននេះថាជារឿងអយុត្តិធម៌មិនអាចទទួលយកបាន។
អ្នកស្រីលន់ សៅបុត្រ ឲ្យដឹងនៅថ្ងៃទី២៣មីនាថា ស្វាមីរបស់អ្នកស្រីពុំមានកំហុសអ្វីដែលត្រូវជាប់ពន្ធនាគារនោះទេ ព្រោះកន្លងមកលោកឈុន សិទ្ធីដែលជាក្រុមប្រឹក្សាឃុំជាប់ឆ្នោតឃុំស្ទឹងកាច់ផងនោះ ដែលជាមនុស្សស្អាតស្អំ គឺបំពេញការងារដើម្បីប្រយោជន៍របស់ពលរដ្ឋជាធំ ហើយមិនគិតពីការលំបាករបស់ខ្លួនឡើយ។ភរិយាជនត្រូវចោទរូបនេះ អះអាងថាទៀតថា អ្នកស្រីមានការស្លុតចិត្តយ៉ាងខ្លាំងនៅពេលឃើញចៅក្រមនៃសាលាដំបូងខេត្តប៉ៃលិនប្រកាសសាលក្រម ផ្ដន្ទាទោសស្វាមីនោះ៖ «ដោយសារតែជនដែលជាអ្នកបង្ក ហើយប្ដីខ្ញុំជាអ្នកថត ដើម្បីបង្ហោះជួយដល់សង្គម ដើម្បីកុំមនុស្សដែលគាត់ប្រព្រឹត្តិអាក្រក់ ហើយទៅជាប្ដីខ្ញុំជាអ្នករងគ្រោះទៅវិញ។ ខ្ញុំនឹងបន្តប្ដឹងឧទ្ធរណ៍បន្ថែមទៀត ហើយឥឡូវនេះខ្ញុំកំពុងតែទាក់ទងឲ្យមេធាវីប្ដឹងឧទ្ធរណ៍បន្តទៀតហើយ»។
អាស៊ីសេរីពុំអាចទាក់អ្នកនាំពាក្យសាលាដំបូងខេត្តប៉ៃលិន ដើម្បីសុំអត្ថាធិប្បាយបន្ថែមជុំវិញបញ្ហានេះបានទេនៅថ្ងៃទី២៣មីនា។
ប៉ុន្តែមេធាវីការពារក្ដីឲ្យជនត្រូវចោទ លោក ផែង ហេង មានប្រសាសន៍ថា លោកពុំបានចូលស្ដាប់ក្នុងបន្ទប់សវនាការនោះទេ ប៉ុន្តែលោកថា លោកបានទទួលដំណឹងពីសាច់ញាតិកូនក្ដីរបស់លោកដោយដឹងថា លោក ឈុន សិទ្ធី ត្រូវបានចៅក្រមនៃសាលាដំបូងខេត្តប៉ៃលិន ផ្ដន្ទាទោសដាក់ពន្ធនាគារមួយឆ្នាំ និងពិន័យជាប្រាក់ទៅឲ្យដើមបណ្ដឹងចំនួន ២នាក់ គឺស្មៀន និងមន្ត្រីកិច្ចសន្យាឃុំស្ទឹងកាច់ម្នាក់ ៤លានរៀល សរុបទាំងអស់ចំនួន ៨លានរៀល៖ «ខ្ញុំបំពេញនីតិវិធីឲ្យកូនក្ដីតាមច្បាប់ ហើយបើកូនក្ដីគាត់មិនអាចទទួលយកចំណុចនឹងបាន ហើយឲ្យខ្ញុំជួយប្ដឹងឧទ្ធរណ៍ខ្ញុំនឹងប្ដឹងបន្តជូនគាត់។ ហើយករណីនេះខ្ញុំយល់ឃើញថា គួរណាតែឲ្យគាត់កែប្រែខ្លួន ព្រោះគាត់មិនមានចេតនាណាមួយប្រមាថលោកនាយករដ្ឋមន្ត្រី ក៏ជាមន្ត្រីឃុំដែលគាត់ធ្វើការនោះទេ»។
មូលហេតុនៃបណ្ដឹងនេះកើតឡើងដោយ លោក ឈុន សិទ្ធី បានថតវីដេអូឃ្លីបរបស់ស្មៀន និងមន្ត្រីកិច្ចសន្យាឃុំស្ទឹងកាច់ម្នាក់ ឈ្លោះប្រកែកគ្នា ហើយបានវីដេអូបង្ហោះក្នុងហ្វេសប៊ុក (Face book) ធ្វើឲ្យស្មៀន និងមន្ត្រីជាប់កិច្ចសន្យាឃុំស្ទឹងកាច់ ក៏បានប្ដឹងលោក ឈុន សិទ្ធី ទៅតុលាការ។ ប៉ុន្តែតុលាការមិនបានចាត់ការនោះទេ រហូតដល់ពេលលោកនាយករដ្ឋមន្ត្រី ហ៊ុន សែន បានប្រកាសឲ្យសមាជិកក្រុមប្រឹក្សាគណបក្សប្រឆាំងទាំងអស់ចុះចូលជាមួយគណបក្សប្រជាជន ទើបលោក ឈុន សិទ្ធី បានបង្ហោះវីឌីអូឆ្លើយឆ្លងបែបចំអក ទៅលោក ហ៊ុន សែន វិញថា កុំថាឡើយប្រាក់ខែត្រឹម ៧៥ម៉ឺនរៀលនោះ បើទោះបីជា ៧៥ម៉ឺនដុល្លារអាមេរិក ក៏លោកមិនលក់ឧត្ដមគតិរបស់ខ្លួនដែរ។ មួយថ្ងៃក្រោយពីមន្ត្រីបក្សប្រឆាំងរូបនេះបង្ហោះវីដេអូឃ្លីប គឺត្រូវបានសមត្ថកិច្ចឃាត់ខ្លួន ហើយក្រោយមកបានបញ្ជូនទៅឃុំខ្លួននៅពន្ធនាគារ កាលពីថ្ងៃទី២៤ ខែតុលា ឆ្នាំ២០១៧។
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបាត់ដំបងលោក យិន ម៉េលី មានប្រសាសន៍ថា សំណុំរឿងរបស់ក្រុមប្រឹក្សាឃុំជាប់ឆ្នោតរូបនេះ គ្រាន់តែជាការបញ្ចេញមតិរិះគន់ដើម្បីស្ថាបនា ដែលពុំគួរដល់ថ្នាក់មានទោសពៃរ៍អ្វីឡើយ។ លោកស្នើសុំឲ្យអាជ្ញាធរ ឬរដ្ឋាភិបាល និងមន្ត្រីពាក់ព័ន្ធទាំងអស់ បើកទូលាយឡើងវិញ អំពីសេរីភាពក្នុងការបញ្ចេញមតិ កុំឲ្យមានការរឹតត្បិត ហើយកុំឲ្យការបញ្ចេញមតិខ្លះក្លាយទៅជាការបរិហារកេរ្តិ៍ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
