អ្នកនាំពាក្យក្រសួងការពារជាតិ លោក ឈុំ សុជាតិ បានចេញមុខអះអាងជំនួសកងទ័ពទូទាំងប្រទេសថា កងយោធពលខេមរភូមិន្ទ ជាកងទ័ពទាំងអស់គ្នា គោរព ស្រលាញ់ប្ដូរផ្ដាច់នឹងលោក ហ៊ុន សែន។ លោកបន្តទៀតថា កងទ័ពត្រៀមខ្លួនជានិច្ចក្នុងការបម្រើ និងអនុវត្តបទបញ្ជា លោក ហ៊ុន សែន ក្នុងការកម្ទេចជនក្បត់ជាតិ។
លោក ឈុំ សុជាតិ សរសេរសារតាមរយៈបណ្ដាញសង្គមហ្វេសប៊ុក នៅថ្ងៃទី២៣ ខែមីនានេះ ក្រោយពេលលោក សម រង្ស៊ី ផ្ដល់បទសម្ភាសមកវិទ្យុអាស៊ីសេរីថា កងកម្លាំងរួមមាន ប៉ូលិស ទាហាន ចាប់ផ្ដើមគិតឡើងវិញ ដោយឈប់ស្ដាប់សម្ដីលោក ហ៊ុន សែន ដែលជាជនផ្ដាច់ការហើយ។ លោក សម រង្ស៊ី ថែមទាំងអំពាវនាវទៅកងកម្លាំងទាំងអស់រួមដៃជាមួយពល រដ្ឋស្លូតត្រង់កុំបាញ់សម្លាប់ពលរដ្ឋ នៅពេលពលរដ្ឋធ្វើការទាមទារអ្វីមួយ។ អតីតប្រធានគណបក្សសង្គ្រោះជាតិរូបនេះនិយាយថា ពេលនេះលោក ហ៊ុន សែន កំពុងភ័យខ្លាចពីប្រសិទ្ធភាព នៃការអំពាវនាវរបស់លោក៖ «ការអំពាវនាវកងកម្លាំងប្រដាប់អាវុធនេះធ្វើឲ្យលោក ហ៊ុន សែន ព្រួយបារម្ភណាស់ដេកអត់លក់មែនទែន។ សូមកងកម្លាំងកុំស្ដាប់បញ្ជាតាមជនផ្ដាច់ការទៀត ឲ្យឈរតាមប្រជារាស្ត្រស្លូតត្រង់ ដែលកំពុងទាមទារឲ្យមានការផ្លាស់ប្ដូរជាវិជ្ជមាននៅកម្ពុជា»។
លោក ឈុំ សុជាតិ ឆ្លៀតផ្ដាំទៅលោក សម រង្ស៊ី ថា កងទ័ពយើងទាំងអស់ ស្មោះត្រង់ និងប្ដូរផ្ដាច់ការពារ លោក ហ៊ុន សែន មិនឱ្យជនណាមួយប៉ះពាល់បានឡើយ។
ចំណែកអ្នកសិក្សាការអភិវឌ្ឍសង្គមលោកបណ្ឌិត មាស នី យល់ថា ការលើកឡើងរបស់អ្នកនយោបាយទាំងពីរភាគី ដែលកំពុងមានទំនាស់ដូចនេះ គឺជាសង្គ្រាមចិត្តសាស្ត្រ។ លោក បណ្ឌិតបន្តថា នៅពេលមានការលើកឡើងរបស់លោក សម រង្ស៊ី ថា កងទ័ពឈប់ស្ដាប់លោក ហ៊ុន សែន ដូច្នេះ ភាគីរបបលោក ហ៊ុន សែន គឺត្រូវបញ្ចេញអ្វីមួយ ដើម្បីឆ្លើយតបវិញ៖ «វាមិនមែនជារឿងអីមិនធ្វើឲ្យមានឥទ្ធិពលធំធេងជាងណឹងទេ បើខាងកងទ័ពនៅតែស្មោះស្ម័គ្រនឹងរដ្ឋាភិបាល ទោះបីឯកឧត្ដម សម រង្ស៊ី ស្រែកប៉ុណ្ណាទៀត ក៏គេនៅតែស្មោះស្ម័គ្រដែរ ហើយសម្រាប់កងទ័ពមិនមានភាពស្មោះត្រង់ជាមួយរដ្ឋាភិបាល ទោះរដ្ឋាភិបាលខំស្រែកខំការពារយ៉ាងម៉េច ក៏មិនអាចនឹងផ្លាស់ប្ដូរចរិតកងទ័ពបានដែរ»។
ការអំពាវនាវរបស់លោក សម រង្ស៊ី អតីតប្រធានគណបក្សសង្រ្គោះជាតិស្នើសុំទៅកងទ័ពឲ្យបង្វែកាណុងមកលោក ហ៊ុន សែន និងបង្គាប់ឱ្យកងទ័ពឈប់គាំទ្ររបបលោក ហ៊ុន សែន គឺជាផ្នែក មួយ នៃទាមទាររបស់ចលនាសង្គ្រោះជាតិ ដែលលោក សម រង្ស៊ី ជាស្ថាបនិក។ ចលនានេះ ក៏អំពាវនាវឲ្យពលរដ្ឋ ឈប់ផឹកទឹកសុទ្ធរបស់ក្រុមហ៊ុន វីតាល់ ឈប់ចាក់សាំង តេឡា ដែលលោកចោទប្រកាន់ថា ក្រុមហ៊ុនទាំងនោះ ជារបស់លោកកូនស្រីលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។