Clik here to view.
អ្នកវិភាគលោក ហង្ស វិទូ ហៅទង្វើរបស់មេដឹកនាំរបបក្រុងភ្នំពេញ ជាទង្វើបិទផ្លូវខ្លួនឯង ឯទង្វើរបស់ប្រធានចលនាសង្គ្រោះជាតិថា មិនសមរម្យ ព្រោះលោក សម រង្ស៊ី មានសមត្ថភាពកែនមនុស្សទៅប្រឆាំងរបបក្រុងភ្នំពេញ ប៉ុន្ដែ លោក ហ៊ុន សែន ក៏អាចកែនកម្លាំងប្រឈមមុខដាក់គ្នាបានដែរ។ លោក ហង្ស វិទូ បារម្ភថា នយោបាយសព្វថ្ងៃនេះ នឹងធ្វើឲ្យជាតិខ្មែរបែកបាក់ អ្នកគាំទ្រនៅថ្នាក់ក្រោមស្អប់ខ្មែរគ្នាឯង។ អ្នកវិភាគហៅនយោបាយរឹងត្អឹងបែបនេះថា នឹងធ្វើឲ្យជាតិខ្មែរបែកបាក់ ឬត្រូវបង្ហូរឈាមគ្នា៖ «ទោះបីជាលោក សម រង្ស៊ី គាត់កើនមនុស្សប៉ុន្មានលាននាក់ក៏ដោយ ក៏លោក ហ៊ុន សែន មិនចុះចេញពីតំណែងដូចការចង់បានរបស់លោក សម រង្ស៊ី ដែរ ព្រោះអី ថាប្រសិនបើយើងកើនមនុស្សអញ្ចឹងខាងលោក ហ៊ុន សែន ក៏គាត់កើនមនុស្សវិញ អ៊ីចឹងកើនទៅកើនមក វាធ្វើឲ្យសម្ព័ន្ធមិត្ត ឬក៏ភាពជិតស្និទ្ធរបស់លោក សម រង្ស៊ី និងលោ ហ៊ុន សែន ហ្នឹង វាកាត់ផ្តាច់ពីគ្នាវាធ្វើឲ្យពលរដ្ឋ ដែរលគាំទ្រទាំងសងខាងនឹងស្អប់គ្នា និងបង្ហូឈាមគ្នាក្នុងនាមខ្មែរតែមួយ វាមិនដែលអត់មានអីជាការនិយាយគ្នាបានទេ»។
កាលពីចុងសប្តាហ៍មុន លោក ហ៊ុន សែន អះអាងថា បាតុកម្មដុតទីងមោងរូបលោកនៅអាមេរិក និងអូស្រ្តាលី បានបិទផ្លូវចរចានយោបាយ។ លោកថា មូលហេតុនេះហើយ ទើបលោកនឹងមិនដោះលែងអ្នកទោសនយោបាយ និងអ្នកទោសមនសិការ។ ក្រោយពេលមេដឹកនាំរបបក្រុងភ្នំពេញ លោក ហ៊ុន សែន ប្រកាសបិទផ្លូវចរចាជាមួយគណបក្សប្រឆាំង ដែលលោក ហ៊ុន សែន ប្រសិទ្ធិនាមថា ជាក្រុមជាប់គុក លោក សម រង្ស៊ី បានប្រកាសប្រមូលកម្លាំងជនជាតិខ្មែរទាំងនៅក្នុង និងក្រៅប្រទេស ដើម្បីបង្ខំឲ្យលោក ហ៊ុន សែន ចុះចេញពីតំណែង។ លោក សម រង្ស៊ី ហៅ ការប្ដេជ្ញាតតាំង បង្ខំឲ្យលោក ហ៊ុន សែន ចុះចេញពីតំណែង ថាធ្វើឡើង ដើម្បីបឈ្ឈប់សកម្មភាពបំផ្លិចបំផ្លាញជាតិពីសំណាក់របបលោក ហ៊ុន សែន៖ «អ្នកណាងាប់អីងាប់ទៅ គាត់អត់ឈឺក្បាលទេ ជាតិខ្មែរយើងរលាយសាបសូន្យគាត់អត់ឈឺក្បាលទេ ឲ្យតែគាត់នៅតែបានក្រាញអំណាច ដូចច្នេះកុំសង្ឃឹម ចរចាជាមួយគាត់ ទាល់តែបង្ខំគាត់ទាំងពលរដ្ឋខ្មែរ ទាំងសហគមន៍អន្តរជាតិ បង្ខំគាត់ ឲ្យគាត់ចេះគិតបន្តិចទៅ ហើយបើគាត់ចង់រស់ ចង់សុខ គេអត់ធ្វើបាបគាត់ទេ គេទុកនឹងរក្សាសិទ្ធិ រក្សាត្រព្យសម្បតិ្តខ្លះទៅ រក្សាកិត្តិយសសេចក្តីថ្លៃថ្នូរឲ្យគាត់ ដូច្នេះគាត់មានច្រកចេញ តែបើគាត់នៅតែប្រព្រឹត្តអំពើព្រៃផ្សៃទាំងនេះទៀត អាហ្នឹងគាត់ជាអ្នកទទួលខុសលើជីវិត នឹងវាសនារបស់គាត់ទៅ"។
លោក សម រង្ស៊ី ចោទមេដឹកនាំរបបកក្រុងភ្នំពេញ ថាបានប្រើប្រាស់នយោបាយស្មោគគ្រោកលាបពណ៌លើរូបលោក ក៏ព្រោះតែដើម្បីចង់បន្ដក្រាញអំណាចឲ្យបាន១០ឆ្នាំទៀត។ លោក សម រង្ស៊ី លើកឡើងថា ល្បិចនយោបាយលាបព័ណ៍របស់ លោក ហ៊ុន សែន មានដូចជា ការចោទប្រកាន់ថា លោកនៅពីក្រោយបាតុកម្មប្រឆាំងរបបលោក ហ៊ុន សែន នៅប្រទេសអូស្ត្រាលី និងបាតុកម្ម របស់ពលរដ្ឋរងគ្រោះកន្លងមក កាលពីពេល លោក សម រង្ស៊ី នៅធ្វើជាប្រធានគណបក្សប្រឆាំង។
បន្ទាប់ពីបានអំពាវនាវកុំឲ្យកងកម្លាំងកុំស្ដាប់តាមបញ្ជាជនផ្ដាច់ការ និងប្រកាសប្រមូលកម្លាំងជនជាតិខ្មែរ ដើម្បីទម្លាក់មេដឹកនាំរបបក្រុងភ្នំពេញ លោក សម រង្ស៊ី អះអាងថា ពេលនេះ លោក ហ៊ុន សែន កំពុងបារម្ភ និងខ្វាយខ្វល់ខ្លាំងណាស់ ស្របពេលដែលសហគមន៍អន្តរជាតិចាប់ផ្ដើមដាក់ទណ្ឌកម្មជាបន្តបន្ទាប់លើរបបក្រុងភ្នំពេញ។
ប៉ុន្ដែអ្នកនាំពាក្យគណបក្សកាន់អំណាច លោក សុខ ឥសាន ប្រាប់ប្រព័ន្ធឃោសនារបបក្រុងភ្នំពេញ ថា លោក ហ៊ុន សែន មិនបានព្រួយបារម្ភពីការប្រកាសរបស់ លោក សម រង្ស៊ី ទេ តែជា លោក សម រង្ស៊ី ទៅវិញ ដែលកំពុងខ្វល់មិនបានចូលស្រុកខ្មែរ ព្រោះតែបណ្ដឹងដ៏ច្រើន និងការបិទច្រកចរចារបស់លោក ហ៊ុន សែន។
អ្នកវិភាគនយោបាយ លោក ហង្ស វិទូ មិនចង់ឃើញជម្លោះនយោបាយ រហូតធ្វើឲ្យជាតិបែកបាក់ទេ។ លោកមើលឃើញថា ដំណោះស្រាយជម្លោះនយោបាយនៅពេលនេះ មានតែការចូលតុចរចាគ្នា ប៉ុន្តែភាគីលោក ហ៊ុន សែន ជាភាគីដែលរឹងរូសជាងគេក្នុងការបើកឲ្យមានការចរចា។
មូលហេតុដែល លោក ហ៊ុន សែន មិនព្រមចរចា លោក ហង្ស វិទូ វិភាគថា ដោយសារ លោក ហ៊ុន សែន អាងមានអំណាចនៅក្នុងដៃពេញទី លោកចង់ធ្វើអ្វីក៏បាននៅកម្ពុជា និងម្យ៉ាងដោយសារសម្ពាធ ឬទណ្ឌកម្មអន្ដរជាតិ ទៅលើរបបក្រុងភ្នំពេញនៅស្ទើរពេក មិនទាន់ដល់កំរិតដែលអាចបង្ខំឲ្យ លោក ហ៊ុន សែន ព្រមដាក់ខ្លួនចូលតុចរចាបាន។
អ្នកវិភាគរូបនេះយល់ថា ដើម្បីឈានទៅរកផ្លូវចរចាបានលោក សម រង្ស៊ី ត្រូវបន្តទំនាក់ទំនងជិតស្និតបន្ថែមទៀត ជាមួយបណ្ដាប្រទេសប្រជាធិបតេយ្យឲ្យគាំទ្រលោក ក្នុងន័យគាំទ្រប្រជាធិបតេយ្យ។ ជាងនេះទៅទៀត លោក សម រង្ស៊ី ត្រូវបន្ទន់ឥរិយាបថឲ្យទន់ភ្លន់ជាងនេះ ព្រោះការធ្វើសង្គ្រាមជាមួយខ្លាកំណាច ត្រូវតែទន់ភ្លន់ និងស្វែងរកការសម្បទានឲ្យគ្នាទៅវិញទៅមក។
លោក ហង្ស វិទូ ជឿជាក់ថា នៅមុនការបោះឆ្នោតជាតិឆ្នាំ២០១៨ នឹងមានការចរចាមួយ ដើម្បីផ្សះផ្សាជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។