សាលាដំបូងរាជធានីភ្នំពេញ បានលើកយកសំណុំរឿង ដែលអគ្គនាយកដ្ឋានពន្ធដារ ប្ដឹងម្ចាស់កាសែត The Cambodia Daily ពីបទបរិហារកេរ្តិ៍ជាសាធារណៈមកជំនុំជម្រះ។ ប៉ុន្តែចៅក្រមជំនុំជម្រះ មិនបានសួរដេញបានច្រើនទេ ដោយហេតុថា ឯកសារសំណុំរឿង ភាគច្រើនជាភាសាអង់គ្លេស ហើយមិនត្រូវបានគេបកប្រែជា ភាសាខ្មែរ។ ហេតុដូច្នេះ ប្រធានក្រុមប្រឹក្សារជំនុំជម្រះបាន សម្រេចលើកយកសំណុំរឿងនេះ ទៅបន្តសវនាការ នៅថ្ងៃទី១២ ខែមេសា ឆ្នាំ២០១៨ វិញ។
អគ្គនាយកដ្ឋានពន្ធដារ កាលពីថ្ងៃទី៤ ខែកញ្ញា ឆ្នាំ២០១៧ បានប្តឹង ម្ចាស់កាសែត ឌឹខែមប៊ូឌា ដេលី (The Cambodia Daily) គឺអ្នកស្រី ឌែបប្រា គ្រឹហ្សឺស្ទៀល (Deborath Krisher Steele) ពីបទបរិហារកេរ្តិ៍ ដោយសារម្ចាស់កាសែតរូបនេះបាន ចោទប្រកាន់ ទៅលើមន្ត្រី អគ្គនាយកដ្ឋានពន្ធដារថា ជាអ្នកធ្វើឲ្យបែកធ្លាយ នូវព័ត៌មាន ស្តីការកំណត់ពន្ធគឺជាចេតនាចង់បិទកាសែតមួយនេះ។
អគ្គនាយកដ្ឋានពន្ធដារលោក គង់ វិបុល បានចាត់ទុកការចោទ ប្រកាន់របស់ លោកស្រី ឌែបប្រា គ្រឹហ្សឺស្ទៀល (Deborath Krisher Steele)មកលើអគ្គនាយកដ្ឋានពន្ធដារ ថាជាការប្រមាថយ៉ាងធ្ងន់ធ្ងរ និងធ្វើឲ្យប៉ះពាល់ដល់កិត្តិយសសេចក្តីថ្លៃថ្នូរ របស់ស្ថាប័នរដ្ឋ។
អ្នកស្រី ឌែបប្រា គ្រឹហ្សឺស្ទៀល (Deborath Krisher Steele) បានបដិសេធ មិនធ្វើអត្ថាធិប្បាយលើបញ្ហានេះនៅថ្ងៃព្រហស្បតិ៍ ទី២២មីនានេះ។ កាសែតភាសាអង់គ្លេស The Cambodia Daily បានបង្ខំចិត្តបិទប្រតិបត្តិការរបស់ខ្លួន កាលពីថ្ងៃទី០៤ ខែកញ្ញា ឆ្នាំ២០១៧នេះ បន្ទាប់ពីរដ្ឋាភិបាលកម្ពុជាបង្ខំឲ្យស្ថាប័នមួយនេះពន្ធ ជាង ៦លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។