ប្រជាពលរដ្ឋជាច្រើនគ្រួសារ រស់នៅជើងភ្នំធំ ស្រុកមង្គលបូរី ខេត្តបន្ទាយមានជ័យ ទទូចឲ្យរបបលោក ហ៊ុន សែន បញ្ឈប់ក្រុមហ៊ុនធ្វើអាជីវកម្មកិនថ្មនៅភ្នំធំជាបន្ទាន់។ អ្នកភូមិអះអាងថា ក្រុមហ៊ុនធ្វើអាជីវកម្មនេះ បានបង្កផលប៉ះពាល់យ៉ាងខ្លាំង ដល់ការរស់នៅរបស់ពួកគាត់ និងកំពុងធ្វើឲ្យហិនហោចភ្នំ ដែលធ្វើឲ្យអ្នកស្រុកបាត់បង់អត្ថប្រយោជន៍ក្នុងការរកប្រាក់ចំណូលពីអនុផលរបស់ព្រៃភ្នំទាំងស្រុងទៀតផង។
ប្រជាពលរដ្ឋនៅជាប់ចង្កេះភ្នំធំ ស្រុកមង្គលបូរីមួយចំនួន ព្រួយបារម្ភថា ប្រសិនបើរបបលោក ហ៊ុន សែន នៅតែបណ្ដែតបណ្ដោយឲ្យក្រុមហ៊ុនធ្វើអាជីវកម្មកិនថ្មនៅភ្នំធំ បន្តធ្វើសកម្មភាពទៀតនោះ គឺនឹងប៉ះពាល់សុខភាពរបស់ពលរដ្ឋកាន់តែខ្លាំង ហើយនឹងធ្វើឲ្យភ្នំហិនហោចក្នុងពេលឆាប់ៗ ព្រោះបច្ចុប្បន្នមានក្រុមហ៊ុនធំៗជាច្រើន កំពុងធ្វើអាជីវកម្មរបស់ខ្លួនយ៉ាងមមាញឹក។
ពលរដ្ឋម្នាក់ នៅរស់ចង្កេះភ្នំធំ ឃុំអូរប្រាសាទ ស្រុកមង្គលបូរី លោក មុំ លី រៀបរាប់ថា ក្រុមហ៊ុនអាជីវកម្មថ្មនៅភ្នំធំជាច្រើន បានធ្វើសកម្មភាពខ្លាំងប្រមាណ ១០ឆ្នាំហើយ ដោយពុំដឹងថាទទួលបានអាជ្ញាប័ណ្ណពីខាងណានោះទេ។ ពលរដ្ឋរូបនេះអះអាងទៀតថា ក្រុមហ៊ុនទាំងអស់នោះមិនបានផ្ដល់ផលប្រយោជន៍អ្វីដល់ពួកគាត់រស់នៅតំបន់នោះទេ ផ្ទុយទៅវិញអាជីវកម្មកិនថ្មទាំងនេះបានរំខានដល់ ការរស់របស់អ្នកស្រុក ដូចជា នៅពេលបំបែកថ្មភ្នំម្ដងៗ មានសំឡេងឡាន់ដូចរន្ទះបាញ់ ហើយដុំថ្មបានខ្ទាតត្រូវដំបូលផ្ទះរបស់អ្នកស្រុកធ្លុះធ្លាយជាប្រចាំទៀតផង។ បន្ថែមពីនេះទៀត លោកថា នៅពេលរោងចក្រដំណើរការកិនថ្មនោះទៀតសោត គឺកម្ទេចថ្មហុយងងឹតដូចខ្យល់ព្យុះ ហើយពេលមានខ្យល់បក់បោកទៅប៉ះចំផ្ទះអ្នកស្រុកម្ដងៗ គឺធ្វើឲ្យពិបាកដកដង្ហើម ហើយក៏ប្រឈមនឹងការកើតជំងឺផ្លូវដង្ហើមដែរ៖ «គេត្អូញគ្រប់តែគ្នាណាមួយពេលបាញ់ទៅផ្ទះនៅជុំវិញភ្នំនឹង វាបែកបាក់ ជាពិសេសឲ្យតែហ៊ានគេបាញ់បំបែកថ្មីនៅប៉ែកខាងកើត និងខាងជើងខ្លាំងគឺផ្ទះថ្មនឹងមិនសល់ទេខ្ទេចអស់ហើយ សាលារៀនក៏ខ្ទេចដែរ។ ខ្ញុំចង់ឲ្យតែគេឈប់ធ្វើទៅ ហើយទៅរកភ្នំកន្លែងឆ្ងាយធ្វើទៅកុំឲ្យធ្វើកន្លែងនេះគឺ ថាអស់ហើយភ្នំហើយក៏វាគ្រោះថ្នាក់ដែរ»។
ស្រដៀងគ្នានេះដែរ ពលរដ្ឋនៅចង្កេះភ្នំធំម្នាក់ទៀតថ្លែងថា ក្រុមហ៊ុននេះមិនត្រឹមតែបង្កផលប៉ះពាល់ដល់ការរស់នៅរបស់ពួកគាត់ប៉ុណ្ណោះ ថែមទាំងបានបំផ្លាញសម្បត្តិធនធានធម្មជាតិរបស់រដ្ឋ ហើយពលរដ្ឋរស់នៅតំបន់នោះ ធ្វើឲ្យបាត់បង់ប្រាក់ចំណូលពីការទាញយកអនុផលព្រៃឈើ ដូចជាការបោចវល្លិ៍ កាប់អុស និងការយកអាចម៍ប្រជៀវនៅក្នុងថ្មភ្នំធ្វើជីជាដើម។ ពលរដ្ឋរូបនេះអះអាងទៀតថា កន្លងមក ពួកគាត់រស់នៅចង្កេះភ្នំមួយនេះ តែងជួបជុំពិភាក្សាគ្នារកដំណោះស្រាយ ដើម្បីឲ្យក្រុមហ៊ុនកិនថ្មទាំងអស់នោះបញ្ឈប់ធ្វើអាជីវកម្មជាច្រើនលើកមកហើយ ប៉ុន្តែមិនអាចធ្វើទៅបានទេ ព្រោះពួកគាត់គ្មានអំណាច ចំណែកឯក្រុមហ៊ុនមានលុយមានអំណាចនៅកាងពីក្រោយខ្នង៖ «ខ្ញុំមិនសប្បាយចិត្តទេ ប៉ុន្តែមិនដឹងធ្វើយ៉ាងមិច បើក្រុមហ៊ុននឹងគេធ្វើទៅហើយបាទ ព្រោះអំណាចនៅលើគេ។ ខ្ញុំចង់ឲ្យព្រៃភ្នំនៅសល់ដើម្បីជានិមិត្តរូបសម្រាប់ក្មេងជំនាន់ក្រោយ ប៉ុន្តែយើងមិនហ៊ានប៉ះពាល់ទៅគេក៏សុខចិត្តនៅស្ងៀមអ៊ីចឹងទៅ»។
ក្រុមហ៊ុនធ្វើអាជីវកម្មកិនថ្មនៅភ្នំធំបច្ចុប្បន្ន មាន៣ក្រុមហ៊ុនធំៗ គឺក្រុមហ៊ុនគោលណៃ ក្រុមហ៊ុន លឹម សេង និងក្រុមហ៊ុនមួយទៀតម្ចាស់ឈ្មោះ សុខ កំពុងធ្វើសកម្មភាពយ៉ាងមមាញឹកក្នុងការវាយបំបែកថ្មយកទៅលក់ដើម្បីបានប្រាក់ចំណេញផ្ទាល់ខ្លួន។
អាស៊ីសេរីពុំអាចទាក់ទងប្រធានមន្ទីររ៉ែ និងថាមពលខេត្តបន្ទាយមានជ័យ គឺលោក ស៊ុត វឌ្ឍនា ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២២ មីនា ដោយលោកពុំទទួលទូរស័ព្ទ។
ប៉ុន្តែកន្លងមក លោក ស៊ុត វឌ្ឍនា អះអាងថា ក្រុមហ៊ុនធ្វើអាជីវកម្មកិនថ្ម នៅភ្នំធំទាំង៣កន្លែងនោះ មានច្បាប់អនុញ្ញាតពីក្រសួងរ៉ែ និងថាមពលត្រឹមត្រូវ។ លោកបន្ថែមទៀតថា ចំពោះការប៉ះពាល់ទៅលើពលរដ្ឋនៅតំបន់នោះដោយក្រុមហ៊ុនវាយបំបែកថ្មនេះ គឺលោកមិនហ៊ានសម្រេចឲ្យក្រុមហ៊ុនបញ្ឈប់ធ្វើអាជីវកម្មបានទេ ព្រោះប្រទេសជាតិត្រូវការថ្មប្រើប្រាស់ដើម្បីយកទៅអភិវឌ្ឍន៍ហេដ្ឋារចនាសម្ពន្ធឲ្យបានរីកចម្រើន ហើយក្រុមហ៊ុនក៏បានបងពន្ធជូនរដ្ឋដែរ។
ទោះជាយ៉ាងនេះក្ដី ព្រះសង្ឃដែលស្រលាញ់សម្បត្តិធនធានធម្មជាតិ ព្រះតេជព្រះគុណ ឡុញ សុខជា មានថេរដីកាថា រដ្ឋាភិបាលលោក ហ៊ុន សែន មិនគួរអនុញ្ញាតឲ្យក្រុមហ៊ុនកិនថ្មនៅធំនោះទេ ព្រោះភ្នំមួយនេះនៅកៀកទីប្រជុំជន ដែលមានប្រជាពលរដ្ឋរស់នៅច្រើន ហើយផលប៉ះពាល់ធ្ងន់ធ្ងរជាងចំណូលដែលរដ្ឋទទួលបាន។ ព្រះតេជព្រះគុណ កត់សំគាល់ទៀតថា កន្លងមកប្រជាពលរដ្ឋដែលរស់នៅតំបន់រុករករ៉ែ និងតំបន់ព្រៃភ្នំដែលរដ្ឋអំណាចផ្ដល់អាជ្ញាប័ណ្ណទៅឲ្យក្រុមហ៊ុនអាជីវកម្មនោះ គឺពួកគាត់តែរងគ្រោះដោយការបណ្ដេញចេញ និងប្រឈមនឹងគ្រោះថ្នាក់ដល់អាយុជីវិតទៀតផ
៖ «អាត្មាយល់ឃើញថា ការផ្ដល់ធនធានធម្មជាតិនេះ វាគួរណាតែពិនិត្យឲ្យបានច្បាស់លាស់ ហើយជាពិសេសបើសិនជាដូចជាភ្នំជាដើម បើសិនជានៅកៀកទីប្រជុំជននិងនៅក្នុងស្រុកភូមិទេ ហើយមានប្រយោជន៍ដល់ប្រជាពលរដ្ឋនៅជុំវិញនឹងគួរណាពិចារណាឲ្យបានវែងឆ្ងាយ ហើយបើសិនជាអាចគួរណាតែផ្អាកទៅ ព្រោះកន្លងមកមិនប្រសិទ្ធភាពក្នុងការបែងចែកផលប្រយោជន៍ទាំងនឹងដល់ប្រជាពលរដ្ឋទេ»។
តំបន់អាជីវកម្មថ្មនៅភ្នំធំ មានប្រជាពលរដ្ឋរស់នៅរាប់ពាន់គ្រួសារ ហើយនៅជាប់វិទ្យាល័យភ្នំធំ។ ម្យ៉ាងទៀតភ្នំនេះមានចម្ងាយប្រមាណពី ២៥០ទៅ៣០០ម៉ែត្រពីផ្លូវជាតិលេខ៥ និងពីផ្លូវរថភ្លើងពីក្រុងប៉ោយប៉ែតទៅភ្នំពេញ។
ការធ្វើអាជីវកម្មថ្មភ្នំមួយនេះ កាលពីថ្ងៃទី១៦ តុលា ឆ្នាំ២០១៦ ថ្មធ្លាក់សង្កត់ខូចអេស្កាវាទ័រចំនួន ២គ្រឿង និងស្លាប់មនុស្សចំនួន ៣នាក់ រួមមានលោក លឹម ប៊ុនឡុង អាយុ ២៦ឆ្នាំ លោក ហែម គឹមឡេង អាយុ ៥២ឆ្នាំ និងលោក ថន រដ្ឋា អាយុ ៣៦ឆ្នាំ ខណៈពួកគេកំពុងធ្វើការនៅភូមិភ្នំធំខាងត្បូង ឃុំប្រាសាទ ស្រុកមង្គលបូរី។ ក្រោយមក អាជ្ញាធរខេត្តបន្ទាយមានជ័យ បានផ្អាកក្រុមហ៊ុន លឹម សេង មិនឲ្យធ្វើអាជីវកម្មថ្មភ្នំបណ្ដោះអាសន្ន ប៉ុន្តែក្រុមហ៊ុនមួយនេះបានដំណើរការជាធម្មតាឡើងវិញជាធម្មតាហើយ។ ពលរដ្ឋរស់នៅចង្កេះភ្នំធំព្រួយបារម្ភថា ប្រសិនបើរដ្ឋាភិបាលមិនបញ្ឈប់ក្រុមហ៊ុនទាំងអស់នោះជាបន្ទាន់ទេ គឺធ្វើឲ្យហិនហោចភ្នំនិងបង្កគ្រោះថ្នាក់អាយុជីវិតពលរដ្ឋនៅពេលខាងមុខទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។