តំណាងអយ្យការអមសាលាដំបូងរាជធានីភ្នំពេញ នៅថ្ងៃទី២២ មីនា បានចេញដីកាកោះហៅលោក សម រង្ស៊ី មួយករណីទៀត ដើម្បីឲ្យចូលបំភ្លឺ នៅថ្ងៃទី៧ ខែឧសភា ក្នុងបទចោទ ជាប់ពាក់ព័ន្ធនឹងការចុះកិច្ចព្រមព្រៀងជាសម្ងាត់លួចកាត់ទឹកដីកម្ពុជាចំនួន៤ខែត្រ ទៅឲ្យជនជាតិដើមភាគតិចម៉ុងតាញ៉ា ជាមួយមេដឹកនាំជនជាតិដើមភាគតិចម៉ុងតាញ៉ា ឬដេហ្គា (Degar) លោក កុក សរ កាលពីថ្ងៃទី១៤ ខែមេសា ឆ្នាំ២០១៣។
កាលពីព្រឹកថ្ងៃទី២២ មីនា កងកម្លាំងសមត្ថកិច្ចខណ្ឌមានជ័យ យកដីកាទៅបិទនៅពីមុខទីស្នាក់ការបក្សសង្គ្រោះជាតិ ស្ថិតនៅសង្កាត់ចាក់អង្រែ ខណ្ឌមានជ័យ រាជធានីភ្នំពេញ។ ក្នុងដីកាកោះហៅ របស់ព្រះរាជអាជ្ញារង លោក សៀង សុខ បង្គាប់ឲ្យលោក សម រង្ស៊ី ចូលខ្លួនទៅកាន់អយ្យការអមសាលាដំបូងរាជធានីភ្នំពេញ នៅវេលាម៉ោង៩ ព្រឹក ថ្ងៃទី៧ ខែឧសភា។
មកដល់ពេលនេះ លោក សម រង្ស៊ី ប្រធានចលនាសង្គ្រោះជាតិបច្ចុប្បន្ន កំពុងរស់នៅប្រទេសបារាំង បានរងពាក្យបណ្ដឹងយ៉ាងហោចណាស់ ចំនួន១០ករណី ប្ដឹងដោយ លោក ហ៊ុន សែន លោក ហេង សំរិន មន្ត្រីជាន់ខ្ពស់ក្នុងបក្សកាន់អំណាច មេយោធា និងសមាជិកថ្មីរបស់បក្សកាន់អំណាច។
លោក សម រង្ស៊ី ធ្លាប់ប្រកាសថា បណ្ដឹងទាំងឡាយ គ្រាន់តែជាការបំផ្លើសខុសពីការពិត បែបមនុស្សវិកលចរិត ហើយលោកក៏មិនខ្វល់អំពីចំណាត់ការរបស់តុលាការ ដែលស្ថិតក្រោមគំនាបនៃរបបផ្ដាច់ការរបស់លោក ហ៊ុន សែនឡើយ។ លោក សម រង្ស៊ី បានចោទវិញថា ជនក្បត់ជាតិ គឺអ្នកកាន់អំណាចសព្វថ្ងៃ ព្រោះបានកាត់ទឹកដីប្រទេសកម្ពុជា មានទាំងកោះត្រល់ ឲ្យទៅប្រទេសវៀតណាមក្នុងទសវត្សរ៍ឆ្នាំ១៩៨០៕