ក្រសួងការងារ និងបណ្ដុះបណ្ដាលវិជ្ជាជីវៈ នឹងរៀបចំនីតិវិធីថ្មីមួយតម្រូវឱ្យថៅកែរោងចក្រ ត្រូវតម្កល់ប្រាក់ទុកនៅបេឡាជាតិរបបសន្តិសុខសង្គម សម្រាប់ដោះស្រាយករណីថៅកែរត់ចោលកម្មករ។ គម្រោងនេះធ្វើឡើង ក្រោយពីមួយរយៈពេលចុងក្រោយនេះ មានរោងចក្រប្រមាណជិត ១០រោងចក្រ ត្រូវបានបិទទ្វារ និងថៅកែរត់ចោលដោយមិនទាន់ទូទាត់ប្រាក់ឈ្នួល និងប្រាក់បំណាច់ជូនកម្មករបណ្ដាលឱ្យកម្មកររាប់ពាន់នាក់ផ្ទុះការតវ៉ារ៉ាំរ៉ៃទាមទារដំណោះស្រាយពីក្រសួងការងារ។
លោក អ៊ិត សំហេង រដ្ឋមន្ត្រីក្រសួងការងារ ថ្លែងក្នុងពិធីបូកសរុបលទ្ធិផលសន្និបាតការងារប្រចាំឆ្នាំ២០១៧ កាលពីថ្ងៃទី១២ ទី១៣ ខែមីនា ថា សម្រាប់ករណីរោងចក្របិទទ្វារដោយថៅកែរត់ចោល ក្រសួងទុកថា ជាហានិភ័យមួយ ហើយក្រសួងនឹងចាត់វិធានការតាមផ្លូវច្បាប់។
កាសែតក្នុងស្រុករាយការណ៍កាលពីថ្ងៃទី១៤ ខែមីនា ថា រដ្ឋមន្ត្រីក្រសួងការងារកំពុងបង្កើតអនុក្រឹត្យស្ដីពីរបបនីតិកម្មដើម្បីធានាទូទាត់អត្ថប្រយោជន៍កម្មករ ករណីដែលរោងចក្របិទទ្វារ។ ក្រសួងនឹងតម្រូវឱ្យក្រុមហ៊ុន ឬរោងចក្រតម្កល់ប្រាក់នៅបេឡាជាតិរបបសន្តិសុខសង្គម ដើម្បីទូទាត់ហានិភ័យណាមួយដែលកើតឡើង គឺបេឡាជាតិរបបសន្តិសុខសង្គម មានលទ្ធភាពទូទាត់ប្រាក់ទាំងនោះដល់កម្មករ។ បើទោះបីជាយ៉ាងនេះក្តី លោក អ៊ិត សំហេង មិនបានបញ្ជាក់ថា តម្រូវឱ្យថៅកែរោងចក្រត្រូវតម្កល់ប្រាក់ប៉ុន្មាននោះនៅឡើយទេ។
លោក ហ៊ុន សែន កាលពីចុងខែកុម្ភៈនេះ បានផ្ដល់ថវិកាបុរេប្រទានរបស់រដ្ឋចំនួន ៤លាន ៦សែនដុល្លារ ដើម្បីទូទាត់ប្រាក់បៀវត្សដល់កម្មករជាង ៤ពាន់នាក់ ដែលម្ចាស់រោងចក្រចំនួន៩ បានរត់ចោល។ រោងចក្រដែលថៅកែរត់ចោលនោះ មានរោងចក្រ ហ្គាវ័ន អាប់ភើរៀល (Gawon Apparel Co., Ltd.) នៅក្រុងតាខ្មៅ ខេត្តកណ្ដាល រោងចក្រ ហ្វើស ហ្គាវ័ន (First Gawon) នៅសង្កាត់ចាក់អង្រែក្រោម រោងចក្រ អេហ្វ.អ.អ៊ី. ហ្គាមេន (FRE Garment) រោងចក្រយូដា ហ្គាមេន អ៊ិនដាស់ស្ទ្រៀល (UDA Garment Industrial) ស្ថិតនៅភូមិត្រពាំងជ្រៃ សង្កាត់ចោមចៅ និងរោងចក្រ អ៊ីហ្វា ហ្គាមេន អ៊ិនដាសស្ទ្រៀល (EFA Garment Industrial) ស្ថិតនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
អាស៊ីសេរីកាលពីថ្ងៃទី១៤ ខែមីនា មិនអាចទាក់ទងអ្នកនាំពាក្យក្រសួងការងារដើម្បីបំភ្លឺជុំវិញរឿងប្រាក់បុរេប្រទាននេះបាននៅឡើយទេ។
ជាមួយគ្នានេះដែរ លោក អ៊ិត សំហេង ក៏បានអះអាងថា ថៅកែរោងចក្រមិនត្រូវអាងតែរដ្ឋាភិបាលទូទាត់ប្រាក់ឈ្នួលជូនកម្មករជំនួសខ្លួន ហើយនាំគ្នារត់គេចមិនបើកប្រាក់ឈ្នួលជូនកម្មករនោះទេ ពោលរាល់អ្នកដែលបានរត់ចោលរោងចក្រហើយនោះ រដ្ឋាភិបាលនឹងមានវិធានការយ៉ាងហ្មត់ចត់ដើម្បីឱ្យថៅកែទាំងនោះអនុវត្តកាតព្វកិច្ចរបស់ខ្លួនឱ្យចប់សព្វគ្រប់តាមផ្លូវច្បាប់។ លោកបន្តថា ក្រៅពីវិធានការទាំងនេះ រដ្ឋាភិបាលក៏បានចេញប្រកាសមួយតម្រូវឱ្យរោងចក្រទាំងអស់បើកប្រាក់អតីតភាពរបស់កម្មកររៀងរាល់ ៣តែម្ដង ឬ១ខែម្ដង ដើម្បីកុំឱ្យថៅកែរោងចក្រជំពាក់កម្មករច្រើនពេក។
ប្រធានសហព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ បានឱ្យអាស៊ីសេរីដឹងកាលពីថ្ងៃទី១៤ ខែមីនា ថា លោកសាទរពោះវិធានការថ្មីនេះ ប្រសិនបើក្រសួងអាចធ្វើបាន ព្រោះចំណុចនេះខាងសហជីពរបស់លោកបានស្នើជាច្រើនឆ្នាំមកហើយ។ ប៉ុន្តែលោកបញ្ជាក់ថា ដើម្បីឱ្យមានតម្លាភាព លោកស្នើឱ្យមានការចូលរួមពីក្រុមសហជីពឯករាជ្យក្នុងករណីដែលមានការទូទាត់ប្រាក់ឱ្យកម្មករក្នុងករណីដែលថៅកែរត់ចោលរោងចក្រ៖ «ប៉ុន្តែ ជាធម្មតាកាលណាអត់មានសហជីពកម្មករពិតប្រាកដចូលរួម តែងតែមានការដោះស្រាយនឹងវាអត់មានភាពត្រឹមត្រូវយុត្តិធម៌ទេ។ ឧទាហរណ៍ថា ការដោះស្រាយវិវាទកន្លងមក...ពេលខ្លះកម្មករអត់ទទួលបានផលប្រយោជន៍ទៅតាមច្បាប់ទេ ហើយរឿងខ្លះទៀតទទួលបានរឿងអយុត្តិធម៌ច្រើន»។
ទន្ទឹមនឹងគ្នានេះដែរ លទ្ធផលសន្និបាតការងារប្រចាំឆ្នាំ២០១៧នេះក៏បានអះអាងថា ក្រសួងបានដោះវិវាទការងាររួមចំនួន ១២៧ករណី ថយចុះ៨០% បើធៀបនឹងឆ្នាំ២០១៦ ក្នុងនោះករណីសះជាចំនួន៥៦ករណី និងមិនសះជា ៧០ករណី។
លោក អាត់ ធន់ មានប្រសាសន៍ថា ការដោះស្រាយវិវាទជាងជិត ១៣០ករណីនេះ មិនមែនជាវិវាទធំៗទេ ដោយសារតែក្រសួងបំបែកវិវាទធំៗមួយចំនួនឱ្យទៅជាវិវាទតូច ដូច្នេះ មើលទៅហាក់ដូចជាឃើញការដោះស្រាយវិវាទច្រើនអ៊ីចឹង៖ «អ៊ីចឹងការមិនមានវិវាទទៅដោះស្រាយមិនមែនមានន័យថា មានរឿងយុត្តិធម៌ លែងមានបញ្ហា ហើយសុខសប្បាយទេ។ មានន័យថា ការរំលោភហើយនឹងបញ្ហានៃរឿងអយុត្តិធម៌នៅតែច្រើន ហើយច្រើនជាងមុនទៀតជាពិសេស គឺគាត់អត់មានតំណាង។ល។»។
លទ្ធផលសន្និបាតការងារដដែលក៏បានឱ្យដឹងដែរថា ចំពោះបញ្ហាកូដកម្ម ក្រសួងបានដោះស្រាយចំនួន ៩៧រោងចក្រ ថយចុះ៤២% បើធៀបនឹងឆ្នាំ២០១៦ ក្នុងនោះករណីសះជា ៩០ករណី។
លោក អាត់ ធន់ មានប្រសាសន៍ថា ចំពោះបញ្ហាកូដកម្មថយចុះនេះមិនមែនមានន័យថា គ្មានរឿងអយុត្តិធម៌កើតឡើងចំពោះកម្មករទេ ព្រោះដោយសារច្បាប់សហជីពបានរឹតបន្តឹងសហជីពមិនឱ្យតំណាងកម្មករ ហេតុនេះកម្មករខ្លាច មិនងាយនឹងធ្វើកូដកម្មទេ។ ចំពោះការដោះស្រាយរបស់ក្រសួងវិញ លោកថា មិនដឹងមានយុត្តិធម៌ត្រឹមកម្រិតណាដល់កម្មករទេ៖ «កូដកម្មវាជាជម្រើសចុងក្រោយ ហើយកូដកម្មគេមិនងាយធ្វើទេ ប៉ុន្តែដើម្បីកុំឱ្យមានកូដកម្មកើតឡើង ត្រូវដោះស្រាយឱ្យត្រឹមត្រូវយុត្តិធម៌ ខុសថាខុស ត្រូវថាត្រូវ ក្រសួងនៅកណ្ដាល គ្មានក្រុមជើងកាង ឬអត់មានអ្នកកាងក្រុមហ៊ុនទេ.. ខ្ញុំគិតថា រឿងអ្វីដែលកម្មករចង់ធ្វើកូដកម្ម»។
សហជីពឯករាជ្យស្នើឱ្យក្រសួងដោះស្រាយបញ្ហារបស់កម្មករឱ្យបានឆាប់រហ័ស និងមានតម្លាភាព៕