Clik here to view.
កម្ពុជានឹងដឹកនាំធ្វើជាម្ចាស់ផ្ទះរៀបចំកិច្ចប្រជុំកំពូល នៃគណៈកម្មាធិការអន្តរជាតិទន្លេមេគង្គហៅកាត់ថា (MRC) ក្រោមមូលបទ «ទន្លេមួយ ស្មារតីមួយ» ដែលនឹងប្រព្រឹត្តិទៅពីថ្ងៃទី០២ ដល់ថ្ងៃទី៥ ខែមេសា ខាងមុខនេះ នៅខេត្តសៀមរាប។ កិច្ចប្រជុំកំពូលនេះ នឹងមានការចូលរួមពីសំណាក់ប្រមុខរដ្ឋ និងប្រមុខរដ្ឋាភិបាលនៃសមាជិកគណៈកម្មាធិការអន្តរជាតិទន្លេមេគង្គ ចំនួនបួនប្រទេសនៃតំបន់ទន្លេមេគង្គ រួមមាន កម្ពុជា ឡាវ ថៃ និងវៀតណាម។
លោកនាយករដ្ឋមន្ត្រី ហ៊ុន សែន ឲ្យដឹងកាលពីថ្ងៃទី១០ មីនា ក្នុងពិធីបុណ្យទន្លេលើកទី៤ ក្រោមប្រធានបទ «ទន្លេនៃសន្តិភាព មិត្តភាព និងនិរន្តភាពទេសចរណ៍» ថា នៅកិច្ចប្រជុំកំពូលនេះ ក្រៅពីមានការចូលរួមរបស់នាយករដ្ឋមន្ត្រីថៃ ឡាវ និងវៀតណាម ក៏នឹងមានដៃគូសន្ទនាចូលរួមពីសំណាក់ប្រទេសចិន និងមីយ៉ាន់ម៉ា (ឬភូមា) ផងដែរ។
កន្លងមកមានយន្តការជាច្រើនត្រូវបានបង្កើតឡើងទាក់ទងនឹងកិច្ចសហប្រតិបត្តិការ ការអភិវឌ្ឍន៍ និងការដោះស្រាយបញ្ហាប្រឈមនានានៅតាមបណ្ដាប្រទេសជាប់តំបន់ទន្លេមេគង្គ ដែលយន្តការទាំងនោះរួមមាន យន្តការកិច្ចសហប្រតិបត្តិមេគង្គ-ឡានឆាងជាមួយប្រទេសចិន ដែលកម្ពុជាទើបបានធ្វើម្ចាស់ផ្ទះកាលពីដើមខែមករាកន្លងទៅ យន្តការកិច្ចសហប្រតិបត្តិការមេគង្គ-ជប៉ុន យន្តការកិច្ចសហប្រតិបត្តិការមេគង្គ-គង្គាជាមួយប្រទេសឥណ្ឌា យន្តការកិច្ចសហប្រតិបត្តិការមេគង្គ-កូរ៉េខាងត្បូង ក្រោមកម្រិតថ្នាក់រដ្ឋមន្ត្រីការបរទេស និងយន្តការកិច្ចសហប្រតិបត្តិការសហរដ្ឋអាមេរិក-មេគង្គក្រោម។
យន្តការគណៈកម្មាធិការអន្តរជាតិទន្លេមេគង្គ MRC ត្រូវទទួលរងការរិះគន់ថា មានភាពអសកម្ម និងពុំមានសមត្ថភាពដោះស្រាយជម្លោះរបស់បណ្ដាប្រទេសទន្លេមេគង្គបានប្រកបដោយប្រសិទ្ធភាព ដោយសារតែការកើនឡើងយ៉ាងខ្លាំងនៃឥទ្ធិពលរបស់មហាអំណាចចិន នៅក្នុងតំបន់អាស៊ីអាគ្នេយ៍ដីគោក។
កន្លងមក ចិនបានសាងសង់ទំនប់វារីអគ្គិសនីខ្នាតធំចំនួន៧ ហើយគ្រោងនឹងសង់វារីអគ្គិសនីជាង ២០ ទៀត នៅលើផ្ទៃអាងទន្លេមេគង្គនេះ។ ប្រទេសចិន ក៏គ្រោងនឹងស្នើឲ្យមានការស្តាផ្ទៃអាងទន្លេមេគង្គកាត់តាមប្រទេសទាំង៦ នៃតំបន់ទន្លេមេគង្គនេះ ដើម្បីបើកផ្លូវឲ្យនាវាដឹកជញ្ជូនទំនិញ អាចធ្វើដំណើរបានកាត់តាមទន្លេនេះនាពេលអនាគត។ ក្នុងរយៈពេលជាង២ឆ្នាំមកនេះ ក្រោយពីការផ្តួចផ្តើមឲ្យមានយន្តការកិច្ចសហប្រតិបត្តិការមេគង្គ-ឡានឆាង ប្រទេសចិន បានផ្តល់ថវិការាប់ពាន់លានដុល្លារអាមេរិក ដើម្បីគាំទ្រដល់គម្រោងជាច្រើន អនុវត្តក្រោមយន្តការរបស់ចិននេះ។
ទន្លេមេគង្គ គឺជាបេះដូងនៃតំបន់អាស៊ីអាគ្នេយ៍ដីគោក ដែលមានប្រជាជនសរុបជាង ៦០លាននាក់ ពឹងផ្អែកលើទន្លេនេះ និងដៃទន្លេនេះ ជាប្រភពស្បៀង ទឹក ការដឹកជញ្ជូន និងជីវភាពប្រចាំថ្ងៃដទៃទៀត។ ទន្លេមេគង្គ គឺជាទន្លេដែលវែងជាងគេទី១២ នៅលើពិភពលោក មានប្រវែងប្រមាណជិត ៥ពាន់គីឡូម៉ែត្រ៕
