សមាជិកសភាអូស្ត្រាលី ពីខាងគណបក្សពលករ ថាសកម្មភាពរបស់លោក ហ៊ុន សែន ធ្វើឲ្យអូស្ត្រាលី ព្រួយបារម្ភខ្លាំងបំផុត និងស្នើឲ្យបញ្ឈប់ជាបន្ទាន់។ ប៉ុន្តែ មន្ត្រីរបបលោក ហ៊ុន សែន ថា អ្នកដែលត្រូវបញ្ឈប់សកម្មភាពញុះញង់នាំឲ្យលោក ហ៊ុន សែន ទប់កំហឹងមិនបានបែបនេះ គឺគួរតែខាងពលរដ្ឋខ្មែរនៅអូស្ត្រាលី ឯណោះទៅវិញទេ។
សមាជិកសភាអូស្ត្រាលី មួយរូបទៀតពីខាងគណបក្សពលករ ថាពលរដ្ឋអូស្ត្រាលី ព្រួយបារម្ភខ្លាំងបំផុតអំពីការរំលោភសិទ្ធិមនុស្សនៅប្រទេសកម្ពុជា និងការធ្វើទុក្ខបុកម្នេញលើគណបក្សប្រឆាំងមិនស្រាកស្រាន្តបែបនេះ។
លោក អែនថូនី ប៊ើន (Anthony Byrne) ប្រាប់សារព័ត៌មាន SBS News កាលពីថ្ងៃទី២៦ ខែកុម្ភៈ ដោយលោកស្នើឲ្យលោកនាយករដ្ឋមន្ត្រី ហ៊ុន សែន ពិចារណាឡើងវិញដើម្បីបញ្ឈប់ការយាយីបក្សប្រឆាំង និងអ្នកដែលមិនពេញចិត្តនឹងការដឹកនាំរបស់លោកនៅមុនដំណើរទស្សនកិច្ចទៅកាន់ប្រទេសអូស្ត្រាលី នៅខែក្រោយនេះ។
តំណាងរាស្ត្រគណបក្សប្រឆាំងរូបនេះរម្លឹកឡើងវិញថា ប្រទេសអូស្ត្រាលី មានប្រវត្តិដ៏យូរលង់ក្នុងការជួយកសាងឲ្យមានលទ្ធិប្រជាធិបតេយ្យនៅកម្ពុជា។ ភស្តុតាងនៃការចូលរួមរបស់ប្រទេសអូស្ត្រាលី ក្នុងការស្តារប្រជាធិបតេយ្យនៅកម្ពុជានេះ ស្ដែងឡើងតាមរយៈកិច្ចខិតខំប្រឹងប្រែងរបស់អតីតរដ្ឋមន្ត្រីការបរទេសអូស្ត្រាលី លោក ហ្គារ៉េត អ៊ីវ៉ាន (Gareth Evans) ក្នុងការផ្ដួចផ្ដើមឲ្យមានកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។ លោកអះអាងថា ទង្វើរបស់លោក ហ៊ុន សែន ដែលកំពុងប្រព្រឹត្តទៅលើគណបក្សប្រឆាំងសព្វថ្ងៃនេះ គឺមិនមែនជាអ្វីដែលជាក្តីស្រមៃចង់បានរបស់លោក ហ្គារ៉េត អ៊ីវ៉ាន កាលពីពេលនោះទេ។ ចំណុចទាំងនេះឯងហើយដែលយើងទាំងអស់គ្នាព្រួយបារម្ភខ្លាំង។
ការព្រួយបារម្ភកាន់តែខ្លាំងនេះ កើតមានឡើងក្រោយពេលលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះ បានគំរាមតាមវាយដល់ផ្ទះ បើពលរដ្ឋខ្មែរនៅអូស្ត្រាលី ហ៊ានធ្វើរូបទីងមោងតំណាងឲ្យរូបលោករួចដុតកម្ទេចវាចោល។
ប៉ុន្តែ មន្ត្រីរដ្ឋាភិបាលនៅតែការពារសម្តីរបស់មេកើយរបស់លោកថា សមស្រប និងអះអាងថា អ្វីដែលតំណាងរាស្ត្រអូស្ត្រាលី បារម្ភរឿងខ្មែរនេះ គឺជាគំនិតឯកជនប៉ុណ្ណោះ។ មន្ត្រីនាំពាក្យរបបក្រុងភ្នំពេញ លោក សុខ ឥសាន ថាការរិះគន់របស់តំណាងរាស្ត្រអូស្ត្រាលី ហាក់មិនផ្តល់ភាពយុត្តិធម៌ដល់លោក ហ៊ុន សែន នោះទេ ព្រោះពេលខាងអ្នករិះគន់របបលោក ហ៊ុន សែន និយាយប៉ះពាល់ប្រមុខរដ្ឋាភិបាលមិនឃើញតំណាងរាស្ត្រទាំងនោះ បង្ហាញក្តីកង្វល់ខ្លះផងទេ។ មិនប៉ុណ្ណោះលោក សុខ ឥសាន បន្ថែមថា លោក ហ៊ុន សែន ជាមនុស្សដូចគេដូចឯង ដែលចេះខឹងដែរ ហើយបើចង់ឲ្យឈប់ឲ្យលោកក្រេវក្រោធទៀត ទាល់តែភាគីម្ខាងទៀតឈប់មុន៖ «សម្ដេចតេជោ ហ៊ុន សែន ថានឹងតាមវ៉ៃដល់ផ្ទះអីហ្នឹង គឺនៅពេលណាវាដុត ឥឡូវវាដុតហើយ! អាហ្នឹងសួរថា ជាអ្នកប្រជាធិបតេយ្យដែរ ឬអត់? លោក ហ៊ុន សែន ជាមនុស្ស។ ទោះបីជាព្រះក៏ចេះខឹងដែរ ចុះទម្រាំមនុស្សសាមញ្ញដែលគេហៅថាប្រថុជ្ជន។ អស់លោកចេះខឹង អស់គេក៏ចេះខឹងដូចតែគ្នា។ បើចង់កុំឲ្យមានបញ្ហាឆ្លើយឆ្លងគ្នា គឺទាល់តែអស់លោកឈប់។ ប៉ុន្តែអស់លោកមានឈប់ឯណា តាំងពីដើមមក តាំងពី១៩៩៣ មកជេរគណបក្សប្រជាជនរហូត»។
អ្នកវិភាគនយោបាយ លោកបណ្ឌិត មាស នី យល់ឃើញផ្ទុយពីនេះទៅវិញ ដោយលោកមិនចង់ឃើញប្រមុខដឹកនាំរដ្ឋាភិបាល បង្ហាញកំហឹងទល់នឹងកំហល់ជាមួយពលរដ្ឋដែលមិនពេញចិត្តនឹងការដឹកនាំរបស់លោកបែបនេះទេ។ លោកបណ្ឌិត លើកឡើងថា ពាក្យសម្ដីដែលស្រាលជាងនេះ មិនខ្វះទេ ដែលលោក ហ៊ុន សែន អាចយកប្រើដើម្បីស្នើអ្នកតវ៉ាកុំឲ្យធ្វើអ្វីដែលលោកមិនពេញចិត្ត៖ «បើខ្ញុំជាសម្ដេច ហ៊ុន សែន វិញ យើងរកពាក្យផ្សេងសម្រាប់ធ្វើការពន្យល់ គ្រាន់បើជាង និងមិនសូវមានប្រតិកម្មបញ្ច្រាសធ្ងន់ៗដែរ។ បើសម្ដីរបស់គាត់ប្រើទៅធ្ងន់ ប្រតិកម្មមកវិញក៏ធ្ងន់ៗមកវិញដែរ ដូចចោលដុំថ្មដាក់គ្នា»។
កាលពីសប្ដាហ៍មុន សមាជិកសភាអូស្ត្រាលី ពីខាងគណបក្សពលករមួយរូបទៀត គឺលោក ម៉ាក បាត់លើរ៍ (Mark Butler) ក៏បានថ្លែងសារធ្ងន់ៗ តបទៅនឹងលោកនាយករដ្ឋមន្ត្រី ហ៊ុន សែន ដែលបានគំរាមប្រព្រឹត្តអំពើហិង្សាទៅលើអ្នកតវ៉ាខ្មែរនៅអូស្ត្រាលីនេះដែរ។ លោកបានស្នើឲ្យរដ្ឋាភិបាលអូស្ត្រាលី ប្រាប់ទៅលោក ហ៊ុន សែន ឲ្យដកការគំរាមវាយបាតុករទៅវិញជាបន្ទាន់ ព្រោះការគំរាមកំហែងបែបនេះ គឺបំពានសិទ្ធិសេរីភាព និងលទ្ធិប្រជាធិបតេយ្យដែលប្រទេសអូស្ត្រាលី ប្រកាន់ខ្ជាប់ម៉ឺងម៉ាត់បំផុត។
សារគំរាមវាយបាតុករដល់ផ្ទះនេះ បានដុតកំហឹងឲ្យពលរដ្ឋខ្មែរនៅអូស្ត្រាលី នាំគ្នាធ្វើរូបទីងមោងលោក ហ៊ុន សែន និងដុតជាសាធារណៈកាលពីចុងសប្ដាហ៍កន្លងទៅនេះ។ មិនតែប៉ុណ្ណោះ ពួកគាត់អះអាងថា បានដាក់ពាក្យបណ្ដឹងទៅកាន់ប៉ូលិសអូស្ត្រាលី និងសមត្ថកិច្ចពាក់ព័ន្ធដទៃទៀតរបស់ប្រទេសអូស្ត្រាលី ដោយចោទប្រកាន់លោក ហ៊ុន សែន ថាជាមេភេរវករអន្តរជាតិ ដែលបានគំរាមប្រើអំពើហិង្សាមកលើពលរដ្ឋអូស្ត្រាលី ដើម្បីឲ្យមានវិធានការផ្លូវច្បាប់លើលោក ហ៊ុន សែន។ ពលរដ្ឋខ្មែរនៅកាណាដា ក៏បាននាំគ្នាដុតរូបទីងមោងលោក ហ៊ុន សែន កាលពីចុងសប្ដាហ៍កន្លងទៅនេះដែរ។ ចំណែកពលរដ្ឋខ្មែរនៅសហរដ្ឋអាមេរិក ក៏គ្រោងធ្វើចលនាមហាជនដើម្បីឲ្យដុតរូបទីងមោងលោក ហ៊ុន សែន នៅតាមរដ្ឋនានា ដែលមានខ្មែររស់នៅ ដើម្បីបង្ហាញអំពីភាពមិនខ្លាចរអាការគំរាមកំហែងរបស់លោក ហ៊ុន សែន៕