Clik here to view.
ជនជាតិដើមភាគតិចខែត្រភាគឦសាន សម្ដែងការមិនពេញចិត្តចំពោះការបោះឆ្នោតព្រឹទ្ធសភានីតិកាលទី៤ ក្នុងរបបលោក ហ៊ុន សែន ដោយពួកគាត់យល់ថា ការបោះឆ្នោតនេះ គ្មានគូប្រកួត ហើយស្ថាប័ននីតិប្បញ្ញត្តិមួយនេះ បានធ្លាក់ក្នុងកណ្ដាប់ដៃលោក ហ៊ុន សែន ដដែលតែម្នាក់ឯង។ ពួកគាត់បារម្ភថា ស្ថាប័នព្រឹទ្ធសភាដែលមានភារកិច្ចអនុម័តច្បាប់ អាចនឹងបង្កើតច្បាប់ថ្មី និងកែប្រែច្បាប់តាមទំនើងចិត្ត តាមការចង់បានរបស់លោក ហ៊ុន សែន ដើម្បីក្រាញអំណាច និងបង្កគ្រោះថ្នាក់ធំដល់ជោគវាសនាជាតិ និងពលរដ្ឋ។
ជនជាតិដើមភាគតិចរស់នៅខែត្រស្ទឹងត្រែង និងខែត្រក្រចេះ ចាត់ទុកការបោះឆ្នោះព្រឹទ្ធសភានីតិកាលទី៤នេះ ធ្វើឡើងមិនត្រឹមត្រូវតាមក្របខ័ណ្ឌច្បាប់ និងមិនគោរពឆន្ទៈពលរដ្ឋជាង ៣លាននាក់ដែលបានបោះឆ្នោតគាំទ្របក្សជំទាស់។
ជនជាតិដើមភាគតិចរស់នៅស្រុកថាឡាបរិវ៉ាត់ ខែត្រស្ទឹងត្រែងថ្លែងសុំមិនបញ្ចេញឈ្មោះឲ្យដឹងនៅថ្ងៃទី២៥ កុម្ភៈថា គណបក្សកាន់អំណាចហាក់មិនខ្វល់ពី ការអំពាវនាវរបស់ពលរដ្ឋនោះទេ ដែលចង់ឲ្យស្ថានភាពនយោបាយប្រក្រតីឡើងវិញ ដើម្បីរួមគ្នាអភិវឌ្ឍន៍ជាតិ តែផ្ទុយទៅវិញរបបលោក ហ៊ុន សែន កាន់តែល្មើសច្បាប់ធ្ងន់ធ្ងរឡើងៗ។ ជាក់ស្ដែងការបោះឆ្នោតព្រឹទ្ធសភានេះ គឺជាឆាកល្ខោន តែធាតុពិតលទ្ធផលឈ្នះ ឬចាញ់ គឺឋិតក្នុងកណ្ដាប់ដៃលោកហ៊ុន សែន៖ «រឿងច្បាប់វាអត់មានទេ បោះឆ្នោតនេះ(បោះឆ្នោតព្រឹទ្ធសភា) គ្រាន់តែឲ្យអន្តរជាតិសើចតែប៉ុណ្ណោះ។ ការងារដែលធ្វើនេះ ប្រៀបបាននឹងវង្វេង វង្វេងច្បាប់ វង្វេងប្រជាពលរដ្ឋដែលនឹកឃើញ។ ការពិតដាក់កំហុសលើខ្លួនឯងធ្វើនេះ ។ ជនជាតិដើមភាគតិចរបស់ខ្ញុំព្រួយចិត្តត្រង់ហ្នឹង»។
បុរសដដែលបន្ថែមថា មូលហេតុចម្បងដែល គណបក្សប្រជាជនមិនហ៊ានប្រកួតជាមួយបក្សប្រឆាំង ព្រោះខ្លាចចាញ់ឆ្នោត ហើយលោក ហ៊ុន សែន ដឹងមុនច្បាស់ថា មិនអាចយកឈ្នះបក្សសង្គ្រោះជាតិបាន ទើបកែប្រែច្បាប់ ដើម្បីឲ្យតុលាការរំលាយបក្សប្រឆាំងចោល ដោយមិនខ្វល់ពីសុខទុក្ខប្រជាជន៖ «គាត់រំលាយចោល បើបោះឆ្នោតចាញ់គេហើយ ទោះបីគណបក្សតូចៗឈរឈ្មោះក៏ឥតប្រយោជន៍ដែរ ព្រោះគណបក្សកើតពីខ្យល់»។
ជនជាតិដើមភាគតិចម្នាក់ទៀតរស់នៅស្រុកស្នូល ខែត្រក្រចេះថ្លែងក្នុងលក្ខខណ្ឌមិនបញ្ចេញអត្តសញ្ញាណ ចាត់ទុកការបោះឆ្នោតព្រឹទ្ធសភា គឺជាកាន់អំណាចប្រមូលផ្តុំ របស់បក្សកាន់អំណាច ជះឥទ្ធិពលអាក្រក់ ដល់សិទ្ធិសេរីភាពពលរដ្ឋ និងសេដ្ឋកិច្ច។ លោកថា អំណាចប្រមូលផ្តុំ គឺជាប្រភពនៃអំពើពុករលួយ និងអយុត្តិធម៌សង្គម ហើយពលរដ្ឋនៅតែទទួលរងគ្រោះ ដោយសារការជិះជាន់ពីអាជ្ញាធររដ្ឋតែប៉ុណ្ណោះ។ លើសពីនេះបទល្មើសព្រៃឈើនៅតែជាប្រធានបទសំខាន់ ដែលលោក ហ៊ុន សែន គ្មានសមត្ថភាពបង្ក្រាបនោះទេ គឺគិតតែដណ្ដើមអំណាចគ្នាគ្រប់គ្រងកេងប្រវ័ញ្ចជាតិ៖ «ខ្ញុំយល់ថា ទី១ មិនប្រក្រតី និងពុំមានតម្លាភាព។ ប្រជាពលរដ្ឋរាល់ថ្ងៃនេះ គាត់និយាយថា បោះឆ្នោត២០១៨ គាត់មិនទៅបោះដោយសារបើបោះក៏សម្ដេចជាប់ មិនទៅបោះក៏សម្ដេចជាប់ បើអ៊ីចឹងកុំទៅបោះទាំងអស់គ្នា»។
មេឃុំសំបុក ស្រុកចិត្តបូរី ខែត្រក្រចេះ មកពីគណបក្សប្រជាជនកម្ពុជា លោក ទុយ វណ្ណា ឲ្យដឹងថា លោកបានបោះឆ្នោតព្រឹទ្ធសភារួចហើយ នៅព្រឹកថ្ងៃទី២៥ កុម្ភៈ។ លោកថា មានគណបក្សនយោបាយចំនួន ៤ ចូលរួមប្រកួតប្រជែង គឺគណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ និងគណបក្សរាជានិយមហ៊្វុនស៊ិនប៉ិច។ លោករំឭកថា កាលពីបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តិទី៤ នៅឃុំសំបុក មានគណបក្សនយោបាយធំៗពីរជាប់ឆ្នោត គឺគណបក្សសង្គ្រោះជាតិទទួលបាន ៤អាសនៈ និងគណបក្សប្រជាជនកម្ពុជាទទួលបាន ៣ អាសនៈ ពោល គឺគណបក្សសង្គ្រោះជាតិជាប់ឆ្នោតជាមេឃុំ៖ «ទៅបោះព្រឹកមិញ ខ្ញុំដូចឃើញដែរតែដូចមិនបានមើលថា នរណាៗ មនុស្សច្រើនពេក»។
ប្រធានក្រុមអ្នកវិភាគវ័យក្មេង លោក ហង្ស វិទូ អង្កេតឃើញថា ពលរដ្ឋភាគច្រើនមិនពេញចិត្តចំពោះការបោះឆ្នោតព្រឹទ្ធសភានោះទេ។ លោកថា ការបោះឆ្នោតព្រឹទ្ធសភានេះ មិនបានបង្ហាញពីឆន្ទៈរបស់ពលរដ្ឋនោះទេ រីឯបក្សកាន់អំណាចនៅតែមានប្រៀបទាំងស្រុង។ លោកយល់ថា ស្ថាប័នព្រឹទ្ធសភាជាស្ថាប័នអនុម័តច្បាប់ តែបើស្ថាប័នមួយនេះមិនមានឯករាជ្យភាព គណនេយ្យភាព និង តម្លាភាពទេ មានន័យថា ការអនុម័តច្បាប់ និងវិសោធនកម្មច្បាប់នានាអាចធ្វើឡើងស្រេចតែចិត្ត នឹងនាំឲ្យកើនឡើងអយុត្តិធម៌សង្គម ហើយពលរដ្ឋនៅតែទទួលរងគ្រោះ៖ «ប្រជាពលរដ្ឋដែលគាត់យល់ថា ការបោះឆ្នោតព្រឹទ្ធសភាជារឿងសំខាន់ បើធ្វើឡើងមិនល្អ វាអាចប៉ះពាល់ទាំងមន្ត្រីរាជការ និងពលរដ្ឋតាំងពីថ្នាក់ក្រោមដល់ថ្នាក់លើ»។
អាស៊ីសេរី ពុំទាន់អាចទាក់ទងមន្ត្រី គ.ជ.ប និងមន្ត្រីជាន់ខ្ពស់ គណបក្សប្រជាជនកម្ពុជា ឆ្លើយតបជុំវិញរឿងនេះបានទេ នៅទី២៥ កុម្ភៈ។
ការបោះឆ្នោតព្រឹទ្ធសភាពនីតិកាលទី៤ នេះ ត្រូវបញ្ចប់នៅរសៀលម៉ោង ៣ ថ្ងៃដដែល ដោយមានអ្នកបោះឆ្នោតចំនួនជាង ១ម៉ឺននាក់( ១១ ៦៩៥នាក់) ទៅបោះឆ្នោតនៅក្នុងការិយាល័យបោះឆ្នោតចំនួន ៣៣កន្លែង។ នៅរសៀលថ្ងៃទី២៥ កុម្ភៈ គ.ជ.ប មិនទាន់ប្រកាសលទ្ធផលជាផ្លូវការនៅឡើយទេ៕