Clik here to view.
សមាជិកសភារបស់គណបក្សប្រជាជនកម្ពុជា និងសមាជិកសភាខុសច្បាប់ ឬសមាជិកសភាដែលពលរដ្ឋ មិនបានបោះឆ្នោតឲ្យ ដែលគាំទ្រ គណបក្សកាន់អំណាចទាំង ១២៣នាក់ រួមទាំងសមាជិកក្រុម ប្រឹក្សាឃុំសង្កាត់ទូទាំងប្រទេសជាងមួយម៉ឺននាក់ បាននាំគ្នាទៅបោះឆ្នោតជ្រើសតាំងសមាជិកព្រឹទ្ធសភានៅថ្ងៃទី២៥ ខែកុម្ភៈ នៅតាមមណ្ឌលបោះឆ្នោតទាំង៣៣ នៅទូទាំងប្រទេសដែល គ.ជ.ប បានរៀបចំ។
មុនការបោះឆ្នោតព្រឹទ្ធសភាមួយថ្ងៃ គណបក្សសង្គ្រោះជាតិបានចេញ សេចក្ដីថ្លែងការណ៍មិនទទួលលទ្ធផលនៃការបោះឆ្នោតព្រឹទ្ធសភា។ គណបក្សសង្គ្រោះជាតិ ស្នើឲ្យអង្គការសហប្រជាជាតិ (អ.ស.ប) និងសហគមន៍អន្តរជាតិ ទាត់ចោលការបោះឆ្នោតព្រឹទ្ធសភារបស់របបលោក ហ៊ុន សែន។
ក្នុងពេលត្រួតពិនិត្យការបោះឆ្នោតនេះ ប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក បានប្រាប់ក្រុមអ្នកសារព័ត៌មានថា ការបោះឆ្នោតនេះ គឺធ្វើឡើងផ្អែកទៅតាមច្បាប់របស់កម្ពុជា ដូច្នេះគ.ជ.បមិនចាប់អារម្មណ៍លើការរិះគន់ទាំងនោះទេ។
ប្រធានគ.ជ.ប រូបនេះ ឆ្លើយតបទៅនឹងសហរដ្ឋអាមេរិក និងពីសហភាពអឺរ៉ុប ដែលផ្ដាច់ជំនួយពីស្ថាប័ននេះថា គ.ជ.ប មិនមែនកើតឡើងពីសហរដ្ឋអាមេរិក និងពីសហភាពអឺរ៉ុបនោះទេ។ «»
ចំណែក អ្នកនាំពាក្យគណបក្សប្រជាជនកម្ពុជា លោក សុខ ឥសាន បានសរសេរនៅលើប្រព័ន្ធតេឡេក្រាមរបស់លោកនៅថ្ងៃ២៥ ខែកុម្ភៈ ដោយហៅគណបក្សសង្គ្រោះជាតិថា ជាពួកឧទ្ទាមនិយមក្រៅច្បាប់។ លោកថា ការអំពាវនាវឲ្យអន្តរជាតិមិនទទួលស្គាល់លទ្ធផល បោះឆ្នោតនេះរបស់ក្រុមបក្សប្រឆាំង គឺគ្មានឥទ្ធិពលអ្វីទាំងអស់។
ប៉ុន្តែ តំណាងរាស្ត្រគណបក្សសង្គ្រោះជាតិ លោក សួន រីដា បានប្រាប់អាស៊ីសេរីថា លោកមិនទទួលស្គាល់ការបោះឆ្នោតនេះទេ។ លោកបន្តថា ការបោះឆ្នោតនេះមិនអាចយកជាការបានទេ ដោយសារ បក្សកាន់អំណាចបានប្លន់យកអង្គបោះឆ្នោតបាត់ទៅហើយ។ «»
ទោះគណបក្សប្រជាជនកម្ពុជា កំពុងសប្បាយទៅនឹងលទ្ធផលនៃការបោះឆ្នោតដែលខ្លួនរំពឹងទុកនេះក្ដី ក្រុមសមាជិកសភាអាស៊ានដើម្បីសិទ្ធិមនុស្ស (APHR) កាលពីទី២៣ កុម្ភៈ ប្រកាសថាការបោះឆ្នោតនេះ មិនអាចចាត់ទុកថា មានភាពស្របច្បាប់តាមលក្ខណៈប្រជាធិបតេយ្យបាននោះឡើយ។ សមាជិកសភាអាស៊ានចាត់ទុកថា ការបោះឆ្នោតព្រឹទ្ធសភាមួយនេះ គ្មានភាពស្របច្បាប់នោះទេ ដោយសាររបបលោក ហ៊ុន សែនបានរម្លាយគណបក្សប្រឆាំងធំជាងគេ គឺគណបក្សសង្គ្រោះជាតិ និងការរឹតត្បិតសិទ្ធិសេរីភាពជារួមក្នុងប្រទេសកម្ពុជាជាបន្តបន្ទាប់ នៅរយៈពេលប៉ុន្មានឆ្នាំចុងក្រោយនេះ។
នៅថ្ងៃបោះឆ្នោតមានការចូលរួមសង្កេតការណ៍ពីតំណាងស្ថានទូតជប៉ុន ម៉ាឡេស៊ី និង អ្នកសង្កេតការណ៍របស់អង្គការសមាគមក្នុងស្រុកចំនួន១២ ដែលស្នឹទ្ធនឹងគណបក្សប្រជាជនកម្ពុជាប៉ុណ្ណោះ។ ការបោះឆ្នោតនេះ មានគណបក្សនយោបាយចំនួន ៤ចូលរួម គឺគណបក្សប្រជាជនកម្ពុជា គណបក្សហ្វ៊ិនស៊ិនប៉ិច គណបក្សខ្មែររួបរួមជាតិ និងគណបក្សយុវជនកម្ពុជា ប៉ុន្តែបោះឆ្នោតរបស់គណបក្សទាំងនេះមានតិចរួចណាស់ ព្រោះអង្គបោះឆ្នោតស្ទើរទាំងអស់ជារបស់គណបក្សប្រជាជនកម្ពុជា ក្រោយពេលគណបក្សនេះបានរម្លាយ គណបក្សសង្គ្រោះជាតិចោល។
ទោះលទ្ធផលបឋមនៃការបោះឆ្នោតព្រឹទ្ធសភានឹងត្រូវគ.ជ.បប្រកាស នៅយប់ក្នុងថ្ងៃបោះឆ្នោតដដែល។ ប៉ុន្តែគណបក្សកាន់អំណាច បាននិយាយតាំងពីមុនការបោះឆ្នោតនេះថា នឹងទទួលបានកៅអីស្ទើរតែទាំងស្រុងរបស់ព្រឹទ្ធសភាមកគ្រប់គ្រង៕
