ក្រុមប្រជាពលរដ្ឋខ្មែរនៅអូស្ត្រាលី ប្រកាសថា ការព្រមានប្រើអំពើហិង្សារបស់លោក ហ៊ុន សែន ទៅលើពលរដ្ឋខ្មែរ-អូស្ត្រាលី បានបណ្ដាលឲ្យពួកគេប្ដេជ្ញាចិត្តថែមទៀតដើម្បីធ្វើរូបទីងមោងលោក ហ៊ុន សែន ដុតតវ៉ាប្រឆាំងវត្តមានលោកនៅក្នុងកិច្ចប្រជុំកំពូលអាស៊ាន-អូស្ត្រាលី នៅខែមីនា។ អ្នកវិភាគនយោបាយលើកឡើងថា ការព្រមានប្រើអំពើហិង្សារបស់របបលោក ហ៊ុន សែន ធ្វើឲ្យលោកបាត់បង់ប្រជាប្រិយភាពបន្ថែមទៀត។
អ្នកវិភាគនយោបាយលើកឡើងថា ការប្រើប្រាស់សម្ដីបែបហិង្សារបស់លោកនាយករដ្ឋមន្ត្រី ហ៊ុន សែន ក្នុងចេតនាបង្ក្រាបអ្នកប្រឆាំងលោកនេះ ជាការបង្ហាញថា លោក ហ៊ុន សែន កំពុងធ្វើនយោបាយដល់ភាពទាល់ច្រកហើយ។
អ្នកឃ្លាំមើលផ្នែកអភិវឌ្ឍន៍សង្គម និងនយោបាយ លោកបណ្ឌិត មាស នី មានប្រសាសន៍ថា នេះមិនមែនជារឿងចម្លែកទេ ការដែលពលរដ្ឋមិនគាំទ្រលោក ហ៊ុន សែន កំពុងកើនឡើង ពីព្រោះថា ក្នុងរយៈពេលចុងក្រោយនេះ លោក ហ៊ុន សែន ព្យាយាមបង្ក្រាបអ្នកមានទស្សនៈផ្ទុយពីខ្លួនជាជាងដោះស្រាយបញ្ហា៖ «»។
លោក ហ៊ុន សែន ព្រមានពលរដ្ឋខ្មែរនៅអូស្ត្រាលី កាលពីថ្ងៃទី២១ ខែកុម្ភៈ នៅចំពោះមុខកម្មករថា លោកក៏មានអ្នកគាំទ្រលោកនៅក្រៅប្រទេសច្រើនដែរ ដូច្នេះអ្នកដែលប៉ុនប៉ងធ្វើបាតុកម្មប្រឆាំងរួបលោកត្រូវប្រយ័ត្នខ្លួនឲ្យតែហ៊ានយករូបលោកធ្វើជាទីងមោងហើយដុតចោលនោះ លោកនឹងមិនលើកលែងឲ្យជាដាច់ខាត៖ «»។
ទោះបីជាមានការអះអាងព្រមានពីមេដឹកនាំយូរជាងគេនៅអាស៊ីដូច្នេះក្ដី តំណាងរាស្ត្រអូស្ត្រាលី ដើមកំណើតខ្មែរ លោក ហុង លីម ថ្លែងចំអកទៅលោក ហ៊ុន សែន វិញថា លោក ហ៊ុន សែន គួរតែស្វែងយល់ច្បាប់អូស្ត្រាលី ឲ្យបានច្បាស់ មុននឹងលោកសម្រេចចិត្តមកចូលរួមកិច្ចប្រជុំកំពូលអាស៊ាន-អូស្ត្រាលី។ លោកបញ្ជាក់ថា អូស្ត្រាលីមិនមែនជាប្រទេសផ្ដាច់ការដូចរបបក្រុងភ្នំពេញ ដែលលោក ហ៊ុន សែន ចង់ធ្វើអ្វីស្រេចតែចិត្តនោះទេ។ លោកអះអាងថា ការប្រកាសរបស់លោក ហ៊ុន សែន បែបនេះ នឹងធ្វើអោយក្រុមបាតុករកាន់តែមានចិត្តចង់រូបទីងមោងលោក ហ៊ុន សែន កាន់តែធំកាន់តែច្រើនដើម្បីដុតស្វាគមន៍លោក ហ៊ុន សែន៖ «»។
ចំពោះព្រះតេជព្រះគុណ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ បានហៅភាសាគំរាមលោក ហ៊ុន សែន ថា ជាភាសាអន់ជាងក្មេងពាលទៅទៀត ដែលមិនសាកសមជាមេដឹកនាំប្រទេស។ ព្រះអង្គអះអាងថា មេដឹកនាំប្រទេសមហាអំណាចក៏ត្រូវបានប្រជាពលរដ្ឋរបស់ខ្លួនធ្វើបាតុកម្មយករូបថតមកដុត ឬអ្វីផ្សេងៗទៀត ដែលជាការសម្ដែងមតិមិនពេញចិត្តដែរ តែមេដឹកនាំគេមិនដែលឆ្លើយតបបែបហិង្សា និងគំរាមឡើយ។ មេដឹកនាំទាំងនោះ ដូចជាអាមេរិកជាដើម គឺមេដឹកនាំ គេព្យាយាមរកដំណោះស្រាយជូនពលរដ្ឋរបស់ខ្លួនដើម្បីបញ្ចប់បញ្ហា៖ «»។
ក្រៅពីលោក ហ៊ុន សែន ព្រមានតាមវាយអ្នកប្រឆាំងលោកដល់ផ្ទះនេះ កាលពីពេលថ្មីៗនេះ ក៏មានបុរសម្នាក់ឈ្មោះ គង ប៊ុនទូ ដែលជាក្រុមសេនានាគរបស់លោក ហ៊ុន សែន ក៏ព្រមានតាមបាញ់សម្លាប់ពលករខ្មែរនៅប្រទេសកូរ៉េ រហ័សនាមក្នុងគណនីហ្វេសប៊ុក ឈ្មោះ "សង្ហា" ដែរ។ សង្ហាគឺជាសកម្មជនដ៏សកម្មនៅក្នុងបណ្ដាញសង្គម ប្រឆាំងដាច់ខាតរបបផ្ដាច់ការរបស់លោក ហ៊ុន សែន ដែលបំផ្លាញលទ្ធិប្រជាធិបតេយ្យនៅកម្ពុជា និងរំលាយគណបក្សសង្គ្រោះជាតិនោះ។ ក្រុមសេនានាគរបស់លោក ហ៊ុន សែននេះ ធ្លាប់បានប្រើអំពើហិង្សាលើតំណាងរាស្ត្រគណបក្សសង្គ្រោះជាតិពីររូប គឺលោក គង់ សុភា និងលោក ញ៉យ ចំរើន។ ការប្រើអំពើហិង្សានេះ នៅបន្ទាប់ពីលោក ហ៊ុន សែន ប្រកាសបើកភ្លៀងខៀវដែរ។
ព្រះតេជព្រះគុណ ប៊ុត ប៊ុនតិញ ដែលកំពុងរងបណ្ដឹងពីតុលាការរបបក្រុងភ្នំពេញ ដែរនោះ ជំរុញលើកទឹកចិត្តដល់ពលរដ្ឋខ្មែរនៅអូស្ត្រាលី កុំរួញរា ឬភ័យខ្លាចនឹងភាសាគំរាមរបស់លោក ហ៊ុន សែន ឡើយ។ ព្រះតេជព្រះគុណអះអាងថា លោក ហ៊ុន សែន មានអប្បិយជំនឿខ្លាចគេធ្វើរូបលោកជាទីងមោង ហើយគេយកទៅដុតចោលនេះណាស់។ ព្រះអង្គអំពាវនាវទៅលោកនាយករដ្ឋមន្ត្រីថា កុំភ័យខ្លាចចំពោះការដុតរួបទីងមោងនេះអី ព្រោះថា ការដុតរូបទីងមោងនេះ ពលរដ្ឋគ្រាន់តែសម្ដែងមតិប៉ុណ្ណោះ គឺមិនឈឺចាប់ដូចអាជ្ញាធររបស់លោកដុតផ្ទះ ឬទីជម្រករបស់ប្រជាពលរដ្ឋក្រីក្រនៅកម្ពុជា ចោលឡើយ៖ «»។
ដោយហៅអំពើលោក ហ៊ុន សែន ថា អាក្រក់ជាងសត្វតិរច្ឆានទៅទៀតនោះ លោក ហុង លីម មានប្រសាសន៍ថា គោលបំណងនៃកិច្ចប្រជុំកំពូលអាស៊ាន-អូស្ត្រាលីនេះ គឺដើម្បីរួមគ្នាកម្ចាត់អំពើភេរវកម្មនៅតំបន់អាស៊ី តែលោកថា វាស្រាប់តែមេប្រតិភូនៃប្រទេសមួយមកចូលរួមក្នុងកិច្ចប្រជុំនេះ ទើបតែប្រកាសអំពីបំណងទៅធ្វើភេរវកម្មក្នុងទឹកដីអូស្ត្រាលីទៅវិញ៖ «»។
សមាជិកព្រឹទ្ធសភាខាងគណបក្សពលករដែលជាគណបក្សប្រឆាំងក្នុងប្រទេសអូស្ត្រាលី ជំរុញឲ្យរដ្ឋាភិបាលនៃប្រទេសមួយនេះបង្ហាញការគាំទ្រយ៉ាងខ្លាំងរបស់ខ្លួនទៅលើលទ្ធិប្រជាធិបតេយ្យនៅកម្ពុជា និងការគោរពសិទ្ធិមនុស្សនៅចំពោះមុខលោក ហ៊ុន សែន នៅពេលលោកមកចូលរួមកិច្ចប្រជុំកំពូលអូស្ត្រាលី-អាស៊ាន នៅខែក្រោយនេះ។
តាមរយៈសេចក្ដីប្រកាសព័ត៌មានមួយរបស់សមាជិកព្រឹទ្ធសភា និងជារដ្ឋមន្ត្រីក្រសួងការបរទេសស្រមោលរបស់ប្រទេសអូស្ត្រាលី អ្នកស្រី ភែននី វ៉ុង (Penny Wong) ដែលចេញផ្សាយកាលពីថ្ងៃទី១៥ ខែកុម្ភៈ កន្លងទៅនេះ ក៏បានអំពាវនាវឲ្យរដ្ឋាភិបាលកម្ពុជា ស្តារលទ្ធិប្រជាធិបតេយ្យ សេរីភាពសារព័ត៌មាន ដោះលែងលោក កឹម សុខា និងលុបចោលការរំលាយគណបក្សសង្គ្រោះជាតិ។ អ្នកស្រីក៏បានជំរុញឲ្យមានការបោះឆ្នោតនៅពេលខាងមុខធ្វើឡើងដោយសេរី ត្រឹមត្រូវ និងយុត្តិធម៌ និងអនុញ្ញាតឲ្យពលរដ្ឋខ្មែរសម្ដែងឆន្ទៈក្នុងការជ្រើសរើសមេដឹកនាំរបស់ពួកគេដោយសំឡេងស្របច្បាប់ ឬដោយគ្មានការភ័យខ្លាច។
រីឯលោក តាក់ ម៉េងហៀង ដែលទើបជាប់ឆ្នោតជាបេក្ខជនតំណាងរាស្ត្រថ្មីនោះ មានប្រសាសន៍ដែរថា លោកហួសចិត្តចំពោះប្រសាសន៍លោកនាយករដ្ឋមន្ត្រី ហ៊ុន សែន គំរាមតាមវាយបាតុករដុតទីងមោងដល់ផ្ទះនេះ។ លោក តាក់ ម៉េងហៀង ដែលមានវិជ្ជាជីវៈជាមេធាវីផងនោះ មានប្រសាសន៍ស្រដៀងនឹងលោក ហុង លីម ដែរថា ការប្រកាសរបស់លោក ហ៊ុន សែន នេះ អាចជាការពន្យុះអោយបាតុករកាន់តែមានចិត្តចង់ដុតរូបទីងមោង លោក ហ៊ុន សែន កាន់តែខ្លាំងថែមទៀតទៅវិញទេ។
ទាក់ទងនឹងការដឹកនាំបែបហិង្សានេះ របាយការណ៍របស់អង្គការឃ្លាំមើលសិទ្ធិមនុស្សអន្តរជាតិ Human Rights watch បានកត់ត្រាពីបញ្ហាសិទ្ធិមនុស្សដែលពាក់ព័ន្ធនឹងលោកនាយករដ្ឋមន្ត្រី ហ៊ុន សែន ដែលអាចចាត់ទុកជាបទឧក្រិដ្ឋប្រឆាំងមនុស្សជាតិចាប់តាំងពីលោកបានកាន់តួនាទីជាមេបញ្ជាការទ័ពខ្មែរក្រហមក្នុងអំឡុងទសវត្ស៧០ ចំពោះការប្រព្រឹត្តប្រឆាំងជនជាតិចាម។ នៅក្នុងទសវត្ស៨០ ពេលលោកធ្វើជានាយករដ្ឋមន្ត្រីពាក់ព័ន្ធនឹងការងារដោយបង្ខំ និងឃុំឃាំងមនុស្សជាប្រព័ន្ធ ហើយលោកក៏ជាប់ពាក់ព័ន្ធនឹងការកាប់សម្លាប់ក្រៅច្បាប់ក្នុងរដ្ឋប្រហារការគប់គ្រាប់បែកលើហ្វូងបាតុករ ដែលធ្វើឲ្យមនុស្សជាច្រើនស្លាប់ និងរងរបួសក្នុងទសវត្ស៩០ និងបច្ចុប្បន្ន មនុស្សជាច្រើនត្រូវបានរបបរបស់លោកចាប់ដាក់គុក និងបាញ់សម្លាប់ក្រៅប្រព័ន្ធច្បាប់។
ជាសរុបសេចក្ដីទៅ អ្នកវិភាគលើកឡើងថា លោក ហ៊ុន សែន កំពុងដឹកនាំប្រទេស កំពុងតែធ្វើឲ្យប្រទេសជាតិអាប់ឱនកិត្តិយសនៅលើឆាកអន្តរជាតិ ដែលលោកបានដឹកនាំប្រទេសបែបហិង្សាបែបនេះ ហើយបញ្ហាទាំងនេះ បានជំរុញឲ្យប្រជាប្រិយរបស់ធ្លាក់ចុះជាបន្តបន្ទាប់៕