មន្ត្រីការទូតរបប ហ៊ុន សែន បានដាក់លក្ខខណ្ឌនឹងមន្ត្រីជាន់ខ្ពស់រដ្ឋសភាអាមេរិកថា កម្ពុជានឹងបន្តកិច្ចសហប្រតិបត្តិការរុករកអដ្ឋិធាតុទាហានអាមេរិក និងយល់ព្រមទទួលពលរដ្ឋខ្មែរបញ្ជូនត្រឡប់មកកម្ពុជា វិញ ដរាបណាសហរដ្ឋអាមេរិក លើកការរឹតត្បិតទិដ្ឋាការដល់មន្ត្រីជាន់ខ្ពស់ក្រសួងការបរទេសកម្ពុជា ជាមុនសិន។
សេចក្ដីប្រកាសព័ត៌មាននៅថ្ងៃទី២១ ខែកុម្ភៈ របស់ក្រសួងការបរទេសរបបលោក ហ៊ុន សែន ថា ក្រោយពីមានជំនួបរវាងរដ្ឋមន្ត្រីក្រសួងការបរទេស លោក ប្រាក់ សុខុន ជាមួយលោក Rodney Frelinghuysen ប្រធានគណៈកម្មាធិការគ្រប់គ្រង និងបែងចែកថវិកាជាតិនៃរដ្ឋសភាអាមេរិក កាលពីថ្ងៃទី២០ ខែកុម្ភៈ។
ក្នុងជំនួបពិភាក្សាលោក ប្រាក់ សុខុន បញ្ជាក់ជំហរថា កម្ពុជានឹងផ្ដល់កិច្ចសហការយ៉ាងពេញលេញដរាបណាសហរដ្ឋអាមេរិក សម្រេចដកការរឹតត្បិតទិដ្ឋាការមកលើមន្ត្រីជាន់ខ្ពស់របស់ក្រសួងការបរទេសកម្ពុជា។ កាលពីឆ្នាំ២០១៧ អាមេរិក បានសម្រេចផ្អាកទិដ្ឋាការមន្ត្រីការទូត និងគ្រួសាររបស់មន្ត្រីការទូតកម្ពុជា ដើម្បីឆ្លើយតបនឹងកម្ពុជា ដែលបានប្រកាសមិនព្រមទទួលជនជាតិខ្មែរដែលអាមេរិក គ្រោងបញ្ជូនមកកម្ពុជាវិញ។
ក្រោយមកទៀតអាមេរិក ក៏បានដាក់ទណ្ឌកម្មបន្ថែមលើទិដ្ឋាការលើមន្ត្រីរដ្ឋាភិបាលកម្ពុជា ណាដែលជាប់ពាក់ព័ន្ធនឹងការរំលាយលទ្ធិប្រជាធិបតេយ្យនៅកម្ពុជា។ លោក Rodney Frelinghuysen មិនទាន់ធ្វើសេចក្ដីថ្លែងការណ៍ពាក់ព័ន្ធនឹងជំនួបនឹងលោក ប្រាក់ សុខុន នៅឡើយទេរហូតមកទល់ថ្ងៃទី២១ ខែកុម្ភៈ៕