ប្រជានេសាទនៅតំបន់បឹងទន្លេសាប ក្នុងស្រុកឯកភ្នំ ខេត្តបាត់ដំបង ចោទប្រកាន់មន្ត្រីជលផលថា គ្មានមានវិធានការទប់ស្កាត់បទល្មើសនេសាទទ្រង់ទ្រាយធំនោះទេ ប៉ុន្តែបែរជាមករឹតបន្តឹង ចំពោះតែអ្នកធ្វើនេសាទតូចតាចដែលមានជីវភាពក្រីក្រ ហើយបណ្ដោយឲ្យអ្នកមានលុយកាក់ធ្វើនេសាទបានដោយសេរី។ ការចោទប្រកាន់នេះបន្ទាប់ពីអ្នកភូមិប្រទះឃើញការធ្វើនេសាទខុសច្បាប់កើតឡើងពេញបន្ទុកនៅតំបន់បឹងទន្លេសាប ដោយពុំមានសមត្ថកិច្ចណាទប់ស្កាត់នៅឡើយ។
ប្រជានេសាទនៅតំបន់បឹងទន្លេសាបស្រុកឯកភ្នំ ទទូចឲ្យសមត្ថកិច្ចពាក់ព័ន្ធចាត់វិធានការទៅលើការធ្វើនេសាទខុសច្បាប់ឲ្យបានស្មើភាពគ្នាទាំងពលរដ្ឋក្រីក្រ និងអ្នកមានទ្រព្យធន។
ពលរដ្ឋនៅភូមិក្បាលតោល ឃុំកោះជីវាំង ស្រុកឯកភ្នំ លោក អ៊ន អឿន ឲ្យដឹងនៅថ្ងៃទី១៨ កុម្ភៈ ថា ក្រុមអ្នកមានលុយកាក់ ជាច្រើននាក់ បានប្រើឧបករណ៍មងក្រឡាញឹក រាប់ពាន់ម៉ែត្រនេសាទនៅតំបន់បឹងទន្លេសាបក្នុងភូមិក្បាលតោល បានដោយសេរី ចំណែកឯប្រជាពលរដ្ឋក្រីក្រមិនអាចនេសាទនៅតំបន់នោះបានឡើយ៖ «ប្រជាពលរដ្ឋសព្វថ្ងៃនេះកំពុងតែជ្រួលច្របល់រឿងជីវភាពទន់ខ្សោយ ព្រោះមុខរបរគ្នាតូចតាចធ្វើអីអត់បាន ដូច្នេះពួកខ្ញុំខ្វាយខ្វល់មិនដឹងទៅឲ្យអ្នកណាជួយដោះស្រាយបានទេ។ ខ្ញុំសំណូមពរឲ្យរដ្ឋាភិបាលលោកជួយធ្វើយ៉ាងណាឲ្យពួកខ្ញុំបានធ្វើនេសាទជាលក្ខណៈគ្រួសារដោះស្រាយជីវភាពផង»។
លោកបន្ថែមទៀតថា បើទោះបីជាថ្មីៗនេះ មានសមត្ថកិច្ចជំនាញពាក់ព័ន្ធបានចុះទៅបង្ក្រាបការធ្វើនេសាទខុសច្បាប់ក៏ដោយ ប៉ុន្តែមន្ត្រីរដ្ឋបាលជលផលចាត់វិធានការចំពោះតែពលរដ្ឋក្រីក្រប៉ុណ្ណោះ ចំណែកអ្នកមានលុយកាក់បន្តធ្វើសកម្មភាពបានដដែល។
នាយខណ្ឌរដ្ឋបាលជលផល ខេត្តបាត់ដំបងលោក ជួង សុភា មិនទាន់អាចឆ្លើយបំភ្លឺជុំវិញការចោទប្រកាន់នេះបាននៅឡើយទេ ដោយលោកប្រាប់ថាជាប់រវល់។
ប៉ុន្តែមេឃុំកោះជីវាំង លោក ពុំ ចិន មានប្រសាសន៍ថា សមត្ថកិច្ចចាត់វិធានការទប់ស្កាត់ការធ្វើនេសាទខុសច្បាប់ដោយស្មើភាពគ្នា ទាំងអ្នកមានលុយ និងប្រជាពលរដ្ឋក្រីក្រ៖ «អ្នកក្រក៏លួចធ្វើនេសាទបាន ហើយអ្នកមានក៏លួចធ្វើនេសាទបានដូចគ្នាទេ មិនមែនធ្វើនេសាទបានតែអ្នកមានលុយឯណា»។
ទោះជាយ៉ាងនេះតំណាងអ្នកនេសាទខេត្តបាត់ដំបងលោក ហ៊ុត ហាន លើកឡើងថា ការប្រើឧបករណ៍មងក្រឡាញឹក នេសាទខុសច្បាប់នៅតំបន់បឹងទន្លេសាបខេត្តបាត់ដំបង ភាគច្រើនគឺអ្នកមានលុយកាក់ ហើយបានប៉ះពាល់យ៉ាងខ្លាំងដល់ប្រជាពលរដ្ឋក្រីក្រ ធ្វើឲ្យពួកគាត់មិនអាចធ្វើការនេសាទដើម្បីរកប្រាក់ចំណូលដោះស្រាយជីវភាពគ្រួសារបាននោះទេ៖ «បាទការពិតនិយាយឲ្យច្បាស់ទៅមិនមែនអាជ្ញាធរទេរឿងនេះ គឺសមត្ថកិច្ចជំនាញតែម្ដង គឺមានទាំងប៉ូលិស ទាហាន មន្ត្រីកងរាជអាវុធហត្ថ និងមន្ត្រីជលផលតែម្ដង ហើយជាពិសេសនៅភូមិក្បាលតោល ដែលគេធ្វើនេសាទនៅតំបន់អភិរក្សគឺសមត្ថកិច្ចមិនទប់ស្កាត់អីបានផង ហើយកន្លែងដែលយើងបានដាក់សំណើទៅមន្ត្រីថ្នាក់ជាតិហើយនឹង ក៏មានការនេសាទខុសច្បាប់ដែរ»។
លោក ហ៊ុត ហាន កត់សំគាល់ទៀតថា បញ្ហានេះប្រសិនបើរដ្ឋាភិបាលលោក ហ៊ុន សែន ពុំមានវិធានការទប់ស្កាត់ការធ្វើនេសាទខុសច្បាប់ឲ្យបានតឹងរ៉ឹងទេ គឺមិនយូរឡើយត្រីនៅតំបន់បឹងទន្លេសាប នឹងហិនហោចអស់ជាពុំខាន ហើយប្រជាពលរដ្ឋក្រីក្ររស់នៅតំបន់នោះ នឹងធ្វើចំណាកស្រុកទៅស្វែងរកការងារនៅប្រទេសថៃកាន់តែច្រើន។
នៅតំបន់បឹងទន្លេសាបខេត្តបាត់ដំបង មានប្រជាពលរដ្ឋរាប់ពាន់គ្រួសារហើយភាគច្រើនប្រកបរបរនេសាទគឺពួកគាត់ពឹងផ្អែកទាំងស្រុង ទៅលើរបរនេសាទដើម្បីរកប្រាក់ដោះស្រាយជីវភាពគ្រួសារ៕