អង្គការក្រៅរដ្ឋាភិបាល គាំទ្រចំពោះការចេញអនុក្រឹត្យរបស់រាជរដ្ឋាភិបាល សម្រេចកាត់ផ្ទៃដីមានទំហំជាង ៥ម៉ឺនហិកតារ នៅខេត្តព្រះសីហនុ និងកោះកុង បង្កើតជាឧទ្យានជាតិសមុទ្រកោះរ៉ុង។
អ្នកសម្របសម្រួលសមាគមអាដហុក(Adhoc) ប្រចាំខេត្តព្រះសីហនុ អ្នកស្រី ជៀប សុធារី បានស្នើដល់ថ្នាក់ដឹកនាំ នៅតាមក្រសួងស្ថាប័នពាក់ព័ន្ធ មានក្រសួងមហាផ្ទៃ ក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ព្រមទាំងរដ្ឋបាលខេត្តព្រះសីហនុជាដើម ត្រូវអនុវត្តអនុក្រឹត្យ របស់ប្រមុខដឹកនាំរដ្ឋាភិបាល ឲ្យមានប្រសិទ្ធភាព។ អ្នកស្រី ក៏ស្នើឲ្យអាជ្ញាធរពាក់ព័ន្ធ ដែលចុះអនុវត្តការងារកាត់ឆ្វៀលដីដាក់ជាឧទ្យានជាតិសមុទ្រកោះរ៉ុងនេះ មិនត្រូវធ្វើឲ្យប៉ះពាល់ដល់ដីកម្មសិទ្ធិ របស់ប្រជាពលរដ្ឋ រស់នៅលើកោះរ៉ុងនោះទេ។ អ្នកស្រី សុធារី ក៏ស្នើដល់អាជ្ញាធរ ឲ្យជួយពន្លឿនការចេញប័ណ្ណកម្មសិទ្ធិកាន់កាប់ដីធ្លី នៅលើកោះរ៉ុង និងកោះផ្សេងៗទៀត ជូនប្រជាពលរដ្ឋ ប្រើប្រាស់ស្របច្បាប់ឲ្យបានឆាប់៖ «បើយើងមើលទៅតាមខ្លឹមសារអនុក្រឹត្យគឺមន្ត្រីជំនាញពាក់ព័ន្ធទាំងអស់ អាជ្ញាធរមូលដ្ឋាន និងប្រជាពលរដ្ឋរស់នៅតំបន់កោះរ៉ុងទាំងអស់ នឹងមានការសហការគ្នាការពារតំបន់ឧទ្យានជាតិ សមុទ្រកោះរ៉ុងទាំងអស់គ្នា។ ប៉ុន្តែបើសិនជាខ្លឹមសារអនុក្រឹត្យនេះ វាមានតែនៅលើក្រដាស ហើយការចាត់ចែងអនុវត្តជាក់ស្ដែង វាអត់មានអនុវត្ត ឬធ្វើទៅតាមគោលបំណង និងខ្លឹមសារនៃអនុក្រឹត្យនេះ ដូច្នេះដីនៅតំបន់ឧទ្យានជាតិសមុទ្រកោះរ៉ុងនេះ វានឹងអាចប្រឈមនឹងការបាត់បង់នៅថ្ងៃណាមួយនាថ្ងៃអនាគត។ ក្រៅពីនេះ ក៏ចង់ឲ្យមានការរឹតបន្តឹងផងដែរ ពាក់ព័ន្ធទៅនឹងបុគ្គលដែលបានធ្វើសកម្មភាពខុសច្បាប់ និងសំណូមពរដល់អាជ្ញាធរ ស្នើឲ្យដាក់ផ្ទាំងប៉ាណូធំៗ នៅតាមតំបន់ដែលត្រូវអភិរក្សការពារទាំងអស់ហ្នឹង»។
កាលពីថ្ងៃទី៨ ខែកុម្ភៈ ឆ្នាំ២០១៨ លោក ហ៊ុន សែន បានចេញអនុក្រឹត្យ សម្រេចបង្កើតឲ្យមានជាឧទ្យានជាតិសមុទ្រកោះរ៉ុង នៅទីតាំងមួយចំនួននាខេត្តព្រះសីហនុ និងកោះកុង រួមមាន៖ កោះរ៉ុង កោះរ៉ុងសន្លឹម កោះកូន កោះតូច កោះតាទៀម កោះម្នាស់ក្រៅ កោះម្នាស់ក្នុង និងសមុទ្រជុំវិញតំបន់ទាំងនេះ មានផ្ទៃដីសរុប ជាង ៥ម៉ឺន ២ពាន់ ហិកតារ (៥២.៤៤៨)។ ក្នុងនោះមានផ្ទៃដីទំហំ ជាង ៥ពាន់ហិកតារ (៥.៣១១) និងផ្ទៃទឹកសមុទ្រទំហំជាង ៤ម៉ឺន ៧ពាន់ហិកតារ (៤៧.១៣៧)។
ការបង្កើតនេះដើម្បីធានាថែរក្សា និងការពារសោភណភាពធម្មជាតិ វប្បធម៌ ប្រព័ន្ធអេកូឡូស៊ី និងជីវៈចម្រុះលើកោះ និងបរិវេណសមុទ្រជុំវិញ។ ផ្ដល់ផលិតផល និងសេវាកម្មធម្មជាតិ សម្រាប់ការប្រើប្រាស់ប្រកបដោយនិរន្តរភាព។ រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ។ លើកកម្ពស់ការចូលរួម របស់សហគមន៍មូលដ្ឋានក៏ដូចជាសាធារណជន ក្នុងការរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់៕