សមត្ថកិច្ចខែត្រកំពង់ចាមនៅពុំទាន់បញ្ជូនយុវជនដែលរិះគន់ប្រមុខរដ្ឋាភិបាល តាមបណ្ដាញសង្គមហ្វេសបុកទៅតុលាការនៅឡើយទេ នៅរសៀលថ្ងៃទី៩ កុម្ភៈ។ យុវជនដែលត្រូវសមត្ថកិច្ចចាប់ខ្លួននោះ ឈ្មោះ សាន់ រដ្ឋា ដែលតែងបង្ហោះវីដេអូ រិះគន់ការដឹកនាំរបស់លោក ហ៊ុន សែន ត្រូវបានកងរាជអាវុធហត្ថខែត្រកំពង់ចាម ចាប់ខ្លួនកាលពីព្រឹកថ្ងៃទី៨ កុម្ភៈ ដោយគ្មានដីកាពីតុលាការ។
ក្រុមគ្រួសារយុវជនដែលរិះគន់លោកនាយករដ្ឋមន្ត្រី ហ៊ុន សែន តាមបណ្ដាញសង្គមហ្វេសប៊ុក ឲ្យដឹងនៅថ្ងៃទី៩ កុម្ភៈ ថា មកទល់ពេលនេះសមត្ថកិច្ចកំពុងឃុំខ្លួនយុវជន សាន់ រដ្ឋា នៅបន្ទាយកងរាជអាវុធហត្ថខែត្រកំពង់ចាមនៅឡើយ និងគ្រោងបញ្ជូនទៅសាលាដំបូងខែត្រកំពង់ចាមនៅពេលឆាប់ៗនេះ។
ស្ត្រីដែលត្រូវជាម្ដាយយុវជនរូបនោះរស់នៅស្រុកជើងព្រៃ ខែត្រកំពង់ចាម លោកស្រី សាន ណម វ័យ ៦៦ឆ្នាំ រំឭកថា កាលពីព្រឹកថ្ងៃទី៨ កុម្ភៈ សមត្ថកិច្ចកងរាជអាវុធហត្ថប្រដាប់ដោយអាវុធមួយក្រុម បានចាប់ខ្លួនមនុស្សប្រុសស្រី ក្នុងផ្ទះដោយគ្មានដីកាពីតុលាការ និងចោទថា ពាក់ព័ន្ធគ្រឿងញៀន ក៏ប៉ុន្តែក្រោយមកគេបង្វែរសំណុំរឿងនេះ គឺជារឿងនយោបាយវិញ។ លោកស្រីចាត់ទុកការចាប់ខ្លួននេះ គឺជារឿងអយុត្តិធម៌។ «»
យុវជន សាន់ រដ្ឋា វ័យជាង ៣០ឆ្នាំ ជាកម្មករលីសែងនៅប្រទេសថៃ បានវិលមកស្រុកកំណត់វិញកាលពីសប្ដាហ៍មុន ដើម្បីរៀបអាពាហ៍ពិពាហ៍នៅក្រុងប៉ោយប៉ែតខែត្របន្ទាយមានជ័យ ក៏ប៉ុន្តែលោកត្រូវបានសមត្ថកិច្ចចាប់ខ្លួននៅថ្ងៃចូលរោងការ។ យុវជនរូបនេះតែងបង្ហោះវីដេអូឃ្លីប រិះគន់ការដឹកនាំរបស់លោកនាយករដ្ឋមន្ត្រី ហ៊ុន សែន ដែលធ្វើទុក្ខបុកម្នេញលើគណបក្សជំទាស់ និងរិះគន់ការរំលាយបក្សសង្គ្រោះជាតិ ដែលលោកចាត់ទុកថា ជាការធ្វើរដ្ឋប្រហារលទ្ធិប្រជាធិបតេយ្យ និងមើលងាយឆន្ទៈពលរដ្ឋ។ ក៏ប៉ុន្តែមួយរយៈក្រោយមក បន្ទាប់ពីរដ្ឋាភិបាលរំលាយបក្សសង្គ្រោះជាតិ គេពុំសូវឃើញយុវជនរូបនោះ បង្ហោះវីដេអូឃ្លីបដូចមុនៗនោះទេ។
កាលពីខែវិច្ឆិកា ឆ្នាំ២០១៧ លោកបានបង្ហោះវីដេអូច្រើនឃ្លីប នៅគ្រាដែលរដ្ឋាភិបាលគ្រោងរំលាយបក្សប្រឆាំង ហើយលោកបានអំពាវនាវឲ្យកូនខ្មែរសាមគ្គីគ្នា ដើម្បីសង្គ្រោះលទ្ធិប្រជាធិបតេយ្យនៅកម្ពុជា។ «»
ប៉ុន្តែក្រោយមកទៀត យុវជន សាន់ រដ្ឋា បានបង្ហាញវីដេអូឃ្លីបមួយតាមបណ្ដាញសង្គម សុំទោសប្រមុខរដ្ឋាភិបាល ដែលដឹកនាំដោយលោកនាយករដ្ឋមន្ត្រី ហ៊ុន សែន ហើយ អំពាវនាវឲ្យលោក ហ៊ុន សែន អនុគ្រោះ។
អាស៊ីសេរីមិនអាចរកប្រភពទាក់ទងតំណាងអយ្យការខែត្រកំពង់ចាម ដើម្បីសុំការបំភ្លឺករណីនេះបានទេ នៅថ្ងៃទី៩ កុម្ភៈ។ គូដណ្ដឹងយុវជន សាន់ រដ្ឋា រស់នៅក្រុងប៉ោយប៉ែត ខែត្របន្ទាយមានជ័យ កញ្ញា ឡម ដានីស សម្ដែងអារម្មណ៍ តក់ស្លុតយ៉ាងខ្លាំង នៅគ្រាដែលសមត្ថកិច្ចចាប់ខ្លួនកូនកម្លោះ ក្នុងថ្ងៃចូលរោងការ ធ្វើឲ្យកញ្ញាខ្មាសអៀនមិត្តភ័ក្ដិ និងញត្តិជិត-ឆ្ងាយរាប់រយនាក់ ដែលបានអញ្ជើញឲ្យចូលរួមកម្មវិធីមង្គលការ ក៏ប៉ុន្តែត្រូវខកបំណង។ កញ្ញាអំពាវនាវឲ្យរដ្ឋាភិបាលមេត្តាដោះលែង យុវជន សាន់ រដ្ឋា ឲ្យមានសេរីភាពវិញ ដោយគ្រាន់តែអប់រំណែនាំគាត់ឲ្យបញ្ឈប់ និងសុំទោសថ្នាក់ដឹកនាំ។ «»
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សឹង សែនករុណា ពន្យល់ថា តាមច្បាប់ ការចុះចាប់ខ្លួនអាចធ្វើទៅបាន លុះត្រាតែជាបទល្មើសជាក់ស្ដែង ក៏ប៉ុន្តែបើពុំមែនជាបទល្មើសជាក់ស្ដែងទេ សមត្ថកិច្ចគួរតែមានដីកាពីតុលាការ និងបង្ហាញពីបទល្មើស ដែលជននោះបានប្រព្រឹត្ត។ លោកបារម្ភថា បើការចាប់ខ្លួនមិនស្របច្បាប់ និងចេះតែធ្វើតាមទំនើងចិត្ត នឹងប៉ះពាល់យ៉ាងខ្លាំងដល់សិទ្ធិសេរីភាពប្រជាពលរដ្ឋ ជាពិសេសគឺចំថ្ងៃដែលយុវជនរូបនោះរៀបអាពាហ៍ពិពាហ៍ផង។ «»
លោក សឹង សែនករុណា បន្ថែមថា សមត្ថកិច្ចរដ្ឋាភិបាលគួរពិចារណាចំពោះវីដេអូឃ្លីបចុងក្រោយ ដែលយុវជនរូបនោះបង្ហោះសុំទោសថ្នាក់ដឹកនាំកាលពីពេលថ្មីៗនេះ។ លោកបន្ថែមថា កម្ពុជាបានទទួលស្គាល់ការគោរពធម្មនុញ្ញអង្គការសហប្រជាជាតិ ហើយរដ្ឋធម្មនុញ្ញនៃព្រះរាជាណាចក្រកម្ពុជា បានការពារសិទ្ធិសេរីភាពបញ្ចេញមតិរបស់ពលរដ្ឋគ្មានដែនកំណត់។
មាត្រា ៣១ នៃរដ្ឋធម្មនុញ្ញចែងថា កម្ពុជាទទួលស្គាល់ និងគោរពសិទ្ធិមនុស្សដូចមានចែងក្នុងធម្មនុញ្ញនៃអង្គការសហប្រជាជាតិ សេចក្ដីប្រកាសជាសកលស្ដីពីសិទ្ធិមនុស្ស និងកតិកាសញ្ញា ព្រមទាំងអនុសញ្ញាទាំងឡាយណាទាក់ទិនសិទ្ធិមនុស្ស សិទ្ធិនារី និងសិទ្ធិកុមារ ដែលកម្ពុជា ទទួលស្គាល់ថា ជាច្បាប់កម្ពុជា។
កតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយមាត្រា១៩ ចែងថា ជនគ្រប់រូបមានសិទ្ធិប្រកាន់មតិយោបល់ដោយគ្មានការជ្រៀតជ្រែក ហើយជនគ្រប់រូបមានសិទ្ធិសេរីភាពក្នុងការបញ្ចេញមតិ។ សិទ្ធិនេះត្រូវបានរាប់បញ្ចូលទាំងសេរីភាពស្រាវជ្រាវព័ត៌មានទទួល និងផ្សព្វផ្សាយព័ត៌មាន និងគំនិតសព្វបែបយ៉ាងដោយមិនគិតពីព្រំដែនដោយផ្ទាល់មាត់ សរសេរ ឬបោះពុម្ពតាមទម្រង់សិល្បៈក្ដី ឬក៏ដោយមធ្យោបាយផ្សព្វផ្សាយដទៃទៀតក្ដីតាមការជ្រើសរើសរបស់ខ្លួន៕