អាជ្ញាធរថៃបន្តរឹតបន្តឹងការលក់ដូរទំនិញចម្លងកម្មសិទ្ធិបញ្ញាទៅលើអាជីវករខ្មែរនៅផ្សាររ៉ុងក្លឿ ស្រុកអារញ្ញ ខេត្តស្រះកែវ កាន់តែខ្លាំង។ ការរឹងបន្តឹងនេះធ្វើឲ្យអាជីវករខ្មែរចំនួនប្រឈមមុខនឹងការបោះបង់ការលក់ដូររបស់ខ្លួន ដោយសារលក់មិនដាច់ ព្រោះមិនសូវមានភ្ញៀវចូលទិញទំនិញដូចពេលមុនៗ។
អាជីវករខ្មែរនៅផ្សាររ៉ុងក្លឿ លើកឡើងថា ការលក់ដូរនៅផ្សាររ៉ុងក្លឿ របស់ថៃសព្វថ្ងៃមានភាពស្ងប់ស្ងាត់កាន់តែខ្លាំង គឺខុសពីពេលដែលអាជ្ញាធរថៃមិនទាន់ចុះចាប់ទំនិញចម្លងកម្មសិទ្ធិបញ្ញា។
អាជីវករខ្មែរលក់ដូរនៅផ្សាររ៉ុងក្លឿ អ្នកស្រី ចាន់ សាវឹន ឲ្យដឹងនៅថ្ងៃទី១០ កុម្ភៈ ថា សមត្ថកិច្ចថៃតែងចុះត្រួតពិនិត្យទំនិញចម្លងកម្មសិទ្ធិបញ្ញា នៅផ្សាររ៉ុងក្លឿ ជារៀងរាល់ថ្ងៃ ហើយធ្វើឲ្យអាជីវករនៅក្នុងផ្សារមួយនេះលក់ទំនិញមិនដាច់ ដោយថ្ងៃខ្លះលក់ទំនិញមិនបានប្រាក់កម្រៃ ៣ម៉ឺនរៀល(៣០,០០០)នោះទេ។ អាជីវកររូបនេះ អះអាងថា កាលពីសមត្ថកិច្ចថៃមិនទាន់ចុះចាប់ទំនិញចម្លងកម្មសិទ្ធិបញ្ញាគឺពួកគាត់អាចលក់ទំនិញបានប្រាក់កម្រៃប្រមាណ ពី១ពាន់ ទៅ ៥ពាន់បាត ឬប្រមាណ ១២ម៉ឺន ទៅ៦០ម៉ឺនរៀល ក្នុងមួយថ្ងៃ៖ «វាប៉ះពាល់ខ្លាំងតែម្ដង អ្នកខ្លះលក់បង់តែថ្លៃតូបមិនបានផង មួយខែៗដូចខ្ញុំអីចឹងប៉ះណាខាតថ្លៃតូបទៅខែខ្លះរួចខ្លួនទៅ វាខុសគ្នាកាលពីមុនខ្លាំងតែម្ដង កាលពីមុនយើងលក់បានរហូត ទោះតែមិនដាច់ក៏គ្រាន់ជាងឥឡូវដែរ តែឥឡូវតឹងណាស់»។
អ្នកស្រីបន្ថែមថា អាជីវករខ្លះបានក្ស័យធនបណ្ដើរៗហើយ ព្រោះគ្មានប្រាប់បង់ថ្លៃដើមទុនដែលបានទិញទំនិញជំពាក់ពីម៉ូយ ដោយសារលក់មិនដាច់ព្រោះមិនសូវមានភ្ញៀវជនជាតិថៃចូលទិញទំនិញដោយសារតែ គឺខ្លាចសមត្ថកិច្ចថៃចុះចាប់ទំនិញចម្លងកម្មសិទ្ធិបញ្ញា។ ទាក់ទងនឹងបញ្ហានេះអភិបាលក្រុងប៉ោយប៉ែត លោក សាន ស៊ានហូ មានប្រសាសន៍ថា សព្វថ្ងៃសមត្ថកិច្ចថៃពិតជាបន្តរឹតបន្តឹងការត្រួតពិនិត្យទំនិញចម្លងកម្មសិទ្ធិបញ្ញានៅផ្សាររ៉ុងក្លឿ ប្រាកដមែន។ លោកអះអាងថា ការធ្វើបែបនេះដោយសារក្រុមអាជីវករខ្មែរលួចលក់ទំនិញខុសច្បាប់របស់ថៃ ប៉ុន្តែលោកថា អាជីវករមួយចំនួនបានងាកមកលក់ទំនិញតាមប្រព័ន្ធអ៊ីនធឺណិតហើយផ្ញើទំនិញតាមប្រៃសណីយ៍បានខ្លះដែរ ក៏ប៉ុន្តែមិនបានច្រើននោះទេ៖ «ខ្ញុំព្យាយាមដែរជាមួយអាជ្ញាធរថៃ ជាពិសេសខ្ញុំតែងជួបជាមួយលោកអភិបាលស្រុកអារញ្ញ ថាជួយៗមើលបងប្អូនដែលលក់ដូរនៅផ្សារថៃនេះ គាត់លក់ដូរក៏បង់ចំណូលពន្ធចូលថៃក៏ច្រើនដែរ ដូច្នេះបើមានអីឲ្យបន្ធូរបន្ថយជួយមើលៗផង។ យើងក៏មិនហ៊ានលូកអីជ្រៅដែរចំពោះច្បាប់ប្រទេសគេនោះ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក(Adhoc) ខេត្តបន្ទាយមានជ័យ លោក ស៊ុំ ច័ន្ទគា លើកឡើងថា ការរឹងបន្តឹងទំនិញកម្មសិទ្ធិបញ្ញានេះគឺជាការយកចិត្តទុកដាក់ខ្ពស់របស់សមត្ថកិច្ចថៃ ព្រោះដើម្បីរក្សាសេដ្ឋកិច្ច និងសុខភាពប្រជាពលរដ្ឋរបស់ប្រទេសគេ។ លោក ស៊ុំ ច័ន្ទគា ជំរុញឲ្យអាជ្ញាធរខ្មែរត្រូវត្រួតពិនិត្យទំនិញខូចគុណភាព ដែលនាំចូលពីប្រទេសជិតខាងដូចដែលថៃចាប់ទំនិញរបស់អាជីវករដែរ៖ «គេគ្រាន់តែខោអាវគេគិតដូច្នេះ ការដែលបាត់បង់ការដែលខាតរបស់ខ្មែរយើង អ្នកផ្សាររ៉ុងក្លឿនឹង គឺលង់ខ្លួនដោយសារពួកគាត់យកទំនិញចម្លងកម្មសិទ្ធិបញ្ញាតម្លៃរាប់លានបាត យកទៅលក់ដើម្បីគិតថា បានផលចំណេញ ហើយខ្ចីលុយពីធនាគារផង ប៉ុន្តែដល់គេចាប់ទៅខ្លះបើកអត់រួច»។
នៅផ្សាររ៉ុងក្លឿ មានតូបលក់ដូរប្រមាណ ៧ពាន់តូប ក្នុងនោះប្រមាណ ៩៥ភាគរយជាតូបលក់ដូររបស់អាជីវករខ្មែរ។ សមត្ថកិច្ចថៃចាប់ផ្ដើមត្រួតពិនិត្យទំនិញចម្លងកម្មសិទ្ធិបញ្ញា នៅផ្សារមួយនេះតាំងពីឆ្នាំ២០១៦ ជាបន្តបន្ទាប់មក។ ចំពោះទំនិញដែលថៃចុះចាប់ដូចជាស្បែកជើងសំលៀកបំពាក់ឧបករណ៍ក្មេងលេង និងនាឡិកាដៃជាដើម ហើយទំនិញទាំងនេះភាគច្រើននាំចូលពីប្រទេសចិន និងវៀតណាម ដែលលួចចម្លងម៉ាកយីហោល្បីៗ ដូចជាអាឌីដាស (Adidas) និងណៃ (Nike) ជាដើម៕