អង្គការអន្តរជាតិ និងអង្គការជាតិ ថ្កោលទោសសេចក្ដីសម្រេចរបស់តុលាការកំពូល ដែលតម្កល់សាលដីការបស់សាលាឧទ្ធរណ៍ ដោយផ្ដន្ទាទោសអ្នកស្រី ទេព វន្នី តំណាងសហគមន៍បឹងកក់ ជាប់ពន្ធនាគារ ២ឆ្នាំកន្លះដដែល ទាក់ទិននឹងករណីបង្ករបួសស្នាមនៅក្បែរវិមានឯករាជ្យ ជិតផ្ទះនាយករដ្ឋមន្ត្រី កាលពីជិតប្រាំឆ្នាំមុន។ ចំណែកឯពលរដ្ឋបឹងកក់ ចាត់ទុកការសម្រេចនេះ ថាជារឿងអយុត្តិធម៌។
អង្គការលើកលែងទោសអន្តរជាតិ (Amnesty International) ថាតុលាការកម្ពុជា ប្រព្រឹត្តកំហុសធ្ងន់ធ្ងរក្នុងរឿងក្ដីអ្នកស្រី ទេព វន្នី។ នាយកអង្គការលើកលែងទោសអន្តរជាតិ ប្រចាំតំបន់អាស៊ី និងប៉ាស៊ីហ្វិក លោក ចេមស៍ ហ្គោម៉េស (James Gomez) ថ្លែងនៅក្នុងសេចក្ដីថ្លែងការណ៍កាលពីថ្ងៃទី៧ ខែកុម្ភៈ ថា ការសម្រេចសេចក្ដីក្នុងរឿងក្ដីអ្នកស្រី ទេព វន្នី នៅពេលនេះ រឹតតែបង្ហាញកាន់តែច្បាស់ថា ប្រព័ន្ធតុលាការកម្ពុជា គ្មានភាពឯករាជ្យ ដែលសម្រេចរឿងក្តីទៅតាមតែបញ្ជារបស់រដ្ឋាភិបាលប៉ុណ្ណោះ។ លោក ចេមស៍ ហ្គោម៉េស ថ្លែងបន្តថា កំហុសឆ្គងធ្ងន់ធ្ងរផ្នែកនីតិវិធីព្រហ្មទណ្ឌប្រឆាំងអ្នកស្រី ទេព វន្នី មានចាប់តាំងពីដើមទីមកម្ល៉េះ ដោយសារតែអ្នកស្រីជានិមិត្តរូបនៃក្រុមអ្នកហ៊ានក្រោកតស៊ូប្រឆាំងអំពើអយុត្តិធម៌ដែលធ្វើឲ្យអាជ្ញាធររដ្ឋាភិបាលលោក ហ៊ុន សែន មិនចង់ឲ្យមានសកម្មភាពតវ៉ាដូច្នេះតទៅទៀតនោះឡើយ។
លោក ចេមស៍ ហ្គោម៉េស អំពាវនាវឲ្យពលរដ្ឋទាំងអស់ ទាំងនៅក្នុង និងក្រៅប្រទេស ត្រូវភ្ញាក់ឡើងតវ៉ាប្រឆាំងទៅនឹងទង្វើរបស់រដ្ឋាភិបាលលោក ហ៊ុន សែន និងដាក់សម្ពាធរដ្ឋាភិបាលនេះ ឲ្យបញ្ឈប់ការធ្វើទុក្ខបុកម្នេញទាំងនេះតទៅទៀត ត្រូវគោរពសិទ្ធិមនុស្ស និងដោះលែងអ្នកស្រី ទេព វន្នី ជាបន្ទាន់ និងដោយឥតលក្ខខណ្ឌ។
អង្គការសង្គមស៊ីវិលចំនួន ៣៤ ក៏បានចេញសេចក្ដីថ្លែងការណ៍រួមគ្នាមួយជំទាស់ទៅនឹងសេចក្ដីសម្រេចបន្តដាក់ពន្ធនាគារអ្នកស្រី ទេព វន្នី បែបនេះ។ អង្គការសង្គមស៊ីវិលដែលរួមមានមជ្ឈមណ្ឌលសិទ្ធិមនុស្សកម្ពុជា ក្រុមអ្នកច្បាប់ការពារសិទ្ធិកម្ពុជា អង្គការសីលការ និងសមាគមអាដហុក ផងដែរនោះ បានចេញសេចក្ដីថ្លែងការណ៍រួមគ្នាមួយក្នុងថ្ងៃជាមួយគ្នានឹងសេចក្ដីសម្រេចរបស់តុលាការកំពូលនេះ ដោយសម្ដែងការសោកស្ដាយចំពោះសេចក្ដីសម្រេចរបស់តុលាការកំពូល ក្នុងការតម្កល់ការផ្ដន្ទាទោសអ្នកស្រី ទេព វន្នី ដែលគ្រាន់តែចូលរួមតវ៉ាដោយសន្តិវិធី និងមិនគួរណាជាប់ឃុំក្នុងពន្ធនាគារ ដោយសារតែការពារសិទ្ធិទទួលបានលំនៅឋានសមស្របរបស់សហគមន៍អ្នកស្រី និងអនុវត្តសិទ្ធិជាមូលដ្ឋានក្នុងការបញ្ចេញមតិ សិទ្ធិខាងសមាគម និងសិទ្ធិជួបប្រជុំនោះសោះ។ អង្គការសង្គមស៊ីវិលទាំង ៣៤ នេះ អំពាវនាវឲ្យអាជ្ញាធរពាក់ព័ន្ធពិនិត្យសំណុំរឿងនេះឡើងវិញ ដើម្បីរកយុត្តិធម៌ជូនអ្នកស្រី ទេព វន្នី និងត្រូវដោះលែងអ្នកស្រីឲ្យមានសេរីភាពវិញ។
អ្នកស្រី ទេព វន្នី ត្រូវបានអាជ្ញាធរចោទថា បានបង្ករបួសស្នាមទៅលើសន្តិសុខខណ្ឌដូនពេញ ២នាក់។ អ្នកស្រីជាប់ពន្ធនាគារ ៥៤២ថ្ងៃហើយ គិតត្រឹមថ្ងៃទី៨ ខែកុម្ភៈ។ អាជ្ញាធរបានចាប់ និងឃុំខ្លួនអ្នកស្រីតាំងពីខែសីហា ឆ្នាំ២០១៦ មកម្ល៉េះ គឺចាប់ខ្លួនពេលអ្នកស្រីកំពុងធ្វើយុទ្ធនាការថ្ងៃចន្ទពណ៌ខ្មៅ ទាមទារឲ្យដោះលែងមន្ត្រីអាដហុក (ADHOC) ៤រូប និងមន្ត្រី គ.ជ.ប ១រូប រួមទាំងជំរុញឲ្យរដ្ឋាភិបាលវែកមុខរកអ្នកនៅពីក្រោយការបាញ់សម្លាប់លោកបណ្ឌិត កែម ឡី។ មន្ត្រីអាដហុក ៤រូប និងមន្ត្រី គ.ជ.ប ១រូបនោះ ត្រូវបានតុលាការដោះលែងកាលពីខែកក្កដា ឆ្នាំ២០១៧ ហើយ នៅឡើយតែអ្នកស្រី ទេព វន្នី។
អ្នកស្រី ទេព វន្នី បានប្រាប់តុលាការម្ដងហើយម្ដងទៀតថា គាត់មិនបានប្រព្រឹត្តដូចការចោទប្រកាន់ទេ។ ពួកគាត់ទៅទាមទារតវ៉ាមានគ្នាប្រមាណ ៣០នាក់ និងមានត្រឹមបដា និងផ្កាឈូកប៉ុណ្ណោះ គ្មានដុំថ្ម ហើយក៏មិនបានប្រើហិង្សាលើក្រុមសន្តិសុខនោះឡើយ។ ផ្ទុយទៅវិញ មានតែក្រុមសន្តិសុខទៅវិញទេ ដែលប្រព្រឹត្តហិង្សាមកលើពួកគាត់រហូតធ្វើឲ្យបាតុករបាក់ដៃ បាក់ធ្មេញ និងរបួសច្រើនទៀតនៅក្នុងហេតុការណ៍នោះ។
អ្នកស្រី ទេព វន្នី អះអាងថា ការសុំឲ្យមានការដោះលែងអ្នកស្រី ក៏ដោយសារមូលហេតុថា កូនស្រីអាយុ ១៤ឆ្នាំរបស់អ្នកស្រីមានបញ្ហារលាកខួរក្បាល សន្លប់ញឹកញាប់ ឯម្ដាយវះភ្នែកទាំងសងខាងគ្មានអ្នកស្រីនៅក្បែរដើម្បីបាននៅជួយមើលថែ។
ប្រធានគ្រប់គ្រងផ្នែកអង្កេតអង្គការលីកាដូ លោក អំ សំអាត សម្ដែងការសោកស្ដាយចំពោះសាលដីការបស់តុលាការកំពូល ព្រោះថា សាលាដំបូង និងសាលាឧទ្ធរណ៍គ្មានភស្តុតាងច្បាស់លាស់សម្រាប់ដាក់បន្ទុកលើអ្នកស្រី ទេព វន្នី នោះទេ៖ «យើងមើលទៅលើជនរងគ្រោះ ដែលអះអាងថា រងរបួសដោយអ្នកស្រី ទេព វន្នី វាកាន់តែខុសគ្នាទៅទៀត ព្រោះម្នាក់ៗទម្ងន់ពី ៨០ ទៅជិត ១០០គីឡូក្រោម ហើយអ្នកស្រីតូចមួយ តើវាអាចទៅរួចទេ? ហើយទីពីរ មិនមានអ្នកណាចង្អុលបង្ហាញថា អ្នកស្រី ទេព វន្នី បានស្រែកបញ្ជា ឬប្រព្រឹត្តនូវអំពើហិង្សានោះទេ»។
លោក អំ សំអាត យល់ថា ការសម្រេចផ្ដន្ទាទោសលើអ្នកស្រី ទេព វន្នី របស់តុលាការទាំងបីជាន់ថ្នាក់នេះ ដោយសារតែអ្នកស្រី ទេព វន្នី គឺជាសកម្មជនដីធ្លីដ៏សកម្មនៅក្នុងតំបន់បឹងកក់ និងតែងតែចេញតវ៉ាទាមទារដំណោះស្រាយដីធ្លីដោយសន្តិវិធី ម្ល៉ោះហើយទើបអ្នកស្រីត្រូវបានគេចាប់ដាក់ពន្ធនាគារម្ដងហើយម្ដងទៀតដូច្នេះ៕