Clik here to view.
លោកនាយករដ្ឋមន្ត្រី ហ៊ុន សែន នៅក្នុងដំណាក់កាលចុងក្រោយនេះ បានប្រកាសថា សុខភាពរបស់លោកល្អ ហើយលោកនឹងបន្តកាន់អំណាចរយៈពេល ១០ឆ្នាំទៅមុខទៀតបាន។ ក៏ប៉ុន្តែលោក សម រង្ស៊ី ប្រធានចលនាសង្គ្រោះជាតិ ថា លោក ហ៊ុន សែន បានដឹកនាំប្រទេសបែបអានាធិបតេយ្យ ហើយល្មមផ្ទេរអំណាចឲ្យក្មេងជំនាន់ក្រោយដឹកនាំវិញប្រសើរជាង។
លោកនាយករដ្ឋមន្ត្រី ហ៊ុន សែន បញ្ជាក់ជាថ្មីម្ដងទៀតថា សុខភាពរបស់លោកល្អ ទោះបីជាលោកស្រកទម្ងន់បន្តិចក្ដី តែលោកអះអាងថា លោកនៅតែរឹងមាំដើម្បីដឹកនាំប្រទេសបន្តទៅទៀត។ លោក ហ៊ុន សែន ប្រកាសកាលពីថ្ងៃទី៧ កុម្ភៈ ថា ទោះបីជាមនុស្សមួយចំនួនចង់ឲ្យលោកឆាប់ស្លាប់ ក៏ប៉ុន្តែនៅមនុស្សមួយចំនួនទៀតក៏ចង់ឲ្យលោករស់បានយូរដែរ៖ «មានអ្នកស្រលាញ់រាប់អានសួរថា គាត់ឈឺទេដែលស្គមអ៊ីចឹង? អត់ឈឺទេ តែប៉ុន្មានថ្ងៃមុនពេលឡើងគ្រែឈឺពោះ មកចុះហត្ថលេខាអត់ឈឺ មកធ្វើការអត់ឈឺពោះ។ គ្រូពេទ្យសិង្ហបុរី គេប្រាប់ពូឲ្យសម្រកទម្ងន់ កម្ពស់ ១,៧០ គេឲ្យមានទម្ងន់ ៦៨ ទៅ ៧០គីឡូ តែឥឡូវ ៧២កន្លះ»។
នៅគ្រាលោក ហ៊ុន សែន សម្រកទម្ងន់ ហើយអះអាងថា ដើម្បីសុខភាពនេះ លោក ហ៊ុន សែន ហាក់បីដូចជាខំប្រឹងប្រែងគ្រប់មធ្យោបាយ ដើម្បីបន្តកាន់កាប់អំណាចទៅមុខទៀត ហើយក្រៅពីលោកខំប្រឹងសម្រកទម្ងន់តាមវេជ្ជបញ្ជានោះ លោកក៏ខិតខំប្រឹងតែងតាំងកូនចៅ និងបក្សពួករបស់លោកទាំងនៅក្នុងជួរគណបក្ស ជួរកងទ័ព និងតាមស្ថាប័នស៊ីវិលដដទៃទៀតដែរ។ នៅក្នុងរបាយការណ៍របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានសរសេរថា លោក ហ៊ុន សែន ត្រូវដាក់បញ្ចូលក្នុងចំណោមអ្នកដឹកនាំដែលឋិតក្នុងតំណែងតាមរយៈការប្រើប្រាស់អំពើហិង្សាក្នុងចេតនានយោបាយគ្រប់គ្រងកងកម្លាំងប្រដាប់អាវុធគៃបន្លំការបោះឆ្នោត ប្រព្រឹត្តអំពើពុករលួយធ្ងន់ធ្ងរ និងមានការគាំទ្រពីបរទេសគឺរដ្ឋាភិបាលទីក្រុងហាណូយ ដែលជ្រើសរើសលោកអោយកាន់តំណែង និងអាចបន្តតំណែងទៅមុខទៀត។
ក៏ប៉ុន្តែនៅក្នុងការដឹកនាំរបស់លោកជាង ៣០ឆ្នាំមកនេះ លោកបានដឹកនាំពាក់ព័ន្ធនឹងការរំលោភសិទ្ធិមនុស្សដ៏ធ្ងន់ធ្ងរ រួមមានអំពើកាប់សម្លាប់ក្រៅច្បាប់ ទារុណកម្ម ការចាប់ឃុំខ្លួន ត្រួតត្រា រារាំងសេរីភាពសមាគម ការជួបប្រជុំ និងការបង្កើតបណ្ដាញស៊ើបការណ៍ រាយការណ៍នៅពេញប្រទេសក្នុងគោលបំណងបំភិតបំភ័យ បំភ័ន្តសាធារណមតិ។ យុទ្ធសាស្ត្រចម្បងជាងគេរបស់លោក ហ៊ុន សែន គឺការគំរាមកំហែង និងប្រើប្រាស់កម្លាំង។ ក្រៅពីនេះទៀត ក៏មានករណីសម្លាប់សកម្មជននយោបាយបក្សប្រឆាំង អ្នកសារព័ត៌មាន មេដឹកនាំសហជីពជាច្រើននាក់ត្រូវបានសម្លាប់ដោយចេតនានយោបាយ។ ករណីខ្លះដែលឃាតកត្រូវគេស្គាល់ ប៉ុន្តែពុំត្រូវស៊ើបអង្កេតចោទប្រកាន់ ឬដាក់ទោសឡើយ។
ទាក់ទងនឹងបញ្ហានេះ លោក សម រង្ស៊ី ស្ថាបនិកចលនាសង្គ្រោះជាតិ បានហៅលោក ហ៊ុន សែន ដឹកនាំប្រទេសបែបអនាធិបតេយ្យ ហើយជាមេដឹកនាំកំសាក ដែលប្រើប្រាស់តុលាការជាឧបករណ៍របស់ខ្លួនដើម្បីកម្ចាត់ដៃគូប្រកួត។ លោក សម រង្ស៊ី អះអាងថា លោកគ្មានចង់បានអ្វីក្រៅពីចង់សង្គ្រោះកម្ពុជា ចេញពីរបបលោក ហ៊ុន សែន ដែលដឹកនាំប្រទេសបំផ្លិចបំផ្លាញជាតិ តាមរយៈការបោះឆ្នោតបែបប្រជាធិបតេយ្យនោះឡើយ។ លោក សម រង្ស៊ី បន្ថែមថា លោក ហ៊ុន សែន គួរតែដឹងថា ប្រជាពលរដ្ឋភាគច្រើនមិនគាំទ្រការដឹកនាំរបស់លោកបែបអនាធិបតេយ្យនៅក្នុងសង្គមដែលពលរដ្ឋមានការយល់ដឹងខ្ពស់ ហើយចង់បានសង្គមមួយបែបស៊ីវិល័យដូចប្រទេសកំពុងតែអភិវឌ្ឍន៍ដទៃទៀតនោះ។ ក៏ប៉ុន្តែហេតុអ្វីបានជាលោក ហ៊ុន សែន មិនទទួលយកការពិត ដែលពលរដ្ឋចង់ឲ្យមានគណបក្សសង្គ្រោះជាតិ ចូលរួមការបោះឆ្នោត តាមបែបប្រជាធិបតេយ្យ ដែលមាននិយាម ឬស្តង់ដារត្រឹមត្រូវនោះ?
ទោះបីជាយ៉ាងនេះក្ដី ក្រោយពីរដ្ឋាភិបាលរំលាយគណបក្សសង្គ្រោះជាតិ បានសម្រេចមក ជាញឹកញយ លោក ហ៊ុន សែន តែងតែប្រកាសអំពីសុខភាពរបស់ល្អមាំទាំល្អ ហាក់មិនខ្វល់អំពីការប្រកួតប្រជែងដោយមានការចូលរួមពីគណបក្សសង្គ្រោះជាតិ ទៀតឡើយ។ បន្ថែមពីនេះ លោក ហ៊ុន សែន បានចំអកទៅអ្នកដែលរិះគន់ និងជេរលោកនោះថា បានស្លាប់មុនលោកទៅទៀត។
លោក ហ៊ុន សែន ហាក់ដូចជាចង់សំដៅទៅលោក ស៊ាន ប៉េងសែ ប្រធានគណៈកម្មាធិការព្រំដែន ដែលទទួលមរណភាពនៅប្រទេសបារាំង កាលពីពេលថ្មីៗនេះ ដែលពលរដ្ឋគ្រប់គ្នាស្ដាយស្រណោះលោកនោះ។ តែលោក ហ៊ុន សែន ថា បារមីរបស់លោក ស៊ាន ប៉េងសែ មិនដល់លោកទៅវិញ៖ «មានម្នាក់ដែលទើបងាប់ ៣អាទិត្យមុនហ្នឹង តែខ្ញុំមិនប្រាប់ឈ្មោះទេ មានគ្នាយើងម្នាក់គាត់ថា អាហ្នឹងវាអ៊ីចឹង អ្ហែងជេរសម្ដេចវាងាប់អ៊ីចឹង តែតាមពិតវាអ៊ីចឹងមែន មកពីបារមីវាមិនដល់ខ្ញុំ»។
យ៉ាងណាក៏ដោយ ទោះបីជាលោក ហ៊ុន សែន បានបញ្ហាពីភាពខ្លាំងក្លាទាំងកម្លាំងយោធា ទាំងសុខភាពបែបនេះក្ដី តំណាងរាស្ត្រពីខាងគណបក្សសាធារណរដ្ឋប្រចាំរដ្ឋផ្លរីដា (Florida) និងជាប្រធានអនុគណៈកម្មាធិការកិច្ចការបរទេសទទួលបន្ទុកកិច្ចការតំបន់អាស៊ីប៉ាស៊ីហ្វិក លោក ថិត យ៉ូហូ (Ted Yoho) មានជំនឿថា របបផ្ដាច់ការរបស់លោក ហ៊ុន សែន នឹងដួលរលំឆាប់ៗនេះ ទោះបីជាមានចិន នៅក្រោយខ្នងក្ដី ដោយលោកបានលើកឧទាហរណ៍ពីរបបយោធាភូមា ដែលមានចិន ជាខ្នងបង្អែកដូចគ្នា តែនៅទីបំផុតរបបយោធានេះនៅតែចាញ់គណបក្សប្រឆាំងតាមរយៈការបោះឆ្នោតដ៏ត្រឹមត្រូវមួយ៕