ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃចន្ទ ទី៥ ខែកុម្ភៈ បានកោះហៅអតីតអ្នករាយការណ៍ព័ត៌មានអាស៊ីសេរី មួយរូប គឺលោក អ៊ួន ឈិន ឱ្យចូលឆ្លើយបំភ្លឺបន្ថែមជុំវិញបទចោទប្រកាន់ពីបទលួចផលិតព័ត៌មានបញ្ជូនមករដ្ឋធានីវ៉ាស៊ីនតោន។
នេះជាលើកទីមួយហើយ ដែលតុលាការកោះហៅតែលោក អ៊ួន ឈិន មកឆ្លើយបំភ្លឺតែម្នាក់ឯង។ កន្លងមកតុលាការតែងតែកោះហៅលោក អ៊ួន ឈិន និងលោក យាង សុធារិន្ទ ដែលស្ថិតក្នុងសំណុំរឿងចោទប្រកាន់ជាមួយគ្នានោះមកឆ្លើយបំភ្លឺនៅតុលាការក្នុងពេលជាមួយគ្នា។
មេធាវីការពារក្ដីឱ្យលោក អ៊ួន ឈិន និងលោក យាង សុធារិន គឺលោក កែវ វ៉ាន់នី កាលពីថ្ងៃទី៥ កុម្ភៈ បានឱ្យអាស៊ីសេរី ដឹងថា មូលហេតុដែលតុលាការកោះហៅលោក អ៊ួន ឈិន មកឆ្លើយបំភ្លឺម្នាក់ឯង ដោយសារតែខាងសមត្ថកិច្ចបានបញ្ជូនវីដេអូមួយចំនួនបន្ថែមទៀតទាក់ទងនឹងជាមួយលោក អ៊ួន ឈិន មកតុលាការ ដូច្នេះហើយទើបតុលាការកោះហៅលោក អ៊ួន ឈិន មកឆ្លើយបំភ្លឺបន្ថែម៖ «មើលទៅប្រហែលគេមិនសួរអីច្រើនជាមួយលោក សុធារិន្ទ ទេ ដោយសារខាងតុលាការយល់ឃើញថា វាអត់ពាក់ព័ន្ធអ៊ីខ្លាំងជាមួយគាត់ អ៊ីចឹងបានគេសួរប៉ុណ្ណឹងដូចអស់សេចក្ដីហើយ»។
លោក កែវ វ៉ាន់នី បានឱ្យអាស៊ីសេរី ដឹងថា លោក អ៊ួន ឈិន នៅតែទទូចឱ្យតុលាការទម្លាក់ចោលបទប្រកាន់មកលើខ្លួន ដោយលោកអះអាងថា លោកមិនបានប្រព្រឹត្តបទល្មើសដូចការចោទប្រកាន់របស់តុលាការនោះឡើយ ព្រោះកាលនៅធ្វើការឱ្យវិទ្យុអាស៊ីសេរី លោករាយការណ៍ព័ត៌មានពាក់ព័ន្ធនឹងបញ្ហាដីធ្លី សង្គម ដែលច្បាប់មិនបានហាមឃាត់ឡើយ។
អតីតអ្នករាយការណ៍ព័ត៌មានអាស៊ីសេរី ត្រូវបានតំណាងអយ្យការអមសាលាដំបូងរាជធានីភ្នំពេញ ចោទប្រកាន់ពីបទលួចផលិតព័ត៌មានបញ្ជូនមករដ្ឋធានីវ៉ាស៊ីនតោន តាមមាត្រា ៤៤៥ នៃក្រមព្រហ្មទណ្ឌ។ អ្នកទាំងពីរអាចប្រឈមមុខជាប់ពន្ធនាគារពី ៧ ទៅ ១៥ឆ្នាំ។
ជាមួយគ្នានេះដែរ លោក កែវ វ៉ាន់នី បានឱ្យដឹងបន្តថា លោកបានដាក់ពាក្យស្នើសុំឱ្យតុលាការកោះហៅសាក្សីបន្ថែមទៀតឱ្យចូលឆ្លើយបំភ្លឺនៅថ្ងៃចន្ទ ទី១២ ខែកុម្ភៈ ខាងមុខនេះ។ គោលបំណងដែលលោកស្នើសុំនេះ គឺដើម្បីបញ្ជាក់ជូនតុលាការថា កូនក្ដីទាំងពីររបស់លោកជាមនុស្សស្អាតស្អំ មិនបានប្រព្រឹត្តអំពើល្មើសណាមួយផ្ទុយនឹងច្បាប់ឡើយ។ សាក្សីទាំងនោះរួមមាន ក្រុមគ្រួសារ និងសាច់ញាតិរបស់លោក យាង សុធារិន្ទ។
លោក កែវ វ៉ាន់នី ក៏បានឱ្យដឹងបន្ថែមទៀតថា តុលាការកំពូលមិនទាន់មានចំណាត់ការជុំវិញបណ្ដឹងសុំនៅក្រៅឃុំជាបណ្ដោះអាសន្ននៅឡើយទេ រហូតមកដល់ពេលនេះ។ លោកបានប្ដឹងសាទុក្ខសុំឱ្យតុលាការកំពូលដោះលែងកូនក្ដីលោកឱ្យមានសេរីភាពឡើងវិញ កាលពីចុងខែធ្នូ ឆ្នាំ២០១៧។
អ្នកច្បាប់ជាតិ និងអង្គការអន្តរជាតិអះអាងថា ការចោទប្រកាន់លើអតីតអ្នករាយការណ៍ព័ត៌មានអាស៊ីសេរី ជាការចោទប្រកាន់គ្មានមូលដ្ឋាន និងអយុត្តិធម៌។ មកទល់ថ្ងៃអង្គារ ទី៦ កុម្ភៈ ចូលថ្ងៃទី៨៥ ហើយ ដែលតុលាការបានឃាត់ និងឃុំខ្លួនអ្នកទាំងពីរ៕