ក្រុមហ៊ុនផលិតស្ករអំពៅនៅខេត្តកោះកុង បានហៅពលរដ្ឋ ២គ្រួសារ ដើម្បីដោះស្រាយសំណង បន្ទាប់ពីក្រុមហ៊ុននេះ បានបាញ់សត្វក្របីរបស់ពួកគាត់ងាប់អស់ ៦ក្បាល និងរបួស ៦ក្បាល។អាជ្ញាធរភូមិ បានបញ្ជាក់ថា ម្ចាស់ក្របីយល់ព្រមសម្របសម្រួលបញ្ចប់បញ្ហា កាលពីល្ងាចថ្ងៃអាទិត្យទី៤ កុម្ភៈ ប៉ុន្តែព្យាយាមមិនបញ្ជាក់ពីហេតុផល ដែលនាំឲ្យមានការយល់ព្រមទទួលដំណោះស្រាយ ឬក៏ត្រូវដោះស្រាយរឿងនោះតាមវិធីណាមួយនោះឡើយ។
អាជ្ញាធរនៅក្នុងឃុំដងពែង ស្រុកស្រែអំបិល ខេត្តកោះកុង បានឲ្យដឹងថា ក្រុមហ៊ុនផលិតស្ករអំពៅ នៅខេត្តកោះកុង បានយល់ព្រមចរចាផ្ដល់សំណងដល់ម្ចាស់ក្របី នៅថ្ងៃទី៤ ខែកុម្ភៈ បន្ទាប់ពីអភិបាលខេត្តកោះកុង អ្នកស្រី មិថុនា ភូថង បានផ្សព្វផ្សាយនៅលើទំព័រហ្វេសប៊ុក (Facebook) ថា នឹងចាត់ឲ្យអាជ្ញាធរមានសមត្ថកិច្ចមូលដ្ឋានចុះស្វែងរកមូលហេតុពិត និងពិនិត្យករណីនេះជាបន្ទាន់។
មេភូមិតាធង ប្រាប់អាស៊ីសេរីយ៉ាងខ្លីថា កាលពីល្ងាចថ្ងៃអាទិត្យទី៤ កុម្ភៈ គឺភាគីក្រុមហ៊ុន និងម្ចាស់ ក្របី បានដោះស្រាយចប់សព្វគ្រប់ហើយ ដូច្នេះលោកមិនចង់អត្ថាធិប្បាយជុំវិញរឿងនេះច្រើនទៀតទេ៖ «អូ! ឥឡូវនេះ គេសម្របសម្រួលគ្នាហើយ មិនដឹងយកធ្វើអីទៀតទេបង។ ប៉ុណ្ណឹងបានហើយបង ខ្ញុំជាប់រវល់ណាស់»។
អាស៊ីសេរីបានព្យាយាមទាក់ទងទៅម្ចាស់ក្របីជាច្រើនលើក តែមិនទទួលទូរស័ព្ទនោះទេ។ កាលពី ថ្ងៃម្សិលមិញ ម្ចាស់ក្របីដែលរស់នៅភូមិតាធង ឃុំដងពែង ស្រុកស្រែអំបិល ប្រាប់អ្នកកាសែតថា អ្នកយាមនៅក្រុមហ៊ុនស្ករអំពៅកោះកុង បានបាញ់ក្របីរបស់ពួកគាត់ ងាប់អស់ចំនួន១២ កាលពីថ្ងៃ ទី២ ខែកុម្ភៈ ខណៈដែលក្របីទាំងនោះ ត្រូវបានព្រលែងឲ្យស៊ីស្មៅនៅក្នុងត្រពាំងក្បែរដីដែលមាន ទំនាស់ជាមួយក្រុមហ៊ុនស្ករអំពៅ។ ម្ចាស់ក្របីអះអាងថា ក្របីរបស់អ្នកស្រីមិនបានចូលទៅស៊ីអំពៅ របស់ក្រុមហ៊ុននោះទេ។
មេឃុំដងពេង លោក មេង យុយ មានប្រសាសន៍ថា លោកមិនទាន់ដឹងអំពីលទ្ធផលនៃការចរចា នោះឡើយ។ ទោះយ៉ាងណា លោកបន្ថែមថា កន្លងមកក្រុមហ៊ុននិងពលរដ្ឋ បានធ្វើកិច្ចសន្យាជា មួយគ្នាថា ប្រសិនបើក្របីអ្នកភូមិចូលទៅចម្ការក្រុមហ៊ុននោះ គឺក្រុមហ៊ុនមានសិទ្ធិចាប់ និងទារ សំណង តែមិនអនុញ្ញាតឲ្យមានការបាញ់សម្លាប់នោះទេ។ លោកបញ្ជាក់ថា ករណីបាញ់សម្លាប់ក្របីរបស់អ្នកភូមិនេះ គឺជាករណីថ្មី ហើយតាមលោកដឹងគឺក្របីទាំងនោះ មិនបានចូលស៊ីអំពៅរបស់ ក្រុមហ៊ុនឡើយ៖ «អ្នកមានដំណាំនិងអ្នកមានក្របីគោ គឺបានធ្វើលិខិតព្រមព្រៀងគ្នា។ ឧទាហរណ៍ ថា ក្របីទៅស៊ីអំពៅប៉ុន្មាន ហើយត្រូវសងប៉ុន្មាន យើងមានលក្ខខណ្ឌជាមួយគ្នារួចហើយក្នុងលក្ខខណ្ឌនោះ គឺអត់មាននិយាយរឿងបាញ់រឿងបោះអីទេ។ អាជ្ញាធរ និងក្រុមហ៊ុន គឺមានជាឯកសារជាមួយគ្នា»។
ក្រុមហ៊ុនស្ករអំពៅកោះកុង (Koh Kong Sugar) និងក្រុមហ៊ុន ផ្លែនថេសិន អ៊ីនដាសស្ទ្រី (Plantation Industry) របស់អ្នកវិនិយោគទុនថៃ ដែលទិញភាគហ៊ុនពីលោកឧកញ៉ាលី យ៉ុងផាត់ ដែលជាសមាជិកព្រឹទ្ធសភាគណបក្សប្រជាជនកម្ពុជា កាលពីឆ្នាំ២០១០ នោះ ក៏មានទំនាស់ដីធ្លីជាមួយប្រជាពលរដ្ឋ ៥ឃុំ ក្នុងស្រុកស្រែអំបិល និងស្រុកបុទុមសាគរ ប៉ះពាល់ជាង ៧០០គ្រួសារ។ ទំនាស់ដីធ្លីនេះ នៅមិនទាន់ដោះស្រាយចេញអស់នៅឡើយ ហើយពលរដ្ឋមួយចំនួន ដើរស្រែកតវ៉ាតាមមុខក្រសួងស្ថាប័នរដ្ឋមួយចំនួន។
អ្នកសម្របសម្រួលអង្គការសិទ្ធិមនុស្សលីកាដូ (LICADHO) ខេត្តកោះកុង លោក អ៊ិន គង់ជិត មាន ប្រសាសន៍ថា ពលរដ្ឋក្រីក្រនៅទីនោះ គឺរស់នៅពឹងផ្អែកទៅលើការចិញ្ចឹមគោ ក្របី ដូច្នេះភាគីក្រុម ហ៊ុន មិនគួរបាញ់សម្លាប់សត្វចិញ្ចឹមរបស់ពួកគាត់ឡើយ។ លោកសង្ឃឹមថា ភាគីក្រុមហ៊ុន នឹងផ្ដល់ សំណងសមរម្យទៅម្ចាស់ក្របី៖ «ផ្ដល់សំណងដល់ម្ចាស់ក្របីនេះ វាអត់ទាន់រួចផុតពីទំនួលខុសត្រូវរឿងព្រហ្មទណ្ឌនោះទេ ដូច្នេះក្រុមហ៊ុនត្រូវតែទទួលខុសត្រូវបទព្រហ្មទណ្ឌមួយទៀត»។
មេឃុំដងពេង និងប្រជាពលរដ្ឋ ឲ្យដឹងដែរថា កន្លងមក ក្រុមហ៊ុនតែងតែចាប់ក្របីអ្នកភូមិនៅជុំវិញ នោះ ជាញឹកញាប់ ហើយតែងតែទាមទារប្រាក់ជាថ្នូរនឹងការដោះលែងវិញ។ ករណីបាញ់សម្លាប់ សត្វក្របីនេះ គឺជាករណីលើកទី១ ហើយក្រុមហ៊ុនបានបំពានកិច្ចសន្យា។ កន្លងមកដោយសារតែ ការពារគោក្របីមិនអោយចូលទៅដីរបស់ក្រុមហ៊ុននោះ គឺខាងក្រុមហ៊ុន និងពលរដ្ឋ ក៏បានឯកភាព គ្នាជីកប្រឡាយនិងធ្វើរបងព័ទ្ធជុំវិញដីក្រុមហ៊ុន៕