អាជ្ញាធរខែត្រស្ទឹងត្រែង រងការចោទថា ប្លន់អាសនៈសមាជិកក្រុមប្រឹក្សាខែត្ររបស់គណបក្សជំទាស់រួចបែងចែកឲ្យគណបក្សប្រជាជនកម្ពុជា។ សមាជិកក្រុមប្រឹក្សាខែត្រមកពីគណបក្សភ្លើងទៀន ចាត់ទុកករណីនេះជាទង្វើល្មើសច្បាប់។ ចំណែកអ្នកនាំពាក្យគណបក្សប្រជាជនកម្ពុជា ឆ្លើយតបថា ករណីនេះជាសមត្ថកិច្ចរបស់ គ.ជ.ប។
សមាជិកក្រុមប្រឹក្សាខែត្រស្ទឹងត្រែង កូតាពីគណបក្សភ្លើងទៀន លោក តែន ថន ឲ្យដឹងនៅថ្ងៃទី២ កុម្ភៈ ថា អាជ្ញាធរខែត្រស្ទឹងត្រែង និងគណៈកម្មាធិការរៀបចំការបោះឆ្នោតខែត្រនេះ បានយកអាសនៈសមាជិកក្រុមប្រឹក្សាខែត្ររបស់គណបក្សភ្លើងទៀន មួយអាសនៈទៅចែកឲ្យគណបក្សកាន់អំណាចកាលពីចុងឆ្នាំ២០១៧។ លោកថា គណបក្សភ្លើងទៀនដែលពីមុនជាគណបក្ស សម រង្ស៊ី ទទួលបានសំឡេងគាំទ្រ ១អាសនៈ ក្នុងចំណោមអាសនៈសមាជិកក្រុមប្រឹក្សាខែត្រសរុបចំនួន ១៣ កាលពីបោះឆ្នោតជ្រើសរើសសមាជិកក្រុមប្រឹក្សាខែត្រកាលពីឆ្នាំ២០១៤។
លោកថា អាសនៈសមាជិកក្រុមប្រឹក្សាខែត្រកើតឡើងដោយការបោះឆ្នោតមានអាណត្តិ ៥ឆ្នាំ គិតចាប់ពីថ្ងៃបោះឆ្នោតជ្រើសរើសក្រុមប្រឹក្សាខែត្រ និងផុតកំណត់ថ្ងៃបោះឆ្នោតបន្ទាប់។ ក៏ប៉ុន្តែ អាជ្ញាធរខែត្រស្ទឹងត្រែង បែងចែកឲ្យដទៃគឺជារឿងមិនត្រឹមត្រូវ៖ «ខ្ញុំគិតថា គេអនុវត្តសព្វថ្ងៃនេះគឺផ្ទុយពីច្បាប់ ពីព្រោះមិនអាចយកកៅអីរបស់គណបក្ស សម រង្ស៊ី ទៅឲ្យគណបក្សប្រជាជនបានទេ។ ត្រូវតែទុកកៅអីឲ្យទំនេរ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បដិសេធមិនអធិប្បាយបញ្ហានេះទេ ដោយលោកអះអាងថា ព្រោះវាជាសមត្ថកិច្ចរបស់ គ.ជ.ប៖ «គ.ជ.ប គេមាននីតិវិធីរបស់គេមកសួរខ្ញុំ គឺខ្ញុំអត់ដឹងរឿងទេ បើទោះជាដឹងក៏ខ្ញុំមិនអាចឆ្លើយកាត់មុខគេបានដែរ»។
ចំណែកលេខាធិការដ្ឋានគណៈកម្មាធិការរៀបចំការបោះឆ្នោត ខែត្រស្ទឹងត្រែង លោក ពុយ ចាន់ថាឡាក់ មិនផ្ដល់បទសម្ភាសន៍ដល់អាស៊ីសេរី ទេនៅថ្ងៃទី២ កុម្ភៈ។
កាលពីថ្ងៃទី១៨ តុលា ឆ្នាំ២០១៧ រដ្ឋមន្ត្រីក្រសួងមហាផ្ទៃ លោក ស ខេង បានចេញលិខិតផ្លាស់ប្ដូរតំណែងសមាជិកក្រុមប្រឹក្សាខែត្រស្ទឹងត្រែង មួយរូបពីគណបក្សភ្លើងទៀន គឹលោក សាធ ស៊ិន ចេញពីតំណែង និងទទួលស្គាល់លោក តែន ថន ពីគណបក្សភ្លើងទៀនដដែលជាសមាជិកក្រុមប្រឹក្សាខែត្រស្ទឹងត្រែង ជំនួស ខណៈដែលលោក សាធ ស៊ិន បានចុះចូលជាមួយគណបក្សប្រជាជនកម្ពុជា។ មកទល់ពេលនេះ អាសនៈនេះត្រូវបានអាជ្ញាធរខែត្រស្ទឹងត្រែង បានប្រគល់អោយលោក សាធ ស៊ិន វិញ ដែលបច្ចុប្បន្នជាសមាជិកគណបក្សកាន់អំណាច។
ខ្លឹមសារក្នុងលិខិតនោះបញ្ជាក់ថា រយៈពេលបំពេញការងារស្មើនឹងអាណត្តិដែលសល់របស់ក្រុមប្រឹក្សាអាណត្តិទី២ លើកលែងតែសាមីខ្លួនបាត់បង់សមាជិកភាពពីក្រុមប្រឹក្សាតាមច្បាប់កំណត់។
អ្នកវិភាគនយោបាយ លោកបណ្ឌិត មាស នី យល់ថា ការដោះដូរសមាជិកក្រុមប្រឹក្សាខែត្រនេះ គឺពុំមែនធ្វើឡើងផ្អែកតាមក្របខ័ណ្ឌច្បាប់នោះទេ ដែលលោកចាត់ទុកថា មិនមានអ្វីប្លែកជាងការផ្លាស់ប្ដូរតំណែងសមាជិកក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ ទូទាំងប្រទេសដែរ៖ «ព្រោះខ្ញុំមើលទៅការដោះដូរទៅ បើរំលាយសង្គ្រោះជាតិធ្វើតាមច្បាប់ទៅចុះ ប្រើតុលាការចុះ។ រហូតមកទល់ពេលនេះ ខ្ញុំមើលទៅការដោះដូរនេះមិនធ្វើទៅតាមច្បាប់ដែរ គឺមិនប្លែកអីនឹងការដោះដូរកៅអីតំណែងក្រុមប្រឹក្សាឃុំដែរ»។
ច្បាប់ស្ដីពីការបោះឆ្នោតជ្រើសរើសសមាជិកក្រុមប្រឹក្សាខែត្រ រាជធានី ខណ្ឌ មាត្រា ១៥ និង ១៦ ចែងថា ក្រុមប្រឹក្សាមានអាណត្តិប្រាំ (៥)ឆ្នាំ ហើយត្រូវផុតកំណត់នៅពេលក្រុមប្រឹក្សាថ្មីចូលកាន់តំណែង។ អាណត្តិរបស់ក្រុមប្រឹក្សាត្រូវគិតចាប់ពីថ្ងៃបោះឆ្នោតជ្រើសរើសក្រុមប្រឹក្សា និងផុតកំណត់ថ្ងៃបោះឆ្នោតបន្ទាប់៕