Clik here to view.
លោកនាយករដ្ឋមន្ត្រី ហ៊ុន សែន ប្រតិកម្មចំពោះមនុស្សមួយចំនួនដែលបារម្ភអំពីវត្តមានវិនិយោគិនចិន នៅកម្ពុជា។ ប្រតិកម្មរបស់លោកពេលនេះ បន្ទាប់ពីមជ្ឈដ្ឋានមួយចំនួន រួមទាំងមន្ត្រីរបស់លោកផង បានសម្ដែងក្ដីបារម្ភថា វិនិយោគិនចិន នាំឲ្យមានកង្វល់ទាំងអសន្តិសុខ បាត់បង់សណ្ដាប់ធ្នាប់ និងបាត់បង់ចំណូលរបស់ប្រជាពលរដ្ឋខ្មែរ។
លោកនាយករដ្ឋមន្ត្រី ហ៊ុន សែន ចាត់ទុកការហូរចូលនូវវិនិយោគិនចិន យ៉ាងគំហុកមកប្រទេសកម្ពុជា ដោយសារតែកម្ពុជា មិនទាន់អាចឆ្លើយតបចំពោះការវិវឌ្ឍន៍របស់ខ្លួននៅឡើយ។ ការលើកឡើងរបស់លោកនាយករដ្ឋមន្ត្រីដូចនេះ ធ្វើឡើងនៅក្នុងពិធីចែកសញ្ញាប័ត្រ និងសម្ពោធអគារពេទ្យកោសល្យវិស្វកម្ម នាវិទ្យាស្ថានបច្ចេកវិទ្យាកម្ពុជា នៅព្រឹកថ្ងៃទី១ កុម្ភៈ ឆ្នាំ២០១៨នេះ ជាការឆ្លើយតបទៅក្តីបារម្ភដែលបានលើកឡើងចំពោះវត្តមានវិនិយោគិនចិន នៅក្នុងប្រទេសកម្ពុជា៖ «»។
បច្ចុប្បន្ន វិនិយោគិនចិន កំពុងតែហូរចូលយ៉ាងគំហុកនៅក្នុងប្រទេសកម្ពុជា ដែលវិនិយោគស្ទើរគ្រប់វិស័យ ដូចជាវិស័យសំណង់ អចលនទ្រព្យ កសិឧស្សាហកម្ម ហេដ្ឋារចនាសម្ព័ន្ធ ឧស្សាហកម្មសម្រាប់នាំចេញឧស្ម័ន រ៉ែ និងទេសចរណ៍។ បើនិយាយពីខេត្តព្រះសីហនុវិញ ជនជាតិចិន បានមករស់នៅ និងធ្វើវិនិយោគរាប់ចាប់ពីកាស៊ីណូ សណ្ឋាគារ ភោជនីយដ្ឋាន រហូតដល់មុខរបរតូចតាចជាដើម ដែលទាំងអស់នេះបានបង្កជាក្តីកង្វល់ដល់ប្រជាពលរដ្ឋខ្មែរនៅមូលដ្ឋានដែលប្រកបមុខរបរដូចគ្នានេះ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនពិគ្រោះយោបល់ (EMC) លោក ង៉ែត ជូ មានប្រសាសន៍ថា វាជារឿងល្អដែលមានអ្នកវិនិយោគច្រើន ប៉ុន្តែវាធ្វើឲ្យមានការព្រួយបារម្ភមួយចំនួនអំពីបញ្ហាសន្តិសុខ សុវត្ថិភាព ដូច្នេះរដ្ឋាភិបាល និងអាជ្ញាធរមូលដ្ឋានត្រូវពង្រឹងសន្តិសុខ និងសុវត្ថិភាព រួមទាំងការពង្រឹងការអនុវត្តច្បាប់ឲ្យតឹងរ៉ឹងជាដើម។ ទន្ទឹមគ្នានេះ លោកបន្ថែមថា លំហូរវិនិយោគិនចិន មកកម្ពុជានេះ គឺល្អសម្រាប់រយៈពេលខ្លីនិងមធ្យម ប៉ុន្តែសម្រាប់រយៈពេលវែង គឺរដ្ឋាភិបាលត្រូវមានវិធានការប្រុងប្រយ័ត្ន និងត្រូវលើកស្ទួយ និងពង្រឹងសមត្ថភាពសហគ្រិន ឬក៏ម្ចាស់អាជីវកម្មក្នុងស្រុកដើម្បីអាចប្រកួតប្រជែងជាមួយជនជាតិចិន៖ «»។
ថ្មីៗនេះ អភិបាលខេត្តព្រះសីហនុ លោក យន់ មីន ក៏បានសរសេរលិខិតមួយទៅលោក ស ខេង រដ្ឋមន្ត្រីក្រសួងមហាផ្ទៃ ដោយបញ្ជាក់ពីបញ្ហាជាមួយការវិនិយោគរបស់ជនជាតិចិន នៅក្នុងខេត្តព្រះសីហនុ ដែរ។ លោក យន់ មីន បញ្ជាក់ថា កំណើនជនបរទេសក្នុងខេត្តនេះ កំពុងធ្វើឲ្យមានផលប៉ះពាល់អវិជ្ជមានជាច្រើនដូចជាបង្កឱកាសដល់ជនជាតិចិន ជាពួកម៉ាហ្វីយ៉ាមួយចំនួនបន្លំខ្លួនចូលមកប្រព្រឹត្តបទល្មើស បង្កអសន្តិសុខ និងចាប់ជំរិតអ្នកវិនិយោគ។ ជនបរទេសមួយចំនួនគេចវេះមិនព្រមបំពេញបែបបទតាមនីតិវិធី ខ្លះបើកបរដោយគ្មានច្បាប់អនុញ្ញាត ខ្លះផឹកស៊ី ឡូឡា និងវាយតប់គ្នាតាមទីសាធារណៈ។ ចំណែកស្លាកយីហោហាង សណ្ឋាគារ កាស៊ីណូ និងការដ្ឋានខ្លះ សរសេរអក្សរបរទេសសុទ្ធ ឬសរសេរអក្សរខ្មែរតូចជាងអក្សរបរទេសជាដើម។
លោក ង៉ែត ជូ បន្ថែមថា នៅពេលដែលចិន មានឥទ្ធិពលសេដ្ឋកិច្ចមកលើកម្ពុជា ដូច្នេះ រដ្ឋាភិបាលក៏ត្រូវប្រុងប្រយ័ត្នខ្ពស់អំពីគោលនយោបាយការបរទេសរបស់ខ្លួន ពោលគឺមិនត្រូវពឹងផ្អែក ឬទំនាក់ទំនងសេដ្ឋកិច្ចតែជាមួយនឹងប្រទេសចិននោះទេ។ លោកថា រដ្ឋាភិបាលត្រូវមានភាពឆ្លាតវៃក្នុងការពង្រីកទំនាក់ទំនងសេដ្ឋកិច្ចឲ្យបានទូលំទូលាយជាមួយសហគមន៍អន្តរជាតិ៖ «»។
អ្នកវិភាគមួយចំនួនទៀតយល់ថា កំណើនវិនិយោគិនចិន នៅកម្ពុជានេះ នឹងធ្វើឲ្យអ្នកវិនិយោគអឺរ៉ុបរត់ចេញពីកម្ពុជា។ ម្យ៉ាងវិញទៀត ការកើនឡើងនូវឥទ្ធិពលរបស់ចិននេះ ក៏អាចធ្វើឲ្យប្រទេសកម្ពុជា គេចចេញពីសម្ពាធប្រទេសលោកខាងលិច ដែលជាអ្នកលើកស្ទួយសិទ្ធិមនុស្ស និងកំណែទម្រង់លទ្ធិប្រជាធិបតេយ្យផងដែរ។
ប្រទេសចិន បានប្ដេជ្ញាធ្វើជាបង្អែកដ៏រឹងមាំរបស់រដ្ឋាភិបាលលោក ហ៊ុន សែន ជាបន្តបន្ទាប់ ក្រោយពីសហគមន៍អន្តរជាតិ រួមមានអាមេរិក និងសហគមន៍អឺរ៉ុប បានដាក់ទណ្ឌកម្មជាបន្តបន្ទាប់ ក្រោយពីលោក ហ៊ុន សែន បញ្ជាឲ្យរំលាយបក្សសង្គ្រោះជាតិ និងចាប់ខ្លួនលោក កឹម សុខា ដាក់ពន្ធនាគារកាលពីឆ្នាំ២០១៧។
របាយការណ៍ប្រចាំឆ្នាំរបស់ក្រុមប្រឹក្សាអភិវឌ្ឍន៍កម្ពុជា ដែលត្រូវបានចេញផ្សាយដោយទីភ្នាក់ងារព័ត៌មានរដ្ឋចិន ស៊ិនហួ (Xinhua) កាលពីថ្ងៃទី៣ ខែមករា ឆ្នាំ២០១៨ បង្ហាញថា ទំហំវិនិយោគចិន មកកម្ពុជា នៅឆ្នាំ២០១៧ មានចំនួន ១,៤៣ប៊ីលានដុល្លារអាមេរិក ឬស្មើ ២៧ភាគរយ នៃវិនិយោគបរទេសសរុប ដែលចំនួននេះ គឺកើនឡើងស្ទើរពាក់កណ្ដាល បើធៀបនឹងឆ្នាំ២០១៦ ទំហំវិនិយោគរបស់ចិន មានចំនួន ៧៤៨លានដុល្លារអាមេរិក៕