សមត្ថកិច្ចខែត្រមណ្ឌលគិរី បានកំណត់មុខសញ្ញាមនុស្សពីរនាក់ ដែលជាជនសង្ស័យបាញ់សម្លាប់មន្ត្រីកងរាជអាវុធហត្ថ មន្ត្រីសង្គមស៊ីវិល និងឆ្មាំអភិរក្សរបស់ក្រសួងបរិស្ថាន ៣នាក់ កាលពីថ្ងៃទី៣០ ខែមករា។ សមត្ថកិច្ចថា សំណុំរឿងនេះ ជនសង្ស័យម្នាក់ជាយោធាបានចេញមុខសារភាព។ ប្រតិបត្តិការចាប់ខ្លួនជនល្មើសនេះ គឺស្របពេលដែលសហគមន៍ជនជាតិដើមភាគតិច ១៥ខែត្រ បានអំពាវនាវឲ្យរដ្ឋាភិបាលអន្តរាគមន៍ចាប់ជនល្មើសមកផ្ដន្ទាទោសតាមច្បាប់ដើម្បីរួមចំណែកលើកទឹកចិត្តដល់បេសកកម្មអភិរក្សព្រៃឈើរបស់ពួកគេ។
ស្នងការរងទទួលបន្ទុកព្រហ្មទណ្ឌខែត្រមណ្ឌលគិរី លោក សូ សុវណ្ណ ប្រាប់អាស៊ីសេរី នៅថ្ងៃទី១ ខែកុម្ភៈ ថា សមត្ថកិច្ចខែត្រមណ្ឌលគិរី កងរាជអាវុធហត្ថលើផ្ទៃប្រទេស និងនគរបាលនៃអគ្គស្នងការនគរបាលជាតិ កំពុងបន្តដំណើរការស្រាវជ្រាវរុករកចាប់ជនសង្ស័យម្នាក់ទៀតនៅក្នុងព្រៃមកផ្ដន្ទាទោស។ លោកថា ជនសង្ស័យម្នាក់ទៀតនោះ ជានាយនគរបាលប៉ុស្តិ៍អូរឡែ កំពុងរត់គេចខ្លួន។ លោកបញ្ជាក់ថា ការតាមចាប់ខ្លួនជនដៃដល់រូបនេះ បានកើតឡើងក្រោយជនពាក់ព័ន្ធដែលជាមន្ត្រីយោធាឈ្មោះ កើត វេហា បានចេញមុខសារភាព៖ «មកដល់ពេលនេះ យើងបានធ្វើការជិតចប់សព្វគ្រប់ហើយ ពាក់ព័ន្ធការស៊ើបអង្កេតនេះ ប៉ុន្តែយើងកំណត់មុខសញ្ញាមនុស្សពីរនាក់ ម្នាក់បានចេញមុខមកសារភាព។ តាមការស៊ើបអង្កេតរបស់យើងមានតែពីរនាក់ទេ ជនសង្ស័យក្នុងសំណុំរឿងនេះ»។
កាលពីថ្ងៃទី៣០ មករា មន្ត្រីអង្គការមិនមែនរដ្ឋាភិបាល មន្ត្រីអាវុធហត្ថ និងឆ្មាំអភិរក្សរបស់មន្ត្រីបរិស្ថាន ៣រូប ត្រូវបានជនសង្ស័យបាញ់សម្លាប់អំឡុងពេលពួកគាត់ចុះបំពេញបេសកកម្មការពារព្រៃឈើនៅតំបន់អភិរក្សសត្វព្រៃកែវសីមា ឋិតនៅឃុំសែនមនោរម្យ ស្រុកអូរាំង។
ស្របពេលជាមួយគ្នានេះដែរ ជនជាតិដើមភាគតិច ១៥ខែត្រ បានសរសេរលិខិតចំហមួយអំពាវនាវឲ្យរាជរដ្ឋាភិបាលអន្តរាគមន៍បញ្ឈប់បទល្មើសព្រៃឈើជាបន្ទាន់ ដើម្បីស្វែងរកយុត្តិធម៌ដល់ជនរងគ្រោះ ៣នាក់ ដែលជាមន្ត្រីអាវុធហត្ថ មន្ត្រីសង្គមស៊ីវិល និង មន្ត្រីឧទ្យានុរក្សរបស់ក្រសួងបរិស្ថាន ដែលត្រូវខ្មាន់កាំភ្លើងបាញ់សម្លាប់។
ប្រធានអង្គការជនជាតិដើមភាគតិចកម្ពុជា លោក ហ៊ាន ប៊ុនហៀង ឲ្យដឹងនៅថ្ងៃទី១ ខែមករា ថា ព្រឹត្តិការណ៍បាញ់ប្រហារនេះ ជាសារគំរាមស្មារតីអភិរក្សព្រៃឈើរបស់ជនជាតិដើមភាគតិចគ្រប់តំបន់ដែលស្ម័គ្រចិត្តការពារបរិស្ថាន។ លោកថា បើទោះបីជារដ្ឋាភិបាលបានពង្រាយសមត្ថកិច្ចចម្រុះ និងមន្ត្រីបរិស្ថាន សហការជាមួយសហគមន៍ទប់ស្កាត់បទល្មើសព្រៃឈើគ្រប់ទីកន្លែងក្តី តែសកម្មភាពកាប់ឈើ និងដឹកជញ្ជូនខុសច្បាប់នៅតែកើតមានច្រើន។ រីឯសហគមន៍ និងអ្នកអភិរក្សព្រៃឈើ ចុះទប់ស្កាត់បទល្មើសព្រៃឈើ តែងប្រឈមជាមួយឈ្មួញអ្នករកស៊ីឈើខុសច្បាប់ និងការគំរាមកំហែងតាមទូរស័ព្ទជាដើម។
លោកបារម្ភថា ប្រសិនបើរដ្ឋាភិបាលមិនអាចស្វែងរកជនល្មើសមកផ្ដន្ទាទោសទេ បាតុភាពនេះនឹងអាចកើតឡើងនៅតំបន់ផ្សេងទៀត៖ «ឈ្មួញជាដើម គំរាមកំហែងពួកគាត់ សុវត្ថិភាពពួកគាត់ ជាពិសេសនៅពេលពួកគាត់ចាប់បទល្មើសទាំងអស់ហ្នឹង។ ចូលក្នុងព្រៃប្រឈមនៅពេលពួកគាត់នៅការពារ។ ប្រឈមធម្មជាតិជាដើម និងពួកបទល្មើសដែលចូលកាប់ព្រៃឈើ។ ប្រឈមគ្រប់ពេល ព្រោះពួកគាត់នៅកន្លែងភ្លឺ ហើយអ្នកប្រព្រឹត្តបទល្មើសនៅកន្លែងងងឹត គឺប្រឈមគ្រប់ពេល»។
លិខិតចុះថ្ងៃទី៣១ ខែមករា របស់បណ្ដាញសហគមន៍ជនជាតិដើមភាគតិច ១៥ខែត្រ ឲ្យដឹងថា ជនជាតិដើមភាគតិចសម្ដែងការសោកស្ដាយយ៉ាងខ្លាំងចំពោះការបាត់បង់ជីវិតមន្ត្រីអាវុធហត្ថ មន្ត្រីសង្គមស៊ីវិល និងមន្ត្រីឧទ្យានុរក្សរបស់ក្រសួងបរិស្ថានទាំងនោះ ដែលបានពលីការពារសម្បត្តិធម្មជាតិនៅកម្ពុជា។
មន្ត្រីសម្របសម្រួលសមាគមអាដហុក (ADHOC) ខែត្រមណ្ឌលគិរី លោក សុក រដ្ឋា អង្កេតឃើញ ថា សមត្ថកិច្ចកំពុងប្រឹងប្រែងបន្តដំណើរការរុករកចាប់ខ្លួននាយនគរបាលប៉ុស្តិ៍អូរឡែ ឈ្មោះ ផល ពេញ ដែលបានសម្ងំលាក់ខ្លួននៅក្នុងព្រៃដ៏ជ្រៅ ជាប់ព្រំដែនកម្ពុជា-វៀតណាម។ លោកថា ប្រតិបត្តិការចាប់ជនសង្ស័យនេះ ទំនងជាសមត្ថកិច្ចដាក់ការសង្ស័យថា នាយនគរបាលប៉ុស្តិ៍អូរឡែ គឺជាជនដៃដល់ក្នុងសំណុំរឿងនេះ។ លោកមានជំនឿថា សំណុំរឿងនេះ មិនអាចកើតមានអំពើនិទណ្ឌភាពទេ៕