ក្រុមអ្នកអភិរក្សសត្វព្រៃរកឃើញសម្បុកត្មាតភ្លើងចំនួន ៣សម្បុក ស្របពេលដែលចំនួនរបស់សត្វត្មាតប្រភេទនេះមានការធ្លាក់ចុះខ្លាំងនៅលើពិភពលោក។
សេចក្ដីប្រកាសព័ត៌មានរបស់សមាគមអភិរក្សសត្វព្រៃ (WCS) ចេញផ្សាយនៅថ្ងៃទី២៩ ខែមករា ឱ្យដឹងថា ក្រុមអ្នកអភិរក្សរបស់សមាគមអភិរក្សសត្វព្រៃ ក្រសួងបរិស្ថាន និងសហគមន៍បានរកឃើញសម្បុកសត្វត្មាតភ្លើងនេះ នៅក្នុងដែនជម្រកសត្វព្រៃឆែប ខេត្តព្រះវិហារ។ ក្រុមអ្នកអភិរក្សចាត់ទុកការរកឃើញសម្បុកសត្វត្មាតភ្លើងនេះថា ជាក្តីសង្ឃឹមធំមួយសម្រាប់ពួកគេក្នុងកិច្ចការអភិរក្សពូជសត្វប្រភេទនេះកុំអោយបាត់បង់។
ត្មាតភ្លើងត្រូវបានសហភាពអន្តរជាតិសម្រាប់ការអភិរក្សធម្មជាតិ ( International Union for Conservation of Nature) រាប់បញ្ចូលក្នុងប្រភេទសត្វជិតផុតពូជបំផុតលើសកលលោក។ វត្តមានរបស់សត្វជិតផុតពូជមួយនេះ មានប្រមាណ ៥០ក្បាលប៉ុណ្ណោះនៅក្នុងប្រទេសកម្ពុជា។
សេចក្ដីប្រកាសព័ត៌មានដដែលឱ្យដឹងថា សត្វកម្រមួយប្រភេទនេះបានរងគ្រោះដោយសារតែការបាត់បង់ព្រៃឈើ ការផ្លាស់ប្ដូរដីដោយសារដីសម្បទាន និងការកាប់ឆ្ការព្រៃដែលនាំឱ្យបាត់បង់ទីជម្រក កន្លែងពងកូន និងចំណីរបស់ហ្វូងត្មាតទាំងនេះ។
ដោយឡែក កាលពី ៥ឆ្នាំមុន សត្វត្មាតយ៉ាងតិច ៣០ក្បាលបានស្លាប់ដោយសារតែថ្នាំបំពុលសត្វដែលអ្នករកសត្វបានដាក់ក្នុងទឹកត្រពាំង ដើម្បីចាប់សត្វស្លាប និងថនិកសត្វមាឌតូចៗ។
ទោះយ៉ាងណា បច្ចុប្បន្នអ្នកដែលធ្លាប់ដាក់អន្ទាក់សត្វ និងប្រមាញ់សត្វមួយចំនួនបានក្លាយជាអ្នកការពារសត្វព្រៃទាំងនេះវិញ តាមរយៈគម្រោងការពារសម្បុករបស់អង្គការសមាគមអភិរក្សសត្វព្រៃ៕