ប៉ូលិសម្នាក់ដែលធ្វើឲ្យបុរសម្នាក់ស្លាប់ក្នុងព្រឹត្តិការណ៍បង្ក្រាបកន្លែងជល់មាន់មួយកន្លែងនៅក្រោយផ្សារកាណាស៊ីធី រាជធានីភ្នំពេញ ត្រូវស្ថាប័នរបស់ខ្លួនបញ្ជូនខ្លួនមកតុលាការក្រុងភ្នំពេញដើម្បីសាកសួរហើយ ថ្ងៃទី២៣ ខែមករានេះ។ មន្ត្រីសង្គមស៊ីវិលស្នើឲ្យតុលាការស៊ើបអង្កេតដោយតម្លាភាពដើម្បីផ្ដល់យុត្តិធម៌ពេញលេញដល់ជនរងគ្រោះ សាច់ញាតិរបស់ជនរងគ្រោះ។
ប៉ូលិសដែលជាជនសង្ស័យនេះ ពេលបញ្ជូនមកតុលាការ ស្ថិតក្នុងសំលៀកបំពាក់ស៊ីវិល ពាក់អាវយឺតស្លៀកខោជើងវែង និងមានពាក់ម៉ាសផងនោះ។ ជនសង្ស័យរូបនេះឈ្មោះ លោក ចន វិរៈ ពាក់ស័ក្ដិ១ ជាមន្ត្រីប៉ូលិសបម្រើផ្នែកអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យ។ លោកជាជនសង្ស័យ ក្នុងករណីធ្វើឲ្យបុរសម្នាក់ស្លាប់ក្នុងព្រឹត្តិការណ៍បង្ក្រាបកន្លែងជល់មាន់មួយកន្លែងនៅក្នុងភ្នំពេញ កាលពីថ្ងៃទី២១ ខែមករា កន្លងទៅ។
ការសម្រេចបញ្ជូនប៉ូលិសរូបនេះ មកតុលាការ ក្រោយពេលស្នងការនគរបាលជាតិ លោក នេត សាវឿន បានបញ្ជាយ៉ាងដាច់ណាត់ដល់ស្នងការនគរបាលរាជធានីភ្នំពេញ ឲ្យចាត់វិធានការដោយចាប់បញ្ជូនមន្ត្រីនគរបាលរូបនេះ។
ដូចគ្នានេះដែរ កាលពីថ្ងៃទី២២ ខែមករា ស្នងការរងនគរបាលជាតិ និងជាមេប៉ូលិសក្រុងភ្នំពេញ បញ្ជាឲ្យស៊ើបអង្កេតរកមុខប៉ូលិសបង្កហេតុ ពិនិត្យកាំភ្លើង ធ្វើកោសល្យវិច័យលើគ្រាប់កាំភ្លើងដែលបានយកចេញពីសាកសពជនរងគ្រោះ។
ដល់ពេលនេះ តុលាការក្រុងភ្នំពេញមិនទាន់បង្ហាញចំណាត់ការ ឬការចោទប្រកាន់បែបណាលើជនសង្ស័យដែលជាប៉ូលិសនេះនៅឡើយទេ។ ចំណែកអ្នកច្បាប់ និងសង្គមស៊ីវិលដែលតាមដានដំណើររឿងនេះ ឲ្យដឹងថា ជនបង្កត្រូវទទួលខុសត្រូវទាំងសំណងរដ្ឋប្បវេណី និងទោសព្រហ្មទណ្ឌ។ លោកមេធាវី ឡោ ជុនធី យល់ថា សមត្ថកិច្ចដែលធ្វេសប្រហែសនោះអាចប្រឈមនិងទោសព្រហ្មទណ្ឌពីបទធ្វេសប្រហែសដោយអចេតនាដែលបណ្ដាលឲ្យមានមនុស្សស្លាប់។
មាត្រា២០៧នៃក្រមព្រហ្មទណ្ឌចែងថា "បទមនុស្សឃាតដោយអចេតនា គឺជាអំពើបណ្ដាល ឱ្យស្លាប់អ្នកដទៃ ដោយការធ្វេសប្រហែស ការមិនប្រុងប្រយ័ត្ន ឬការខ្ជីខ្ជា ត្រូវផ្ដន្ទាទោស ដាក់ពន្ធនាគារពី១ឆ្នាំ ទៅ ៣ឆ្នាំ និងពិន័យជាប្រាក់ពី ២លានរៀល ទៅ៦លានរៀល"។
រីឯអ្នកនាំពាក្យសមាគមអាដហុក (Adhoc) លោក ស៊ឹង សែនករុណា ថាលោកគាំទ្រចំណាត់ការផ្លូវច្បាប់ទាំងករណីនេះ និងករណីផ្សេងទៀត ដែលកើតឡើងព្រោះការធ្វេសប្រហែសរបស់សមត្ថកិច្ច។ មន្ត្រីសង្គមស៊ីវិលរូបនេះ រំពឹងថា តុលាការនឹងផ្ដល់យុត្តិធម៌ពេញលេញដល់ជនរងគ្រោះ បើទោះជាជនសង្ស័យជាសមត្ថកិច្ចក្ដី៖ «អ្នកប្រព្រឹត្តកម្រទទួលទោស»។
ក្នុងព្រឹត្តិការណ៍បង្ក្រាបល្បែងជល់មាន់មួយកន្លែងនៅក្រោយផ្សារកាណាស៊ីធី ក្នុងក្រុងភ្នំពេញ កាលពីថ្ងៃទី២១ ខែមករា បានបណ្ដាលឲ្យបុរសម្នាក់ស្លាប់។ ជនរងគ្រោះឈ្មោះថា សៀក រ៉ន ភេទប្រុស អាយុ៣៣ឆ្នាំ ជាកម្មកររោងចក្រ មានស្រុកកំណើតនៅខេត្តកំពង់ស្ពឺ។
ភរិយាជនរងគ្រោះលោកស្រី ណុប ផានី រៀបរាប់ថា មុនពេលកើតហេតុជនរងគ្រោះបានឡើងទៅបន្ទប់ជួលរបស់គាត់នៅជាន់លើ បន្ទាប់មកគាត់បានអើតក្បាលមើលគេលេងជល់មាន់ នៅខាងក្រោមបន្ទប់។ លោកស្រីបន្តថា ក្នុងគ្រាដដែលនោះ ស្រាប់តែកម្លាំងអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យ បានចុះទៅបង្ក្រាបក្រុមអ្នកលេងល្បែងជល់មាន់ នៅក្រោយផ្សារកាណាស៊ីធី ដោយបានបាញ់ឡើងទៅលើ ជាច្រើនគ្រាប់បណ្ដាលឲ្យត្រូវចំបំពង់ក និងដៃស្ដាំប្តីលោកស្រី។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា ករណីធ្វេសប្រហែសសមត្ថកិច្ចក្នុងពេលបំពេញការងាររហូតធ្វើឲ្យពលរដ្ឋបាត់បង់ជីវិតដោយគ្មានកំហុសមិនមែនជាលើកទីមួយទេ។ លោកថា ការជំរុញរបស់មេប៉ូលិស ឲ្យបំបែកសំណុំរឿងនេះជាកាត់បន្ថយគ្រោះថ្នាក់ របស់ពលរដ្ឋព្រោះការធ្វេសប្រហែសរបស់សមត្ថកិច្ចផង និងជាការស្តាមុខមាត់របស់សមត្ថកិច្ចផង។ យើងចង់ដឹងពីមូលហេតុ ដែលឈានដល់មានការបាត់បង់មនុស្សបែបនេះ។
បើទោះបីជាលោកនាយករដ្ឋមន្ត្រី ហ៊ុន សែន ប្រកាសចាត់វិធានការបិទល្បែងជល់មាន់ តាំងពីយូរលង់មកហើយ បទល្មើសនេះនៅតែបន្តកើតមានដដែល។ ថ្មីៗមុននេះ អាជ្ញាធរទើបបង្ក្រាបវង់ល្បែងជល់មាន់ដ៏ធំមួយ ដែលក្មួយប្រសាររបស់លោក ហ៊ុន សែន ផ្ទាល់តែម្ដងជាអ្នកបើក។ លោក ហ៊ុន សែន បានចេញបញ្ជាឲ្យសមត្ថកិច្ចបាញ់សម្លាប់ក្មួយប្រសារនោះ បើហ៊ានតដៃពេលចាប់ខ្លួន។ ប៉ុន្តែ ការបង្ក្រាបលើកនោះ ពុំមានការបាត់បង់ជីវិតមនុស្សទេ គឺងាប់តែមាន់តែ ៩២ ក្បាលប៉ុណ្ណោះ ដោយតុលាការកាត់ទោសប្រហារជីវិតមាន់ជល់ទាំងនោះ។
សង្គមស៊ីលស្នើទៅក្រសួងមហាផ្ទៃគួរបន្ថែមការបណ្ដុះបណ្ដាលបន្ថែមទៀត ដល់មន្ត្រីប៉ូលិស ជាពិសេស គឺប៉ូលិសនៅមូលដ្ឋានក្នុងការប្រើបច្ចេកទេសដែលចុះបង្ក្រាបបទល្មើស ព្រោះកន្លងមកការធ្វេសប្រហែសរបស់សមត្ថកិច្ចធ្វើឲ្យពលរដ្ឋច្រើនរូបមកហើយបាត់បង់ជីវិតដោយគ្មានទោសកំហុស៕