ពលរដ្ឋនៅខេត្តកោះកុងម្នាក់ បានស្លាប់ព្រោះពុលត្រីក្រពតក្រោយពលរដ្ឋរូបនេះ និងពលរដ្ឋផ្សេងទៀត ហូបសាច់ត្រីក្រពតក្លែមជាមួយស្រាបៀរ កាលពីថ្ងៃទី២២ ខែមករា។ បុរសដែលស្លាប់ជាអ្នកនេសាទ មានទីលំនៅភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុង។ មេឃុំកោះស្តេច ស្រុកគិរីសាគរ ឲ្យដឹងថា ជនរងគ្រោះស្លាប់ក្នុងពេលបញ្ជូនទៅសង្គ្រោះនៅមន្ទីរពេទ្យខេត្ត ក្នុងថ្ងៃ ដដែល។
មេឃុំកោះស្តេច ស្រុកគិរីសាគរ ខេត្តកោះកុង លោក សុខ ចេង ឲ្យអាស៊ីសេរី ដឹងនៅថ្ងៃទី២៣ ខែមករា ថា ពលរដ្ឋដែលពុលត្រីក្រពតស្លាប់នោះ គឺជាអ្នកចម្អិនត្រីនោះផ្ទាល់ ហើយបុរសនោះហូបគ្រឿងក្នុងត្រីច្រើន។ ចំណែកអ្នកពុលផ្សេងទៀត ក៏ហូបសាច់ត្រីក្លែមជាមួយស្រាបៀរនោះដែរ។ លោកប្រាប់ទៀតថា មុនដំបូងរកឃើញ មនុស្សពុលត្រីក្រពតមានចំនួន ៩នាក់ ប៉ុន្តែនៅថ្ងៃអង្គារនេះគេបានរកឃើញម្នាក់ទៀត និងបានបញ្ជូនទៅសង្គ្រោះនៅមន្ទីរពេទ្យរួចហើយដែរ។ លោកមេឃុំឲ្យដឹងទៀតថា ពេលនេះក្រុមពលរដ្ឋដែលពុលត្រីក្រពតទាំងនោះ បានធូរស្រាលច្រើនហើយ។
របាយការណ៍របស់អធិការដ្ឋាននគរបាលស្រុកគិរីសាគរ ឲ្យដឹងថា កាលពីថ្ងៃទី២២ ខែមករា ក្រុមពលរដ្ឋនាំហូបត្រីក្រពតក្លែមស្រា ក្រោយមកមានសភាពធីងធោង និងក្អួតចង្អោរ និងត្រូវបញ្ជូនទៅសង្គ្រោះមណ្ឌលសុខភាពស្រុក។
ទាក់ទងបញ្ហាពលរដ្ឋពុលត្រីក្រពតនេះ លោកមេឃុំបញ្ជាក់ថា តាមបទពិសោធន៍របស់លោកធ្លាប់ធ្វើជាអ្នកនេសាទដែរនោះ លោកគ្រាន់តែដឹងថា ត្រីក្រពត មានច្រើនប្រភេទ គឺមានត្រីដែលបរិភោគបាន និងត្រីពុល។ កន្លងមក ក៏ធ្លាប់មានពលរដ្ឋរស់នៅតាមខេត្តពុលត្រីក្រពតស្លាប់ជាច្រើននាក់ដែរដូចជា ខេត្តសៀមរាប និងខេត្តកំពង់ឆ្នាំងជាដើម។ មន្ត្រីជំនាញផ្នែកនេសាទ និងអ្នកវិទ្យាសាស្ត្របញ្ជាក់ថា គ្រឿងក្នុងរបស់ត្រីក្រពត ជាពិសេសថ្លើមរបស់ត្រីនេះ មានជាតិពុលខ្លាំងម្យ៉ាង ដែលមានឈ្មោះថា តេត្រូដូតុកស៊ីន (Tetrodotoxin)៕