Clik here to view.
លោកនាយករដ្ឋមន្ត្រី ហ៊ុន សែន កាលពីថ្ងៃទី២១ មករា បានព្រមាន កម្ចាត់រាល់ទម្រង់សារព័ត៌មានទាំងឡាយណាដែល លោកចោទថា ធ្វើការខុសវិជ្ជាជីវៈរបស់ខ្លួន និងសារព័ត៌មានទាំងឡាយដែលមិនបានចុះបញ្ជី និងបង់ពន្ធជូនរដ្ឋអោយបានត្រឹមត្រូវ។ ទោះជាយ៉ាងណា ក៏ដោយក្រុមអ្នក ឃ្លាំមើលនិយាយថា វិធានការម៉ឺងម៉ាត់របស់លោក ហ៊ុន សែន ទៅលើបញ្ហាចុះបញ្ជីសារព័ត៌មាន គឺគ្រាន់តែជាល្បិចមួយ ក្នុងការរឹតត្បិតសេរីភាពសាព័ត៌មាននៅកម្ពុជាប៉ុណ្ណោះ។
មេដឹកនាំដែលកាន់អំណាចយូរជាងគេក្នុងតំបន់អាស៊ីលោក ហ៊ុន សែន កាលពីថ្ងៃអាទិត្យបានគំរាមចាត់វិធានការផ្លូវច្បាប់ធ្ងន់ធ្ងរ ទៅលើបណ្ដាញសារព័ត៌មានទាំងឡាយណាដែលតែងតែជំរិតទារលុយពីប្រភព ដើម្បីចុះផ្សាយជាពិសេសពាក់ព័ន្ធករណីព្រៃឈើ ឬការជួញដូរឈើ សារព័ត៌មានដែលបើកដំណើរការ ដោយគ្មានច្បាប់ គ្មានចុះបញ្ជី មិនបានបង់ពន្ធ និងសារព័ត៌មានដែលលោកចោទថា បានតាំងខ្លួនជាចៅក្រម អ្នកកាត់សេចក្ដីជាដើម លើភាគីពាក់ព័ន្ធជាដើម៖ «ប្រភេទសារព័ត៌មានទីមួយគឺមិនត្រូវអោយមានតទៅទៀតទេ គឺជាប្រភេទព័ត៌មានដែលដើរតួបែបប្រភេទម៉ាហ្វីយ៉ា ដែលដើរតួបែប ជំរិតទាប្រាក់ មានលុយអោយបានផ្សាយ អត់លុយអោយអត់ផ្សាយ។ ប្រភេទសារព័ត៌មានទីពីរ គឺជាសារព័ត៌មានអត់ច្បាប់ មិនគោរពច្បាប់ មិនចុះបញ្ជីតាមច្បាប់ នឹងរត់គេចវេច លួចបន្លំអត់បង់ពន្ធ។ ក្រោយបែករឿង គេដើរតួសម្ដែងជាអ្នករងគ្រោះខាងនយោបាយ តាមរបៀបថ្មីដើម្បីទទួលបានការកោតសរសើរពីប្រទេសរបស់ខ្លួន»។
ការគំរាមរបស់លោក ហ៊ុន សែន ធ្វើឡើងនៅចំពោះមុខក្រុមអ្នកសារព័ត៌មានជាង ៣៤០០នាក់ នៅមណ្ឌលពាណិជ្ជកម្ម និងពិព័រណ៍កោះពេជ្រ កាលពីយប់ថ្ងៃទី២១ ខែមករា ដែលជាជំនួបលើកទី២ រវាងនាយករដ្ឋមន្ត្រី និងអ្នកកាសែត។
កាលពីឆ្នាំ២០១៧ ក្នុងជំនួបលើកទី១ រវាងនាយករដ្ឋមន្ត្រី និងក្រុមអ្នកកាសែត ពួកគេបានត្អូញត្អែរថាមិនមានឱកាសជួបជជែកដោយផ្ទាល់ ជាមួយលោក ហ៊ុន សែន ដើម្បីបង្ហាញពីឧបសគ្គ និងរៀបរាប់ពីទុក្ខលំបាករបស់ពួកគេក្នុងពេលបំពេញមុខងារជាអ្នកសារព័ត៌មាននៅកម្ពុជាឡើយ។
នៅក្នុងជំនួបនោះ ពួកគេបានត្រឹមតែអង្គុយស្ដាប់ចំហមាត់ស្ដាប់ការទូន្មាន របស់លោក ហ៊ុន សែន ដែលតាំងខ្លួនជាអ្នកជំនាញសារព័ត៌មានប៉ុណ្ណោះ។
ចំណែកនៅក្នុងជំនួបលើកទី២នេះ ក៏មិនខុសគ្នាពីជំនួបលើកទី១ នោះដែរ។ ក្រោយការប្រដៅដល់ក្រុមអ្នកកាសែតរួច លោក ហ៊ុន សែន បានលើកកែវស្រាជាមួយក្រុមមន្ត្រីរបស់ជាន់ខ្ពស់របស់ លោកដើម្បីបញ្ចប់សារគំរាម។
ទោះជាយ៉ាងណាក៏ដោយ ក្រុមអ្នកឃ្លាំមើលសិទ្ធិមនុស្សបានវាយតម្លៃសារគំរាមរបស់លោក ហ៊ុន សែន អំពីការប្រើវិធានការក្ដៅទៅលើសារព័ត៌មានដែលមិនបានចុះបញ្ជី និងមិនបានបង់ពន្ធនោះថាគ្រាន់ តែជាការយកលេសដើម្បីបំបិទមាត់ក្រុមអ្នករិះគន់ និងធ្វើអោយសេរីភាពសារព័ត៌មានរួមតូចចង្អៀតក្នុងកណ្ដាប់ដៃនៃការគ្រប់គ្រងអំណាច ដោយគណបក្សតែមួយនោះ។
នាយករងទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃ វច្ឆ (Human Rights Watch) លោក ហ្វីល រ៉ូបើតសិន (Phil Robertson) អះអាងថា លោក ហ៊ុន សែន យកលេស គ្រប់បញ្ហាទាំងអស់ដើម្បីទម្លាក់កំហុសលើអ្នកសារព័ត៌មាន។
លោកបន្តថា ពេលខ្លះលោក ហ៊ុន សែន ប្រឌិតករណីមិនបង់ពន្ធ ហើយពេលខ្លះទៀតលោកបានគំរាមកំហែងអ្នកយកព័ត៌មានណា ដែលហ៊ានរាយការណ៍ប៉ះពាល់ដល់ចំណុចរសើបរបស់រដ្ឋាភិបាល។
លោក ហ្វីល រ៉ូបើតសិន បញ្ជាក់ថា ការរឹតត្បិតទាំងនេះគឺជាយុទ្ធសាស្ត្របំបិទសំឡេងសារព័ត៌មានឯករាជ្យ ដើម្បីឈានទៅរកការគ្រប់គ្រងរបបមួយដែលគ្មានការរិះគន់៖ «ជាយុទ្ធសាស្ត្រ វាគឺជាការព្យាយាមបំបិទសំឡេងអ្នកសារព័ត៌មាន ដែលហ៊ានសរសេររិះគន់រដ្ឋាភិបាលរបស់លោកដែលប្រព្រឹត្តអំពើពុករលួយ និងការរំលោភសិទ្ធិមនុស្សដោយអាជ្ញាធររដ្ឋាភិបាល ឬដោយក្រុមហ៊ុន ដែលមានទំនាក់ទំនងស្និទ្ធស្នាលជាមួយរដ្ឋាភិបាល។ យើងឃើញស្ថាប័នពន្ធដាររបស់រដ្ឋាភិបាលបានប្រឌិតរឿងរ៉ាវពាក់ព័ន្ធករណីមិន បង់ពន្ធរបស់កាសែត The Cambodia និងការបិទស្ថាប័ន ព័ត៌មាន ជាច្រើនដែលបានផ្សាយបន្ត ឲ្យវិទ្យុអាស៊ីសេរី និងវិទ្យុសំឡេងសហរដ្ឋអាមេរិក ដោយមិនអោយមានការបកស្រាយ។ បញ្ហាទាំងនេះគឺគ្រាន់ តែជាបុព្វហេតុក្នុងការបិទសំឡេងក្រុមសារព័ត៌មាន ដែលហ៊ានរិះគន់រដ្ឋាភិបាលប៉ុណ្ណោះ»។
ទោះជាយ៉ាងណាក៏ដោយ សមាគមកម្ពុជាការពារអ្នកកាសែត ដែលជាស្ថាប័នគាំទ្ររដ្ឋាភិបាលកាលពីថ្ងៃទី២១ ខែមករា បានចេញសេចក្ដីថ្លែងការណ៍សាទរភ្លាមៗដល់គោលជំហរ របស់លោក ហ៊ុន សែន ដែលពួកគេចាត់ទុកថាបានខិតខំពង្រីក និងពង្រឹងទំនាក់ទំនងបន្ថែមទៀតរវាងអ្នកកាសែត និងមន្ត្រីសាធារណៈដែលជាប្រភពផ្ដល់ព័ត៌មាន សម្រាប់បម្រើអោយការផ្សព្វផ្សាយព័ត៌មាន។
មន្ត្រីជាន់ខ្ពស់របស់អង្គការឃ្លាំមើលសិទ្ធិមនុស្សបានវាយតម្លៃថា សេរីភាពសារព័ត៌មាននៅកម្ពុជាតែងស្ថិតក្នុងភាពប្រថុយប្រថាន សម្រាប់អ្នកកាសែតហ៊ានផ្សព្វផ្សាយព័ត៌មានពិតក្នុងសង្គម។
លោក ហ្វីល រ៉ូបើតសិន អះអាងថា ចាប់តាំងពីឆ្នាំ១៩៩៣ មកមានអ្នកកាសែតជាច្រើនរូបបានបាត់ខ្លួន អ្នកខ្លះត្រូវ បានសម្លាប់ អ្នកខ្លះត្រូវបានសមត្ថកិច្ចចាប់ឃុំខ្លួន និងការបិទបណ្តាញសារព័ត៌មាន ជាច្រើនស្ថាប័ន។
ក្នុងរយៈពេលចុងក្រោយនេះ សមត្ថកិច្ចក្រោមរបបដឹកនាំរបស់លោក ហ៊ុន សែន បានចាប់ឃុំខ្លួនអតីតអ្នកយកព័ត៌មានរបស់អាស៊ីសេរី ពីររូបគឺលោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ដោយចោទប្រកាន់ពីបទលួចផលិត និងផ្តល់ព័ត៌មានឲ្យស្ថាប័នអាស៊ីសេរី ដែលមានមូលដ្ឋានក្នុងរដ្ឋធានីវ៉ាស៊ីនតុន។
តាមរយៈការចោទប្រកាន់នេះ អ្នកទាំងពីរ អាចប្រឈមនឹងការជាប់ឃុំឃាំង ពី៧ឆ្នាំ ដល់១៥ឆ្នាំ ក្នុងពន្ធនាគារ។
ក្រោយពីការចាប់ខ្លួនអតីតអ្នកយកព័ត៌មានអាស៊ីសេរីពីររូបនេះមក បាននាំអោយក្រុមអ្នកសារព័ត៌មានជាច្រើនដែលធ្លាប់រាយការណ៍អំពី ការរំលោភសិទ្ធិមនុស្ស អំពើពុករលួយ និងចំណុច អសកម្មរបស់រដ្ឋាភិបាលមានការភ័យខ្លាច ចំពោះសុវត្ថិភាពរបស់ពួកគេ។ មនុស្សភាគច្រើនបានរត់ភៀសខ្លួនទៅជ្រកកោននៅក្រៅប្រទេស អ្នកខ្លះទៀត បញ្ឈប់អាជីពជាអ្នកសារព័ត៌មាន ហើយខ្លះទៀតបានផ្លាស់ប្ដូរទីលំនៅតែម្ដង។
គណៈកម្មាធិការការពារអ្នកកាសែតដែលហៅកាត់ថា CPJ ដែលមានមូលដ្ឋានក្នុងបុរីញូវយ៉ក (New York) សហរដ្ឋអាមេរិកបានបង្ហាញថា ចាប់តាំងពីឆ្នាំ១៩៩២ មក យ៉ាងហោចណាស់មានអ្នកសាព័ត៌មានចំនួនជាង ១០នាក់ ត្រូវបានសម្លាប់ក្រៅប្រព័ន្ធច្បាប់ក្នុងប្រទេសកម្ពុជា។
អ្នកកាសែតទាំងនោះរួមមាន លោក ចាន់ តារា អ្នកកាសែតកោះសន្តិភាព លោក ជិត ដួងតារាវុធ មកពីសារព័ត៌មានអ្នកប្រយុទ្ធ លោក ជួ ជិតថារិទ្ធ អ្នកអត្ថាធិប្បាយរបស់វិទ្យុតាព្រហ្ម លោក ឃឹម សំបូរ អ្នកកាសែតមនសិការខ្មែរ និងអ្នកកាសែតជាច្រើនរូបទៀត មានទាំងអ្នកកាសែតបរទេសលោក មៃឃើល ស៊ីននៀ (Michael Senior) ផងដែរ។
លោក ហ្វីល រ៉ូបើតសិន អះអាងថា រដ្ឋាភិបាលកម្ពុជា គ្មានផ្លូវណាដែលត្រូវអនុញ្ញាតអោយមានបណ្ដាញសារព័ត៌មានឯករាជ្យ ដំណើរការនៅកម្ពុជាបានទៀតនោះទេ ដរាបណារដ្ឋាភិបាលរបស់ លោកនៅបន្តក្ដោបក្ដាប់ បន្តបំផ្លាញមូលដ្ឋានគ្រឹះនៃសារព័ត៌មាន អព្យាក្រឹត្យ និងមូលដ្ឋានគ្រឹះនៃប្រជាធិបតេយ្យដើម្បីបុព្វហេតុឆ្ពោះទៅរកការដឹកនាំអំណាចបែបផ្ដាច់ការ ដោយគណបក្សតែមួយនោះ៕