បុរសម្នាក់បានស្លាប់នៅនឹងកន្លែង នៅក្នុងប្រតិបត្តិការចុះបង្ក្រាបល្បែងជល់មាន់មួយកន្លែងដែលមានទីតាំងស្ថិតនៅក្រោយផ្សារកាណាស៊ីធី ក្នុងភូមិចោមចៅ សង្កាត់ចោមចៅ២ ខណ្ឌពោធិសែនជ័យ ក្រុងភ្នំពេញ នៅថ្ងៃអាទិត្យទី២១ ខែមករា ឆ្នាំ២០១៨នេះ។
ពលរដ្ឋដែលស្លាប់ក្នុងព្រឹត្តិការណ៍បង្ក្រាបល្បែងជល់មាន់នោះ មានឈ្មោះថា សៀក រ៉ន ភេទប្រុស អាយុ៣៣ឆ្នាំ មុខរបរជាកម្មកររោងចក្រ មានស្រុកកំណើតនៅខេត្តកំពង់ស្ពឺ ទីលំនៅបច្ចុប្បន្នស្នាក់ នៅបន្ទប់ជួលក្នុងភូមិចោមចៅ សង្កាត់ចោមចៅ២ ខណ្ឌពោធិសែនជយ័។
ប្រពន្ធជនរងគ្រោះឈ្មោះ ណុប ផានី បានរៀបរាប់ឲ្យដឹងថា មុនពេលកើតហេតុជនរងគ្រោះឈ្មោះសៀក រ៉ន មកពីហូបកាហ្វេ ហើយបានឡើងទៅបន្ទប់ជួលរបស់គាត់ បន្ទាប់មកគាត់បានអើត មើលគេលេងជល់មាន់នៅខាងក្រោមបន្ទប់។ ក្នុងគ្រាដដែលនោះ ស្រាប់តែកម្លាំងអន្តរាគមន៍នៃអធិការដ្ឋាននគរបាល ខណ្ឌពោធិសែនជ័យបានចុះទៅបង្ក្រាបក្រុមអ្នកលេងល្បែងជល់មាន់ ហើយបានបាញ់ឡើងទៅលើជាច្រើនគ្រាប់បណ្ដាលឲ្យត្រូវជនរងគ្រោះចំបំពង់កនិងដៃស្ដាំ។
ទាក់ទងករណីនេះ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ឃើញថា នេះជាការធ្វេសប្រហែស របស់សមត្ថកិច្ចក្នុងការចុះបំពេញការងារ។
លោក សន ជ័យ បន្តថា សមត្ថកិច្ចត្រូវទទួលខុសត្រូវទាំងស្រុងចំពោះការបាត់បង់អាយុជីវិតពលរដ្ឋខាងលើទាំងសំណងរដ្ឋប្បវេណី និងទោសព្រហ្មទណ្ឌ។
ជនរងគ្រោះដែលស្លាប់ក្នុងហេតុការណ៍បង្ក្រាបល្បែងជល់មាន់ នៅក្រោយផ្សារកាណាស៊ីធី បានស្លាប់នៅតាមផ្លូវពេលបញ្ជូនទៅកាន់មន្ទីរពេទ្យ ហើយពេលនេះសពជនរងគ្រោះតម្កល់នៅវត្តពោធិចិនតុង រង់ចាំ ឲគ្រួសារយកទៅធ្វើបុណ្យ៕