Clik here to view.
ពលរដ្ឋបុរីកីឡាប្រមាណ១០នាក់ លើកបដាតវ៉ានៅមុខផ្ទះ អ្នកស្រី ស៊ុយ សុផាន ម្ចាស់ក្រុមហ៊ុនផាន អ៊ីម៉ិច (Phan Imex) ទាមទាររកដំណោះស្រាយដើម្បីបញ្ចប់ជម្លោះតំបន់បុរីកីឡា ដែលនៅសេសសល់ ១០គ្រួសារ។
ពលរដ្ឋបុរីកីឡាលោកស្រី ង៉ូវ ណារី ថ្លែងកាលថ្ងៃទី១៧ មករា ថា ពួកគាត់នាំគ្នាទៅផ្ទះ អ្នកស្រី ស៊ុយ សុផាន ដើម្បីទាមទារឲ្យដោះស្រាយសំណងផ្ទះសម្បែង ដែលក្រុមហ៊ុននេះ បានឈូសកម្ទេចតាំងពីឆ្នាំ២០១២។ លោកស្រីអោយដឹងបន្តថា អ្នកស្រី ស៊ុយ សុផាន មិនបានចេញមកជួបពួកគាត់ទេ ប៉ុន្តែអ្នកស្រីបានបញ្ជាឲ្យអ្នកបើករថយន្តចេញមកជួបពលរដ្ឋ ដោយប្រាប់ឲ្យពួកគាត់ទៅចរចាជាមួយអាជ្ញាធរខណ្ឌ និងសាលារាជធានីភ្នំពេញវិញ ពីព្រោះ អ្នកស្រី ស៊ុយ សុផាន បានប្រគល់សិទ្ធិឲ្យអាជ្ញាធរហើយ។ លោកស្រីបញ្ជាក់ថា ដោយសារការចរចាជាមួយអាជ្ញាធរ និងសាលារាជធានីជាច្រើនលើកគ្មានដំណោះស្រាយទើបពួកគាត់ចង់ជួយអ្នកស្រី ស៊ុយ សុផាន ផ្ទាល់៖ «ថ្ងៃសុក្រខ្ញុំនឹងមកទៀត បើយាយផាន (ស៊ុយ សុផាន) គាត់នៅតែគេចមុខ មិនព្រមមកជួបពួកខ្ញុំមកដោះស្រាយបញ្ចប់នៅបុរីកីឡាទេ គាត់មិនអាចគេចរហូតទេ ថ្ងៃសុក្រខ្ញុំនឹងដាក់កន្ទេលទៅដេកចាំទល់ល្ងាចមិនត្រឡប់មកវិញទេ»។
កាលពីថ្ងៃទី១៥ មករា អាជ្ញាធរខណ្ឌ៧មករា បានរារាំងពលរដ្ឋបុរីកីឡា មិនឲ្យទៅផ្ទះ អ្នកស្រី ស៊ុយ សុផាន ម្ដងរួចហើយ ដោយតម្រូវឲ្យសហគមន៍បុរីកីឡា ចរចាជាមួយអភិបាលខណ្ឌ៧មករា លោក លឹម សុភា ប៉ុន្តែការចរចាមិនត្រូវរ៉ូវគ្នា។ អាជ្ញាធរខណ្ឌបានយល់ព្រមដោះស្រាយឲ្យពលរដ្ឋក្នុងមួយគ្រួសារ ១ម៉ឺន ៥ពាន់ដុល្លារ។ ពួកគាត់អះអាងថា ក្នុងចំណោមអ្នកភូមិ១០គ្រួសារដែលនៅសេសសល់ មាន២គ្រួសារទាមទារសំណងផ្ទះមួយបន្ទប់ នៅជាន់ទី២ នៃអាគារបុរីកីឡា ឬប្រាក់៣ម៉ឺនដុល្លារ និង៨គ្រួសារទៀត ទាមទារប្រាក់២ម៉ឺន ៥ពាន់ដុល្លារក្នុងមួយគ្រួសារ។
ថ្វីត្បិតតែខកខានមិនបានជួប អ្នកស្រី ស៊ុយ សុផាន ជាម្ចាស់អភិវឌ្ឍន៍តំបន់បុរីកីឡា អ្នកភូមិអះអាងថា ពួកគាត់នឹងព្យាយាមជួយអ្នកស្រីផ្ទាល់ ដោយសង្ឃឹមថានឹងមានដំណោះស្រាយបញ្ចប់ជម្លោះតំបន់បុរីកីឡាឲ្យបានឆាប់៕
