Clik here to view.
ពលរដ្ឋទាំង ១១គ្រួសារ នៅសហគមន៍បុរីកីឡា ដែលមិនព្រមទទួលយកសំណង់មិនសមរម្យពីក្រុមហ៊ុន ផាន អ៊ីមិច លើកគ្នាទៅមុខសាលារាជធានីភ្នំពេញជាថ្មីម្ដងទៀត នៅព្រឹកថ្ងៃទី១០ ខែមករា ដើម្បីតាមដានញត្តិ ដែលពួកគាត់បានដាក់ជូនសាលាក្រុង កាលពីថ្ងៃទី១៥ និងថ្ងៃទី២៩ ខែធ្នូ ឆ្នាំ២០១៧។
តំណាងសហគមន៍បុរីកីឡា មិនទាន់ទទួលបានការចម្លើយតបចំពោះញត្តិដែលទាមទារសំណងជាប្រាក់ចំនួនពីរម៉ឺន ប្រាំពាន់ ដុល្លារអាមេរិក (២៥.០០០) ដោយតែសារមន្ត្រីសាលាក្រុងភ្នំពេញ ដែលទទួលញត្តិ ប្រាប់ពួកគាត់ថា ញត្តិនោះថ្នាក់លើមិនទាន់បានទម្លាក់មកឱ្យគាត់វិញទេ។
តំណាងសហគមន៍បុរីកីឡា អ្នកស្រី ង៉ូវ ណារី ឲ្យដឹងថា មន្ត្រីសាលាក្រុងបានប្រាប់ឲ្យពួកគាត់ត្រលប់ទៅផ្ទះរៀងៗខ្លួនវិញ ដោយមិនហ៊ានសន្យាថា ញត្តិនោះនឹងត្រូវអភិបាលក្រុងភ្នំពេញ ពិនិត្យនៅថ្ងៃណានោះទេ។ អ្នកស្រីបន្តថា ក្រុមពលរដ្ឋមិនមានសង្ឃឹមថា ញត្តិនោះត្រូវបានអាជ្ញាធរយកចិត្តទុកដាក់ដើម្បីដោះស្រាយឱ្យពួកគាត់ទាំង១១គ្រួសារនោះទេ៖ «គោលបំណងខ្ញុំ ខ្ញុំទាមទារផ្ទះខ្ញុំនៅបុរីកីឡាវិញ តែអាជ្ញាធរថា គ្មានផ្ទះទេ ឲ្យសំណូមពរជាលុយទៅហើយ ពួកខ្ញុំក៏សំណូមពរ ជាលុយដើម្បីទិញផ្ទះវិញ ទិញផ្ទះវិញបាន ខ្ញុំថាទិញផ្ទះឲ្យពួកខ្ញុំមកក៏ខ្ញុំសុខចិត្តដែរ តែទីបំផុតគ្មានដោះស្រាយឲ្យពួកខ្ញុំទេ មានតែគំរាម គំរាមឡើងឆ្អែត ឆ្អន់ហើយ លើកណាក៏គំរាមពួកខ្ញុំដែរ។ ចាប់ ដាក់ឡាន អត់មាន ជំហរដោះស្រាយទេ បើគាត់និយាយទៅណា អានេះវាប៉ុន្មាន អញ្ចឹងអីទៅ ប៉ុន្តែគាត់គ្មានឆន្ទៈដោះស្រាយទេ អានេះ អត់ម៉ង អត់ឆន្ទៈម៉ង»។
សហគមន៍មានជម្លោះដីធ្លីនៅបុរីកីឡា បានដាក់ញត្តិជូនអាជ្ញាធរក្រុងភ្នំពេញ កាលព្រឹកថ្ងៃសុក្រ ទី២៩ ខែធ្នូ ដោយស្នើសុំឲ្យអាជ្ញាធរជួយរកដំណោះស្រាយដ៏សមរម្យមួយ ដើម្បីអាចឲ្យពួកគាត់ទាំង ១១គ្រួសារ ទទួលបានសិទ្ធិស្នាក់នៅក្នុងអគារដែលអភិវឌ្ឍន៍ដោយក្រុមហ៊ុន ផាន អ៊ីម៉ិច នៅលើដីរបស់ពួកគាត់ក្នុងតំបន់បុរីកីឡា ឬត្រូវផ្ដល់ជូនពួកគាត់នូវទឹកប្រាក់ ២៥.០០០ដុល្លារ។
តំណាងសហគមន៍បុរីកីឡាម្នាក់ទៀត គឺអ្នកស្រី សរ ស៊ន ធ្លាប់ឲ្យដឹងថា ប្រាក់ ២៥.០០០ដុល្លារ ដែលស្នើសុំនោះ ដើម្បីយកទៅទិញអគារស្នាក់នៅរបស់ក្រុមហ៊ុន ផាន អ៊ីម៉ិច វិញ។ ពលរដ្ឋនៅបុរីកីឡាថា ពួកគាត់មិនចង់ទៅរស់នៅតំបន់ដាច់ស្រយាល ក្នុងភូមិអណ្ដូង ជាយរាជធានីភ្នំពេញ តាមការរៀបចំរបស់សាលារាជធានីនោះទេ ព្រោះបុរីកីឡា ជាផ្ទះរបស់ពួកគាត់ និងជាកន្លែងដែលពួកគាត់បានប្រកបអាជីវកម្មរស់នៅយូរណាស់មកហើយ។
អភិបាលរងរាជធានីភ្នំពេញ លោក មាន ចាន់យ៉ាដា ធ្លាប់ចេញសេចក្ដីជូនដំណឹងកំណត់ត្រឹមថ្ងៃទី២២ ខែធ្នូ តម្រូវឲ្យពលរដ្ឋដែលមិនទាន់ទទួលយកសំណងពីក្រុមហ៊ុន ផាន អ៊ីម៉ិច ត្រូវទៅទទួលយកសំណងជាកំហិត។
អភិបាលរងរូបនោះព្រមានថា ប្រសិនបើផុតរយៈពេលកំណត់នេះ ហើយពលរដ្ឋនៅតែមិនព្រមទទួលយកសំណង់ នោះអាជ្ញាធរនឹងអនុវត្តវិធានការរដ្ឋបាល និងប្រើប្រាស់យន្តការតុលាការ ដោយមិនទទួលខុសត្រូវចំពោះការបាត់បង់ផលប្រយោជន៍ និងថែមទាំងបញ្ឈប់រាល់ការដោះស្រាយសំណង។ អាជ្ញាធរទីក្រុងភ្នំពេញចាត់ទុកពលរដ្ឋទាំងនោះបោះបង់សិទ្ធិក្នុងការទទួលយកសំណងគោលនយោបាយរបស់ខ្លួន។ មកដល់ពេលនេះ ក្រុមសហគមន៍បុរីកីឡា ដែលមិនព្រមទទួលយកសំណងប្រាប់ថា ពួកគាត់មិនទាន់រងការបណ្ដេញចេញទាំងបង្ខំនោះទេ។
ពាក់ព័ន្ធនឹងការចោទប្រកាន់ថា សាលាក្រុងគ្មានឆន្ទៈ ក្នុងការដោះស្រាយឲ្យពលរដ្ឋទាំង ១១គ្រួសារ ក្រៅពីបង្ខំឲ្យចាកចេញទៅរស់នៅភូមិអណ្ដូង។ អាស៊ីសេរីមិនអាចទាក់ទងអ្នកនាំពាក្យសាលារាជធានីភ្នំពេញបានទេ នៅថ្ងៃទី១១ ខែមករា។ ប៉ុន្តែ សង្គមស៊ីវិល បង្ហាញក្ដីជំនឿថា អាជ្ញាធរអាចនឹងកំពុងពិចារណា រកដំណោះស្រាយសមរម្យណាមួយ សម្រាប់ជូនពួកគាត់ទាំង១១គ្រួសារ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សូផាត ស្នើសុំឲ្យពលរដ្ឋដែលបានទៅស្វែងរកដំណោះស្រាយ កុំទាន់អាលវាយតម្លៃទៅលើអាជ្ញាធរក្រុងភ្នំពេញ ព្រោះលោកសង្កេតឃើញថា កន្លងមកអាជ្ញាធរខណ្ឌ៧មករា បានហៅពលរដ្ឋមួយចំនួន ក្នុងចំណោម ១១គ្រួសារ ទៅចរចាតម្លៃរួចហើយ។ ប៉ុន្តែ ទោះជាយ៉ាងណា លោកស្នើឲ្យសាលាក្រុងភ្នំពេញ ពន្លឿនការពិចារណា ដើម្បីអោយឆាប់បញ្ចប់ករណីនេះ។
លោក វណ្ណ សូផាត លើកទឹកចិត្តឲ្យភាគីទាំងពីរ ចរចាគ្នារកដំណោះស្រាយរួមដែលអាចទទួលយកបាន៖ «បន្តការចរចាទៅទៀត ទោះបីជាយ៉ាងណាក៏ដោយ កុំឲ្យចាត់វិធានការអីមួយ ដែលធ្លាក់ចូលទៅក្នុងបទពិសោធន៍នៅឆ្នាំ២០១២ មានការបណ្ដេញចេញដោយបង្ខំអីហ្នឹង។ យើងខំកសាងគុណសម្បត្តិមួយគំនរហើយ ហើយបើសិនជាកើតឡើងនៅពេលហ្នឹងទៀត គឺថា គុណសម្បត្តិដែលមានពីមុនមក វាត្រូវអស់រលីង ហើយថែមទាំងប៉ះពាល់ដល់កិត្តិសព្ទរាជរដ្ឋាភិបាលទៀតបាទ»។
ពលរដ្ឋដែលមានជម្លោះនៅសហគមន៍បុរីកីឡា មានគម្រោងថា ក្រោយពីពួកគាត់មិនទទួលបានចម្លើយពីអាជ្ញាធរ ពួកគាត់នឹងទៅបន្តការទាមទារ នៅមុខភូមិគ្រឹះម្ចាស់ក្រុមហ៊ុន ផាន អ៊ីមិច នៅថ្ងៃសុក្រ សប្ដាហ៍នេះបន្តទៀត។ អ្នកស្រី ង៉ូវ ណារី ព្រមានថា សហគមន៍បុរីកីឡា នឹងនាំគ្នាលើកបដាទាមទារឲ្យអភិបាលរង សាលារាជធានីភ្នំពេញ លោក មាន ចាន់យ៉ាដា ចុះចេញពីតំណែង ប្រសិនបើអាជ្ញាធររូបនេះ នៅតែអសមត្ថភាពក្នុងការរកដំណោះស្រាយឲ្យពលរដ្ឋរងគ្រោះនៅបុរីកីឡាតទៅទៀត៕