សមាជិកក្រុមប្រឹក្សាឃុំព្រែកជីកគណបក្សសង្គ្រោះជាតិ ស្រុករុក្ខគិរី ខេត្តបាត់ដំបងចំនួន៥នាក់ បន្តគេចខ្លួន មិនហ៊ានចូលផ្ទះនៅឡើយទេ ដោយបារម្ភពីសុវត្ថិភាព បន្ទាប់មន្ត្រីគណបក្សកាន់អំណាចនៅក្នុងឃុំបន្តអូសទាញពួកគាត់ឲ្យចុះចូលគណបក្សរបស់ខ្លួន។ សមាជិកក្រុមឃុំព្រែកជីកគណបក្សប្រជាជនកម្ពុជាអះអាងថា មន្ត្រីរបស់រដ្ឋអំណាចមិនបានទៅធ្វើទុក្ខបុកម្នេញ សកម្មជនគណបក្សប្រឆាំងទេ គឺពួកគាត់ភ័យខ្លាចដោយខ្លួនឯង។
សមាជិកក្រុមប្រឹក្សាគណបក្សសង្គ្រោះជាតិ ឃុំព្រែកជីកលើកឡើងថា ពួកគាត់មិនអាចនៅផ្ទះបានទេ ពីព្រោះសន្ទុះនៃការអូសទាញឲ្យចុះចូលគណបក្សកាន់អំណាច មិនទាន់ឈប់នៅឡើយ។
មេឃុំព្រែកជីកគណបក្សសង្គ្រោះជាតិ ដែលទើបបញ្ចប់តំណែងដោយអំណាចតុលាការកំពូលរំលាយគណបក្ស លោក ចក់ បូថា មានប្រសាសន៍នៅថ្ងៃទី៩ មករា ថា ប្រសិនបើពួកគាត់មិនគេចខ្លួនទេ នឹងប្រឈមការអូសទាញកាន់តែខ្លាំង ជាក់ស្ដែងកាលពីថ្ងៃទី១ មករា សមាជិកក្រុមប្រឹក្សាឃុំគណបក្សកាន់អំណាចបបួលលោកឲ្យចុះចូលគណបក្សខ្លួន ខណៈដែលលោកត្រឡប់ទៅលេងផ្ទះមួយស្របក់ ក៏ប៉ុន្តែលោកថាមិនបានចុះចូលនោះទេ ហើយក៏នាំប្រពន្ធខ្លួនគេចទៅនៅទីសុវត្ថិភាពវិញ៖ «ដោយខ្ញុំមិនមានបំណងបម្រើ ព្រោះការដោះស្រាយកន្លងមកមិនមានភាពច្បាស់លាស់ ជាមួយពលរដ្ឋបានជាខ្ញុំមិនចូលបក្សកាន់អំណាច ព្រោះប្រជាពលរដ្ឋគាត់នៅតែមានការឈឺចាប់ដោយការដោះស្រាយមានភាពអយុត្តិធម៌ផ្សេងៗ»។
លោកបន្ថែមទៀតថា សព្វថ្ងៃសមាជិកក្រុមប្រឹក្សាឃុំព្រែកជីក ចំនួន៥នាក់បន្តរត់គេចខ្លួនទាំងអស់គ្នា ពុំបានចូលមករស់នៅផ្ទះសម្បែងរបស់ខ្លួននៅឡើយទេ។ ទន្ទឹមគ្នានេះ ពួកគេក៏មិនហ៊ានប្រកបរបរចិញ្ចឹមជីវិតនៅឯងស្រុកកំណើតដែរ ដោយម្នាក់ៗរស់នៅពឹងផ្អែកទៅលើសាច់ញាតិ និងកូនទៅធ្វើការនៅប្រទេសថៃ។
សមាជិកក្រុមប្រឹក្សាឃុំព្រែកជីកគណបក្សប្រជាជនកម្ពុជាលោក មូល ពិន អះអាងថា គ្មានមន្ត្រីរដ្ឋអំណាចណាថ្លើមធំទៅធ្វើទុក្ខបុកម្នេញដល់មន្ត្រីគណបក្សប្រឆាំងនោះឡើយ ផ្ទុយទៅវិញលោកថាមន្ត្រីបក្សប្រឆាំងទាំងនោះភ័យដោយខ្លួនឯង ហើយរត់គេចដើម្បីបានសិទ្ធិទៅរស់នៅក្រៅប្រទេសទៅវិញទេ៖ «ទេអត់មានបញ្ហាអីទេ ពួកភូមិឃុំអីក៏មិនមានស្អីដែរ មានតែហៅពួកគាត់មកចូលរួមវិញផង ទាំងថ្នាក់ដឹកនាំរាជរដ្ឋាភិបាល និងហៅផ្ទាល់ក៏មានមកហើយដែរ តែគេមិនចូលយើងមិនដឹងមិច»។
សកម្មជនព្រះសង្ឃការពារសិទ្ធិមនុស្ស ព្រះតេជព្រះគុណ លួន សុវ៉ាត មានថេរដីកាថា សកម្មភាពនយោបាយដោយការអូសទាញ ឬការគំរាមកំហែងទៅលើមន្ត្រីគណបក្សនយោបាយដៃគូប្រកួត គឺជាទង្វើមួយធ្វើឲ្យមនុស្សភ័យខ្លាច ហើយរស់នៅមិនមានសេចក្ដីសុខ។ ព្រះតេជព្រះគុណ មានថេរដីកាបន្ថែមថា មូលហេតុដែលគ្មានសេចក្ដីសុខព្រោះអាចប្រឈមនឹងការមួលបង្កាច់ ការចោទប្រកាន់ផ្សេងៗ មកលើមន្ត្រីនោះ ដោយប្រើប្រព័ន្ធតុលាការដើម្បីគាបសង្កត់ចាប់ដាក់ពន្ធនាគារបាន៖ «គ្មានអ្នកណាមួយចង់ឃ្លាតឆ្ងាយពីផ្ទះសម្បែងពីភូមិកំណើតនោះទេ តែនេះដោយសារស្ថានការណ៍នយោបាយបង្ខំទើបពួកគាត់ទៅទាំងបង្ខំ រត់ចោលផ្ទះទាំងបង្ខំដើម្បីទៅរកទីកន្លែងមានសុវត្ថិភាពផ្សេងៗ ដើម្បីសេចក្ដីនឹងឯង»។
ព្រះតេជព្រះគុណមានថេរដីកាបន្ថែមទៀតថា ដើម្បីដោះស្រាយបញ្ហានេះបាន ដោយថ្នាក់ដឹកនាំគណបក្សធំៗទាំង២ ឈប់លាបពណ៌យកឈ្នះយកចាញ់ដាក់គ្នា មានគុណធម៌ដោយចេះគោរពគ្នាទៅវិញទៅមក ហើយងាកមកគិតប្រយោជន៍ប្រទេសជាតិជាធំ នោះពលរដ្ឋខ្មែរនឹងមានសេចក្ដីសុខទាំងអស់គ្នាជាពុំខាន៕