Clik here to view.
ក្រុមមេធាវីការពារក្ដីឲ្យលោក កឹម សុខា ប្រធានគណបក្សសង្គ្រោះជាតិ គ្រោងដាក់សំណើជាលើកទី១ ដើម្បីស្នើសុំឲ្យចៅក្រមស៊ើបសួរអនុញ្ញាតឲ្យលោក កឹម សុខា បាននៅក្រៅឃុំបណ្ដោះអាសន្ន។ សំណើសុំនៅក្រៅឃុំនេះធ្វើឡើងក្រោយពេលចៅក្រមស៊ើបសួរបានបដិសេធសំណើសុំប្ដូរពន្ធនាគារឃុំឃាំងលោក កឹម សុខា ពីពន្ធនាគារត្រពាំងផ្លុង ក្នុងខែត្រត្បូងឃ្មុំ ជិតព្រំដែនវៀតណាម មកនៅមន្ទីរឃុំឃាំងនគរបាលក្រុងភ្នំពេញ ប៉េហ្ស៊ី (PJ) និងពន្ធនាគារព្រៃស នារាជធានីភ្នំពេញ វិញ។
មេធាវីម្នាក់ក្នុងចំណោមមេធាវី ៧នាក់ ដែលការពារក្ដីឲ្យលោក កឹម សុខា គឺលោកមេធាវី សំ សុគង់ ប្រាប់ថា ក្រុមមេធាវីបានព្រាងសំណើសុំដោះលែងលោក កឹម សុខា អោយនៅក្រៅឃុំជាបណ្ដោះអាសន្នរួចរាល់អស់ហើយ បើទោះជាមិនទាន់កំណត់ថ្ងៃក៏ដោយ។ មេធាវីរូបនេះអះអាងថា លោកនឹងដាក់សំណើសុំជូនចៅក្រមស៊ើបសួរនៅក្នុងសប្ដាហ៍នេះ៖ «»។
កាលពីថ្ងៃទី៥ ខែមករា ក្រុមមេធាវីបានទៅជួបលោក កឹម សុខា នៅពន្ធនាគារត្រពាំងផ្លុង ដើម្បីជម្រាបអំពីការវិវត្តន៍ស្ថានភាពនយោបាយចុងក្រោយ និងដីកាកោះរបស់សាលាដំបូងក្រុងភ្នំពេញ ដែលបានកោះហៅលោក ម៉ម សូណង់ដូ នាយកវិទ្យុសំបុកឃ្មុំ ឱ្យចូលឆ្លើយបំភ្លឺក្នុងនាមជាសាក្សីក្នុងសំណុំរឿងក្ដីលោក កឹម សុខា។
លោក កឹម សុខា ត្រូវបានសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ ពីបទក្បត់ជាតិ។ លោកត្រូវបានសមត្ថកិច្ចចាប់បញ្ជូនទៅពន្ធនាគារត្រពាំងផ្លុង នៅថ្ងៃទី៦ ខែកញ្ញា។ បន្ទាប់មកចៅក្រមស៊ើបសួរ លោក គី ឫទ្ធី មិនបានអនុញ្ញាតឲ្យសមត្ថកិច្ចដឹកលោក កឹម សុខា ទៅស៊ើបសួរនៅក្នុងបរិវេណតុលាការនោះទេ ហើយចៅក្រមបានបើកការស៊ើបសួរនៅក្នុងបន្ទប់ឃុំឃាំងក្នុងពន្ធនាគារត្រពាំងផ្លុង តែម្ដង។
លោកមេធាវី សំ សុគង់ ឲ្យដឹងថា សវនាការស៊ើបសួរក្នុងពន្ធនាគារត្រពាំងផ្លុង កាលពីថ្ងៃទី២១ ខែធ្នូ មិនមានវត្តមានមេធាវីនោះទេ ហើយមួយថ្ងៃក្រោយមក ចៅក្រមស៊ើបសួរ លោក គី ឫទ្ធី ក៏មិនបានទៅសួរនាំលោក កឹម សុខា ទៀតនោះដែរ។ លោកនាំសម្ដីរបស់កូនក្ដីថា លោក កឹម សុខា ស្នើសុំឲ្យចៅក្រមឈប់បើកសវនាការស៊ើបសួរក្នុងពន្ធនាគារទៀត ព្រោះលោកអស់អ្វីឆ្លើយជាមួយចៅក្រមហើយ។ លោកបន្តថា លោក កឹម សុខា ទាមទារឲ្យចៅក្រមបើកការស៊ើបសួរនៅក្នុងសាលាដំបូងរាជធានីភ្នំពេញវិញ។
អ្នកវិភាគនយោបាយឯករាជ្យ លោកបណ្ឌិត ឡៅ ម៉ុងហៃ វិភាគថា សំណើសុំនៅក្រៅឃុំរបស់មេធាវី លោក កឹម សុខា នឹងមិនទទួលបានជោគជ័យទេ។ លោកបណ្ឌិត ឡៅ ម៉ុងហៃ យល់ថា សំណើរបស់មេធាវី គ្រាន់តែបានជួយបន្ទរ ជួយរំលឹក និងជួយដាស់តឿនថា ការចាប់ខ្លួនលោក កឹម សុខា កន្លងមក គឺជាការចាប់ខ្លួនដោយខុសច្បាប់ ខុសនីតិវិធី៖ «»។
អ្នកវិភាគជើងចាស់រូបនេះអះអាងថា លោក កឹម សុខា អាចនឹងត្រូវដោះលែងវិញ លុះត្រាតែមានសម្ពាធដែលប៉ះពាល់ដល់ផលប្រយោជន៍របស់ថ្នាក់ដឹកនាំរដ្ឋាភិបាលធ្ងន់ធ្ងរ។
ពាក់ព័ន្ធនឹងករណីលោក កឹម សុខា នេះដែរ ចៅក្រមស៊ើបសួរ លោក គី ឫទ្ធី នៅថ្ងៃទី២២ ខែធ្នូ បានចេញដីកាកោះហៅប្រធានវិទ្យុសំបុកឃ្មុំ លោក ម៉ម សូណង់ដូ ដើម្បីសាកសួរអំពីដំណើររឿងសន្ទិដ្ឋភាពជាមួយបរទេស ដែលប្រព្រឹត្តិដោយលោក កឹម សុខា។ លោក ម៉ម សូណង់ដូ បានហៅដីកានោះថា ជាអន្ទាក់ដើម្បីចាប់លោក។
នៅថ្ងៃទី៩ ខែមករា លោក ម៉ម សូណង់ដូ បានចេញលិខិតជាលើកទី២ ដើម្បីជម្រាបទៅចៅក្រមស៊ើបសួរ លោក គី ឫទ្ធី វិញថា គ្រូពេទ្យទើបបញ្ជាក់ប្រាប់លោកថា ការពិនិត្យសុខភាពនៅប្រទេសបារាំង នឹងត្រូវបញ្ចប់នៅថ្ងៃទី២ ខែកុម្ភៈ។ ហេតុដូច្នេះ លោកមិនអាចចូលរួមតាមឋការកំណត់កោះហៅរបស់សាលាដំបូងរាជធានីភ្នំពេញ នោះទេ។ ក្នុងលិខិតដែលសរសេរជូនចៅក្រមស៊ើបសួរ លោក គី ឫទ្ធី នៅថ្ងៃទី៩ មករា បន្តថា លោក ម៉ម សូណង់ដូ នឹងជម្រាបជូនចៅក្រមម្ដងទៀត នៅពេលខាងមុខយ៉ាងខ្លីនូវថ្ងៃដែលលោកត្រូវត្រឡប់ទៅស្រុកខ្មែរវិញ៕
