ប្រមុខរដ្ឋាភិបាលកម្ពុជា លោក ហ៊ុន សែន អះអាងថា កងកម្លាំងប្រដាប់អាវុធ ជាពិសេសកងទ័ព ដាច់ខាតត្រូវចេញមុខការពាររដ្ឋាភិបាល មិនអាចការពារគណបក្សនយោបាយដែលធ្វើខុសច្បាប់នោះទេ។ លោក ហ៊ុន សែន ថ្លែងបែបនេះនៅក្នុងពិធីសម្ពោធ និងបើកការដ្ឋានសាងសង់សាលាហ្វឹកហ្វឺនជំនាញចារកម្ម នៅខណ្ឌព្រែកព្នៅ រាជធានីភ្នំពេញ ព្រឹកថ្ងៃទី១២ ខែធ្នូ ឆ្នាំ២០១៧។
នៅចំពោះមុខនាយទាហាន នាយទាហានរង ពលទាហាន និងមន្ត្រីជាន់ខ្ពស់រដ្ឋាភិបាលជាច្រើនរូប លោកនាយករដ្ឋមន្ត្រី ហ៊ុន សែន បានចាប់ផ្ដើមសុន្ទរកថារបស់លោកដោយពាក្យទូន្មានថា កងទ័ពមិនមែនជាចៅហ្វាយនាយរបស់ប្រជាជននោះទេ តែជាខ្ញុំបម្រើដ៏ស្មោះត្រង់របស់ប្រជាជន ដូច្នេះកងកម្លាំងប្រដាប់អាវុធទាំងអស់ត្រូវខិតខំបម្រើប្រជាជនដោយក្ដីស្មោះត្រង់ ហើយត្រូវធ្វើអ្វីដែលស្របទៅតាមផលប្រយោជន៍របស់ប្រជាជន។ លោកថែមទាំងបានអះអាងទៀតថា គ្មានអ្នកដឹកនាំណាម្នាក់ ឬកងទ័ពផ្ដាច់ការណាមួយដែលអាចទទួលបានជោគជ័យដោយគ្មានការគាំទ្រពីប្រជាពលរដ្ឋនោះឡើយ។
ពាក្យទូន្មានប្រៀនប្រដៅមិនទាន់នឹងចប់ស្រួលបួលផង លោក ហ៊ុន សែន ដែលមានងារជានាយឧត្ដមសេនីយ៍ផុតលេខផ្កាយមាស៥ ផងនោះ ក៏ស្រាប់តែបានប្រកាសក្ដែងៗថា កងទ័ពមិនអាចមានជំហរអព្យាក្រឹត្យ ចំពោះគណបក្សនយោបាយណាដែលប្រឆាំងនឹងរដ្ឋាភិបាលឡើយ។
លោកបានលើកឡើងពីរឿងបដិវត្តន៍ពណ៌ ហើយថានៅប្រទេសដែលមានបដិវត្តន៍ពណ៌ គឺគេព្យាយាមធ្វើយ៉ាងណាឱ្យកងទ័ពមានអព្យាក្រឹត្យភាពដើម្បីទទួលបានជោគជ័យ ក៏ប៉ុន្តែនៅកម្ពុជាវិញ អព្យាក្រឹត្យភាពនេះ គ្មានដាច់ខាតចំពោះមុខរដ្ឋាភិបាល និងគណបក្សនយោបាយដែលលោកបានចោទថា បានរៀបចំធ្វើបដិវត្តន៍ពណ៌ គឺគណបក្សសង្គ្រោះជាតិ៖ «ត្រូវក្ដាប់ឱ្យបាន គ្មានទេពាក្យអព្យាក្រឹត្យរវាងម្ខាងរដ្ឋ បក្សនយោបាយ និងសង្គមស៊ីវិល។ យើងអព្យាក្រឹត្យតែចំពោះមុខបក្សនយោបាយដែលត្រូវមានការស្មើគ្នាក្នុងការប្រកួតប្រជែងនៅទីលានប្រជាធិបតេយ្យតាមរយៈការបោះឆ្នោត ឬតាមរយៈការបញ្ចេញមតិទាំងឡាយ ក៏ប៉ុន្តែនៅពេលដែលមានការបំពានទៅលើច្បាប់រដ្ឋ ត្រូវតែចេញមុខភ្លាមដើម្បីការពាររដ្ឋ មិនអាចបណ្ដែតបណ្ដោយបានទេ»។
លោក ហ៊ុន សែន បញ្ជាក់ថា លោកមិនមែនបញ្ជាកងទ័ពក្នុងក្របខ័ណ្ឌប្រធានគណបក្សប្រជាជនកម្ពុជានោះទេ តែក្នុងតួនាទីជានាយករដ្ឋមន្ត្រី។
ការដាស់តឿនកងកម្លាំងប្រដាប់អាវុធមិនតិចជាង ៥ដង អំពីរឿងអព្យាក្រឹត្យភាព ក្នុងសុន្ទរកថារយៈពេលមួយម៉ោងរបស់បុរសខ្លាំងរូបនេះ មិនមែនជារឿងចៃដន្យនោះទេ តែវាកើតឡើងក្រោយពេលដែលអតីតប្រធានគណបក្សសង្គ្រោះជាតិ និងជាដៃគូប្រកួតប្រជែងនយោបាយដ៏ស្វិតស្វាញរបស់លោក គឺលោក សម រង្ស៊ី បានចេញមុខអំពាវនាវដល់កងកម្លាំងប្រដាប់អាវុធទាំងអស់ កុំឱ្យស្ដាប់តាមបញ្ជារបស់លោក ហ៊ុន សែន និងមេទ័ពដែលបញ្ជាឱ្យបាញ់ប្រហារ និងសម្លាប់ប្រជាពលរដ្ឋស្លូតត្រង់៖ «អញ្ចឹងធ្វើយ៉ាងម៉េចឱ្យកូនទាហានមានទឹកចិត្ត កុំស្ដាប់តាមបញ្ជា ហ៊ុន សែន និងមេទ័ពដែលឱ្យមកសម្លាប់ប្រជារាស្ត្រ។ នៅពេលដែលមិនស្ដាប់បញ្ជាឱ្យមកសម្លាប់ប្រជារាស្ត្រ ពេលនោះគឺឈ្នះហើយ ដូចនៅអេហ្ស៊ីបដែលគេទម្លាក់ លោក ហូស្នី មូបារ៉ាក់ (Hosni Mubarak) កាលពីឆ្នាំ២០១១ គឺគ្រាន់តែទាហានប្រាប់ លោក មូបារ៉ាក់ ថា ខ្ញុំជាកងទ័ពមិនអាចសម្លាប់ពលរដ្ឋបានទេ»។
ជុំវិញរឿងនេះ អ្នកវិភាគនយោបាយឯករាជ្យ លោកបណ្ឌិត ឡៅ ម៉ុងហៃ ថ្លែងថា លោកមិនឃើញមានច្បាប់ណាចែងថា កងទ័ពមិនអាចប្រកាន់ជំហរអព្យាក្រឹត្យ ចំពោះអ្នកដែលមិនគាំទ្ររដ្ឋាភិបាលនោះទេ ផ្ទុយទៅវិញ ផ្អែកតាមច្បាប់ កងទ័ពត្រូវមានអព្យាក្រឹត្យភាពក្នុងមុខនាទី ក្នុងសកម្មភាពការងារ និងហាមឃាត់ការធ្វើសកម្មភាពជាគុណប្រយោជន៍ ឬប្រឆាំងនឹងគណបក្សនយោបាយ ឬបេក្ខជននយោបាយណាមួយ៖ «បញ្ហាគឺនៅត្រង់ថា អគ្គមេបញ្ជាការ និងមេបញ្ជាការជាច្រើននៃកងយោធពលខេមរភូមិន្ទ ជាសមាជិកគណបក្ស ហើយជាសមាជិកជាន់ខ្ពស់ទៀតផង ហើយចំណែកនាយករដ្ឋមន្ត្រីជាប្រធានគណបក្សកាន់អំណាច។ តាមការពិតយើងត្រូវមាននាយករដ្ឋមន្ត្រីស៊ីវិលទេ ហើយខ្ញុំមិនដឹងថា មានច្បាប់ណាដែលនាយករដ្ឋមន្ត្រីអាចស្លៀកពាក់ឯកសណ្ឋានយោធានៅពេលបំពេញភារកិច្ចជានាយករដ្ឋមន្ត្រី។ គាត់ជាសមាជិកសភា គាត់ជាតំណាងរាស្ត្រ ដូច្នេះគាត់ត្រូវព្យួរការងារជាមេបញ្ជាការ ឬមេទ័ព ឬជាយោធាដើម្បីមកបម្រើការក្នុងវិស័យស៊ីវិល»។
លោកបណ្ឌិត ឡៅ ម៉ុងហៃ បន្ថែមថា នៅក្នុងប្រទេសប្រជាធិបតេយ្យពិតប្រាកដ និងមាននីតិរដ្ឋត្រឹមត្រូវ គ្រប់សកម្មភាព និងការប្រើប្រាស់អំណាចរបស់រដ្ឋាភិបាលគឺត្រូវបានកំណត់ដោយច្បាប់ មិនអាចចេះតែធ្វើតាមអំពើចិត្តបានឡើយ តួយ៉ាងដូចជាការលើកឡើងអំពីបដិវត្តន៍ពណ៌ជាដើម ដែលលោកអះអាងថា ធ្វើឡើងដោយគ្មានមូលដ្ឋានច្បាប់ពិតប្រាកដ ដោយអ្នកកាន់អំណាច ដើម្បីបង្ក្រាបលើសំឡេងប្រឆាំងតែប៉ុណ្ណោះ។
ចាប់តាំងពីក្រោយការបោះឆ្នោតជាតិឆ្នាំ២០១៣ មក គេសង្កេតឃើញមេបញ្ជាការកងទ័ពជាច្រើនរូប បានចេញមុខស្បថស្បែការពារលោកនាយករដ្ឋមន្ត្រី ហ៊ុន សែន និងក្រុមគ្រួសាររបស់លោកជាបន្តបន្ទាប់។ ករណីចុងក្រោយបំផុត គឺការប្រកាសគាំទ្រសាលដីការំលាយបក្សសង្គ្រោះជាតិ ព្រមទាំងការប្ដឹងលោក សម រង្ស៊ី ទៅតុលាការរឿងញុះញង់កងទ័ពមិនឱ្យស្ដាប់បង្គាប់ ពីសំណាក់ក្រុមមេទ័ពដែលស្និទ្ធនឹងលោក ហ៊ុន សែន៕