អាជ្ញាធររឹបអូសបានភ្លុកដំរីជិតមួយតោន បង្កប់ក្នុងដុំឈើ លាក់ទុកក្នុងកុងតឺន័រចំនួន ៣ទូ នៅកំពង់ផែព្រះសីហនុ។ ភ្លុកដំរីសរុបជិត ២៨០ដុំ ត្រូវបានរកឃើញក្នុងកុងតឺន័រ រក្សាទុកនៅកំពង់ផែព្រះសីហនុ។ អាជ្ញាធរឲ្យដឹងថា កុងតឺន័រទាំង ៣ទូនេះ ដឹកជញ្ជូនដោយក្រុមហ៊ុន ខេម ត្រែនស៊ីត អ៊ីមផត (Cam Transit Import) មកពីប្រទេសម៉ូហ្ស៊ំប៉ិច (Mozambique) កាត់តាមប្រទេសកូឌីវ័រ (Ivry Coast) និងចូលមកដល់កំពង់ផែព្រះសីហនុ កាលពីចុងឆ្នាំ២០១៦។
ទីភ្នាក់ងារសារព័ត៌មានបារាំង អា.អេហ្វ.ប៉េ (AFP) បានស្រង់ប្រសាសន៍លោក លឹម ប៊ុនហេង ព្រះរាជអាជ្ញារងអមសាលាដំបូងខេត្តព្រះសីហនុ ឲ្យដឹងថា ក្រោយពីសង្ស័យថា មានវត្ថុចម្លែកបង្ហាញឲ្យដឹងតាមរយៈម៉ាស៊ីនស្កែនកុងតឺន័រ អាជ្ញាធរបានស្នើឲ្យចាស់ក្រុមហ៊ុនបើកកុងតឺន័រទាំងនោះដើម្បីធ្វើការត្រួតពិនិត្យ។ ប៉ុន្តែដោយសារម្ចាស់ក្រុមហ៊ុនកុងតឺន័រពុំបានបង្ហាញវត្តមាន អាជ្ញាធរបានសម្រេចធ្វើការឆែកឆេរ ទើបរកឃើញភ្លុកដំរីទាំងនេះ។
កាលពីខែធ្នូ ឆ្នាំមុន អាជ្ញាធរខ្មែរបានរកឃើញភ្លុកដំរីចំនួន ១,៥តោន លាក់ទុកក្នុងកុងតឺន័រ នៅតំបន់ជាយក្រុងភ្នំពេញ ដែលមានប្រភពមកពីប្រទេសម៉ូហ្ស៊ំប៉ិច ដូចគ្នាដែរ។
សារព័ត៌មានក្នុងស្រុករាយការណ៍ថា រដ្ឋាភិបាលបានសម្រេចរក្សាទុកភ្លុកដំរីទាំងនេះជាជាងកម្ទេចចោល ដែលការណ៍នេះបណ្តាលឲ្យមានការរិះគន់ពីសំណាក់ក្រុមអ្នកអភិរក្សសត្វព្រៃ។
ប្រទេសកម្ពុជា បានក្លាយជាច្រកដឹកជញ្ជូនសំខាន់មួយក្នុងតំបន់អាស៊ីនៃជំនួញជួញដូរសត្វព្រៃខុសច្បាប់ទៅលក់នៅប្រទេសវៀតណាម និងចិន៕