រដ្ឋាភិបាលកម្ពុជា បានប្រកាសយល់ព្រម ទទួលយកពលរដ្ឋខ្មែរដែលធ្លាប់មានទោស និងអ្នកទៅរស់នៅខុសច្បាប់ទាំងអស់មកកម្ពុជាវិញ ក្រោយពេលអាមេរិក បានផ្អាកចេញទិដ្ឋាការដល់មន្ត្រីជាន់ខ្ពស់ និងក្រុមគ្រួសារនៃក្រសួងការបរទេសកម្ពុជា ដើម្បីព្រមានឲ្យកម្ពុជា ទទួលយកពលរដ្ឋខ្មែរមានទោសនៅអាមេរិកមកវិញ។
លោកនាយករដ្ឋមន្ត្រី ហ៊ុន សែន នៅថ្ងៃពុធទី៦ ធ្នូ នេះ បានប្រកាសថា កម្ពុជាយល់ព្រមទទួលយកពលរដ្ឋខ្មែរដែលធ្លាប់មានទោស និងអ្នកទៅរស់នៅសហរដ្ឋអាមេរិក ខុសច្បាប់ក្រោយឆ្នាំ១៩៩៤ ត្រឡប់មកកម្ពុជាវិញ។
ក្នុងពិធីសំណេះសំណាលជាមួយកម្មកររោងចក្រជាង ១ម៉ឺននាក់ កាលពីព្រឹកថ្ងៃទី៦ ខែធ្នូ លោក ហ៊ុន សែន បានប្រកាសជាសាធារណៈថា កម្ពុជា និងអាមេរិក នឹងឈានដល់កិច្ចព្រមព្រៀងថ្មីមួយ ដើម្បីទទួលពលរដ្ឋខ្មែរដែលទៅរស់នៅសហរដ្ឋអាមេរិកដោយខុសច្បាប់ក្រោយ ឆ្នាំ១៩៩៤ ហើយ ស្នើដល់ពលរដ្ឋខ្មែរឲ្យឈប់ប្រថុយប្រថានទៅរស់នៅសហរដ្ឋអាមេរិក៖ «ប៉ុន្តែឥឡូវនេះខាងភាគីអាមេរិក ក៏បានស្នើឲ្យយើងទទួលយកជនជាតិកម្ពុជា ដែលបានទៅរស់នៅសហរដ្ឋអាមេរិកក្រោយ ឆ្នាំ១៩៩៤ ថែមទៀត។ បងប្អូនខ្មែរយើងដែលទៅរស់នៅអាមេរិកក្រោយឆ្នាំ ១៩៩៤ ឥឡូវអាមេរិក គេចង់បញ្ជូនត្រឡប់មកវិញ ខ្ញុំបានប្រាប់ សម្ដេចក្រឡាហោម ស ខេង ថា យើងត្រូវពិចារណាហើយអាចឈានដល់កិច្ចព្រមព្រៀងមួយសហរដ្ឋអាមេរិក ដើម្បីទទួលយកបងប្អូនយើងមកកាន់មាតុប្រទេសវិញ»។
លោកនាយករដ្ឋមន្ត្រីបានស្នើឲ្យសហរដ្ឋអាមេរិក ពិចារណាលើការផ្ដល់ថ្លៃសម្រាប់ការដឹកជញ្ជូន និងការរស់នៅដំណាក់កាលដំបូងរបស់ប្រជាពលរដ្ឋខ្មែរ ដែលត្រូវបានបញ្ជូនមកវិញនោះដើម្បីធានាដល់ការរស់នៅរបស់ពួកគេ។
ទោះជាយ៉ាងណាក៏ដោយ អ្នកវិភាគឯករាជ្យលោកបណ្ឌិត ឡៅ ម៉ុងហៃ មានប្រសាសន៍ថា ការទទួលយកពលរដ្ឋខ្មែរដែលធ្លាប់មានទោស និងអ្នករស់នៅខុសច្បាប់នៅសហរដ្ឋអាមេរិកនេះគឺដោយសារអាមេរិក បានបិទទិដ្ឋាការក្រុមមន្ត្រីជាន់ខ្ពស់នៃក្រសួងការបរទេសមិនអោយចូលសហរដ្ឋអាមេរិក៖ «អត់មានរឿងឆ្លាតវៃអីទេ វាជារឿងសំពាធរបស់សហរដ្ឋអាមេរិក។ ឃើញជាក់ស្ដែងគឺមិនចេញទិដ្ឋាការ (Visa) ឬទិដ្ឋាការអោយចូលសហរដ្ឋ អាមេរិកចំពោះមន្ត្រីជាន់ខ្ពស់នៃក្រសួងការបរទេសកម្ពុជា ហើយក៏សមស្របនឹងគោលនយោបាយរបស់អាមេរិកក្នុងការបញ្ជូនទណ្ឌិតបរទេសទៅប្រទេសរៀងៗខ្លួន»។
លោកបញ្ជាក់ថា គោលនយោបាយរបស់សហរដ្ឋអាមេរិកមានការផ្លាស់ប្ដូរទៅតាមអាណត្តិនៃប្រធានាធិបតីសហរដ្ឋអាមេរិក។ សម្រាប់អាណត្តិ នេះរដ្ឋាភិបាលសហរដ្ឋអាមេរិកបើកយុទ្ធនាការបញ្ជូនរាល់ជាតិសាសន៍ទាំងឡាយណាដែលធ្លាប់មានទោសអាមេរិក ឬរស់នៅខុសច្បាប់ទៅកាន់ប្រទេសកំណើតរបស់ពួកគេវិញ។
កម្ពុជា-អាមេរិក មានកិច្ចព្រមព្រៀងជាមួយគ្នាក្នុងការទទួលយកពលរដ្ឋខ្មែរដែលបានទៅរស់នៅអាមេរិកក្នុងអំឡុង ទសវត្សរ៍ឆ្នាំ៧០-៨០ ហើយបានប្រព្រឹត្តទោសនៅទីនោះ ប៉ុន្តែកាលពីពេលថ្មីៗនេះកម្ពុជា និងអាមេរិកបានកែប្រែលក្ខខណ្ឌនៃការទទួលយកពលរដ្ឋខ្មែរទាំងឡាយណាដែលទៅរស់នៅសហរដ្ឋអាមេរិក ក្រោយឆ្នាំ១៩៩៤ ថែមទៀត។
រហូតមកទល់ពេលនេះ ក្រុមមន្ត្រីខ្មែរកំពុងសម្ភាសន៍ពលរដ្ឋខ្មែរមួយចំនួន ដែលត្រូវបញ្ជូនត្រឡប់មកវិញ ខណៈមនុស្សមួយចំនួនកំពុងសម្រាកព្យាបាលជំងឺសិន។
អាមេរិកបានបញ្ជូនពលរដ្ឋខ្មែរប្រមាណជាង ៦០០នាក់ហើយ មកកាន់ប្រទេសកម្ពុជាចាប់តាំងពីឆ្នាំ ២០០២ ក្រោយពីប្រទេសទាំងពីរ បានចុះអនុស្សរណៈយោគយល់គ្នា។ កន្លងមក រដ្ឋាភិបាលកម្ពុជា ធ្លាប់ បានស្នើអាមេរិកធ្វើការកែប្រែលើលក្ខន្តិកៈ មួយចំនួនលើកិច្ចព្រមព្រៀង ស្ដីពីការបញ្ជូនពលរដ្ឋខ្មែរ ប៉ុន្តែការស្នើនេះ គ្មានប្រសិទ្ធភាពនោះឡើយ។
រហូតមកទល់ពេលនេះ យ៉ាងហោចណាស់មានពលរដ្ឋខ្មែរប្រហែល ៧០នាក់កំពុងស្ថិតក្នុងមន្ទីរឃុំឃាំងរបស់ភ្នាក់ងារអន្តោប្រវេសន៍ និងគយរបស់សហរដ្ឋអាមេរិកដើម្បីរង់ចាំការបញ្ជូនត្រឡប់ទៅកម្ពុជាវិញ។
ក្នុងរយៈពេលប៉ុន្មានខែចុងក្រោយនេះ ភ្នាក់ងារអន្តោប្រវេសន៍ និងគយរបស់អាមេរិកបានឃុំខ្លួនពលរដ្ឋខ្មែរជាង ១រយនាក់ ខណៈភ្នាក់ងារនេះកំពុងរៀបចំលិខិតស្នាមពីកម្ពុជាដើម្បីបញ្ជូនពួកគេពី សហរដ្ឋអាមេរិក៕