រដ្ឋាភិបាលចិន បានឧបត្ថម្ភសម្ភារៈ និងគ្រឿងបរិក្ខារដោះមីនដល់មជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា ស៊ីម៉ាក់ (CMAC)។
សម្ភារៈជំនួយទាំងនេះរួមមាន ឧបករណ៍រាវមីនចំនួន ១៨គ្រឿង សម្លៀកបំពាក់ការពារបុគ្គលិកដោះមីនចំនួន ១៨ ឧបករណ៍បំផ្ទុះមីនចំនួន ១៨គ្រឿង កៅអីជនពិការចំនួន ១.២០០គ្រឿង តង់ចល័តស្នាក់នៅ ៣៤០តង់ ម៉ូតូចំនួន ៤០គ្រឿង រួមទាំងកុំព្យូទ័រយួរដៃ កុំព្យូទ័រលើតុ និង IPAD មួយចំនួនទៀតផង។
ភ្នាក់ងារសារព័ត៌មានចិន ស៊ីនហួរ រាយការណ៍កាលពីថ្ងៃទី២០ ខែវិច្ឆិកា ថា រដ្ឋាភិបាលប្រទេសចិន បានចូលរួមគាំទ្រយ៉ាងសកម្មចំពោះកិច្ចប្រឹងប្រែងដោះមីននៅកម្ពុជា ហើយថា ជំនួយជាសម្ភារៈ និងគ្រឿងបរិក្ខារទាំងនេះនឹងចូលរួមចំណែកដល់ការងារដោះមីននេះ។
លោក សេរី កុសល អនុប្រធានទី១ អាជ្ញាធរមីនកម្ពុជា ឲ្យដឹងថា បច្ចុប្បន្ន កម្ពុជា កំពុងស្វះស្វែងរកថវិកាចំនួនជាង ៤០០លានដុល្លារអាមេរិក ដើម្បីដោះគ្រាប់មីន និងយុទ្ធភណ្ឌមិនទាន់ផ្ទុះទាំងអស់ចេញពីទឹកដីកម្ពុជា បញ្ចប់ត្រឹមឆ្នាំ២០២៥។
កម្ពុជា គឺជាប្រទេសមួយដែលរងគ្រោះដោយគ្រាប់មីនខ្លាំងជាងគេបំផុតនៅលើពិភពលោក។ យ៉ាងហោចណាស់មានគ្រាប់មីនពី ៤ ទៅ ៦លានគ្រាប់ និងគ្រាប់មិនទាន់ផ្ទុះដទៃទៀត ត្រូវបានបន្សល់ទុកដោយសារសង្គ្រាមរ៉ាំរ៉ៃជាច្រើនទសវត្សរ៍។ តួលេខផ្លូវការ ឲ្យដឹងថា គ្រាប់មីន និងគ្រាប់មិនទាន់ផ្ទុះបានសម្លាប់ប្រជាពលរដ្ឋខ្មែរចំនួនជិត ២ម៉ឺននាក់ (១៩.៧៥៧) ហើយបានបណ្ដាលឲ្យប្រជាពលរដ្ឋខ្មែរចំនួនជិត ៤ម៉ឺន ៥ពាន់នាក់ (៤៤.៩៤៨) រងរបួស និងពិការក្នុងចន្លោះឆ្នាំ១៩៧៩ ដល់ខែកញ្ញា ឆ្នាំ២០១៧ នេះ។
ព័ត៌មានអំពីការផ្ដល់ជំនួយរបស់រដ្ឋាភិបាលចិន ដល់អាជ្ញាធរមីនកម្ពុជានេះ គឺស្របពេលដែលសហរដ្ឋអាមេរិក គំរាមផ្ដាច់ជំនួយសម្រាប់បោសសម្អាតមីន និងគ្រាប់មិនផ្ទុះនៅកម្ពុជា ក្រោយពេលដែលទំនាក់ទំនងរវាងរដ្ឋាភិបាលប្រទេសទាំងពីរបានល្អក់កករ និងធ្លាក់ចុះដល់កម្រិតទាបបំផុតមិនធ្លាប់មានពីមុនមក។
ក្នុងជំនួបការងារទ្វេភាគីជាមួយនាយករដ្ឋមន្ត្រីចិន លោក លី ឃឺឈៀង ក្នុងឱកាសចូលរួមកិច្ចប្រជុំកំពូលអាស៊ានលើកទី៣១ និងកិច្ចប្រជុំពាក់ព័ន្ធនៅទីក្រុងម៉ានីល ប្រទេសហ្វីលីពីន កាលពីថ្ងៃទី១៣ វិច្ឆិកា កន្លងទៅ លោក ហ៊ុន សែន ថាភាគីទាំងពីរបានពិភាក្សាគ្នាអំពីការជំរុញការដោះមីន និងយុទ្ធភណ្ឌមិនទាន់ផ្ទុះនៅកម្ពុជា។ ភាគីចិន បានប្រាប់លោក ហ៊ុន សែន ថា ការផ្ដល់ជំនួយដល់កម្មវិធីដោះមីន និងយុទ្ធភណ្ឌមិនទាន់ផ្ទុះ ជាសកម្មភាពអាទិភាពដ៏សំខាន់មួយរបស់រដ្ឋាភិបាលចិន ដើម្បីជួយប្រទេសនានាដែលកំពុងជួបប្រទះបញ្ហានេះ ហើយភាគីចិន សន្យាថា នឹងជួយឲ្យអស់លទ្ធភាពដើម្បីបោសសម្អាតមីន និងយុទ្ធភណ្ឌមិនទាន់ផ្ទុះឲ្យបានឆាប់រហ័ស។
យ៉ាងណាក៏ដោយ ចាប់តាំងពីទសវត្សរ៍ទី៩០ រហូតមកទល់បច្ចុប្បន្ននេះ សហរដ្ឋអាមេរិកបានចំណាយថវិកាអស់ជាង ១៦០លានដុល្លារ ក្នុងកិច្ចប្រឹងប្រែងដើម្បីជួយដោះមីន និងគ្រាប់បែកមិនទាន់ផ្ទុះនៅកម្ពុជានេះ។ ឯកអគ្គរដ្ឋទូតអាមេរិក លោក វីល្លៀម ហៃដ្ដ៍ (William Heidt) ធ្លាប់លាតត្រដាងថា ពាក់កណ្ដាលនៃទឹកប្រាក់នេះ ត្រូវបានប្រើសម្រាប់លុបបំបាត់យុទ្ធភណ្ឌដែលទម្លាក់ដោយយន្តហោះអាមេរិក នៅភាគខាងកើតនៃប្រទេសកម្ពុជា។ ក៏ប៉ុន្តែ លោកអះអាងថា ប្រាក់ចំនួនពាក់កណ្ដាលទៀត ត្រូវបានប្រើសម្រាប់ដោះមីនរបស់ចិន សូវៀត និងវៀតណាម នៅភាគខាងលិចប្រទេស ពោលគឺនៅតាមចម្ការមីនដែលមានគ្រោះថ្នាក់ ១០ដង លើសគ្រាប់ដែលទម្លាក់ដោយអាមេរិក៕