ក្រុមអ្នកកាសែតមកពីស្ថាប័នផ្សេងៗគ្នា បាននាំគ្នាផ្ដិតស្នាមមេដៃ ស្នើទៅតុលាការក្រុងភ្នំពេញ អោយទម្លាក់ចោលការចោទប្រកាន់លើអតីតបុគ្គលិកវិទ្យុអាស៊ីសេរីពីររូប គឺលោក អ៊ួន ឈិន និងលោក យាង សុជាមេត្តា។ លិខិតរបស់ក្រុមអ្នកសារព័ត៌មានកាលថ្ងៃទី១៩ ខែវិច្ឆិកា គឺក្រោយមួយ ថ្ងៃ ដែលព្រះរាជអាជ្ញាសាលាដំបូងក្រុងភ្នំពេញ ចោទប្រកាន់អ្នកកាសែតទាំងពីររូបនោះ។
រយៈពេល៤ថ្ងៃក្រោយ ពេលអតីតបុគ្គលិកអាស៊ីសេរីពីរនាក់ ត្រូវបានអាជ្ញាធរក្រុងភ្នំពេញចាប់ឃុំ និងមួយថ្ងៃបន្ទាប់ពីតុលាការក្រុងភ្នំពេញបញ្ជូនពួកគេទៅគុកព្រៃស ជាប់ចោទពីបទមិនច្បាស់លាស់ថា លួចផ្ដល់ព័ត៌មានទៅក្រៅប្រទេសនោះ មិនទាន់មានក្លឹបអ្នកកាសែត ឬអង្គការសមាគមការពារអ្នកសារព័ត៌មានក្នុងស្រុក ចេញសេចក្ដីថ្លែងការណ៍ណាមួយនៅឡើយទេ។
ក្រុមអ្នកកាសែតមកពីស្ថាប័នផ្សេងៗគ្នាជាង៦០ សំដែងការសោកស្ដាយ តាមរយៈលិខិតចំហរបស់ខ្លួនថា ការចោទប្រកាន់ទាក់ទងនឹងការផ្តល់ព័ត៌មានដែលនាំអន្តរាយដល់ការការពារជាតិ ជាការចោទ ប្រកាន់មួយដ៏ធ្ងន់ធ្ងរ។ ពួកគេខ្វល់ខ្វាយថា ការចោទប្រកាន់លើអតីតអ្នកយកព័ត៌មានទាំងពីររូបនេះ កំពុងតែបង្កភាពភ័យខ្លាចដល់អ្នកសារព័ត៌មាន ដែលកំពុងបំពេញវិជ្ជាជីវៈ និងធ្វើឲ្យសេរីភាពសារព័ត៌មាននៅកម្ពុជាធ្លាក់ចុះ។
អ្នកកាសែតល្បីឈ្មោះម្នាក់ លោក ម៉ៃ ទិត្យថារ៉ា ដែលកំពុងបំពេញ ការងារនៅកាសែតខ្មែរថាមស៍ (Khmer Times) និយាយថា ការបំពេញការងាររបស់លោក អួន ឈិន និងលោក យាង សុជាមេត្តា ដែលលោកបានដឹងគឺអ្នកទាំងពីរបំពេញការងារដោយវិជ្ជាជីវៈ ល្អ ស្លូតត្រង់ និងដើម្បីជីវិតប៉ុណ្ណោះ មិនគួរណាតុលាការចោទប្រកាន់ខ្លាំងដូចនេះទេ។
លោក ម៉ៃ ទិត្យថារ៉ា លើកឡើងទៀតថា ក្រុមអ្នកកាសែតសម្រេច សរសេរលិខិតចំហនៅពេលនេះព្រោះពួក រង់ចាំមើលប៉ុន្មានថ្ងៃនេះ មិនឃើញមានក្លឹបអ្នកកាសែត ឬស្ថាប័នការពារអ្នកកាសែតរូបណា ចេញសេចក្ដីថ្លែងស្នើឲ្យដោះលែង ឬទម្លាក់បទចោទលើអតីតបុគ្គលិកអាស៊ីសេរី។ «»
ក្លឹបអ្នកកាសែតកម្ពុជា ដែលល្បីខាងការពារអ្នកកាសែតដែលជួបបញ្ហាអយុត្តិធម៌ មិនទាន់ចេញសេចក្ដីថ្លែងការណាមួយ ចំពោះករណីនេះនៅឡើយទេ។ ប្រធានក្លឹបអ្នកកាសែតកម្ពុជា លោក ប៉ែន បូណា ប្រាប់ថា ក្លឹបអ្នកកាសែតរបស់លោក សុំរក្សាភាពស្ងប់ស្ងាត់សិននៅពេលនេះ ដោយរង់ចាំ ការសម្រេចរបស់តុលាការបន្តទៀត។
មកដល់ពេលនេះ អតីតបុគ្គលិកវិទ្យុអាស៊ីសេរី លោក អ៊ួន ឈិន និងលោក យាង សុជាមេត្តា ត្រូវបញ្ជូនទៅឃុំខ្លួននៅពន្ធនាគារព្រៃស ក្រោយពីព្រះរាជអាជ្ញារងអមសាលាដំបូងរាជធានីភ្នំពេញលោក សេង ហៀង កាលពីថ្ងៃទី១៨ ខែវិច្ឆិកា។
មន្ត្រីជាន់ខ្ពស់នៃសមាគមការពារសិទ្ធិកម្ពុជា លោក សឹង សែនករុណា គាំទ្រលិខិតចំហរបស់អ្នកកាសែតដែលស្នើព្រះរាជអាជ្ញា និងចៅក្រម ស៊ើបសួរនៃសាលាដំបូងរាជធានីភ្នំពេញ ពិចារណាទម្លាក់បទចោទ ប្រកាន់លើអតីតអ្នកយកព័ត៌មានវិទ្យុអាស៊ីសេរី។ លោកថា ក្រុមអង្គការសង្គមស៊ីវិល ក៏បានជជែកគ្នាពីគម្រោងធ្វើសេចក្ដីថ្លែងស្នើឲ្យមានការទម្លាក់ចោលការចោទប្រកាន់។
ចំណែកលោកអ្នកវិភាគឯករាជ្យ លោក បណ្ឌិត ឡៅ ម៉ុងហៃ និងនាយកប្រតិបត្តិ ទទួលបន្ទុកកិច្ចការតំបន់អាស៊ី របស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) បានហៅការចាប់ខ្លួនអតីតអ្នកកាសែតអាស៊ីសេរី ទាំងពីរនោះ គឺជារបៀបធ្វើការរបស់កុម្មុយនិស្តផ្ដាច់ការ៕