Clik here to view.
លោក វន់ ពៅ ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធអះអាងថា លោកនឹងមិនរត់ចោលស្រុកឡើយ។ ការបញ្ជាក់ជំហរនៅពេលនេះ ស្របពេលលោក ហ៊ុន សែន សន្យាថា នឹងមិនចាប់ខ្លួនប្រធានសមាគមរូបនេះឡើយ។
លោក ហ៊ុន សែន នៅថ្ងៃទី១៩ វិច្ឆិកា បានស្នើឲ្យលោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធ ដែលលោកអះអាងថា ប្រុងរត់គេចខ្លួន នោះ ឲ្យត្រឡប់វិលចូលស្រុកវិញ ហើយសន្យាថានឹងគ្មានការចាប់ខ្លួនណាមួយនោះឡើយ។
ការថ្លែងដូចនេះ របស់លោក ហ៊ុន សែន ធ្វើឡើងនៅក្នុងពិធីជួបកម្មករនៅ កោះពេជ្រ នៅថ្ងៃទី១៩ ខែវិច្ឆិកា។ អតីតកម្មាភិបាលជាន់ខ្ពស់នៅក្នុងរបបខ្មែរក្រហមដែលរងការរិះគន់ថា កំពុងទាញទម្លាក់ប្រទេសទៅរករបបផ្ដាច់ការរូបនេះបញ្ជាក់ថា អ្នកដែលប្រព្រឹត្តបទល្មើស មិនចាំបាច់ព្យាយាមរត់គេចខ្លួននោះទេ ជាពិសេសលោក វ៉ន់ ពៅ ដែលជាប់ពាក់ព័ន្ធក្នុងសំណុំរឿងកាលចុងពីឆ្នាំ២០១៣៖ «ម្សិលមិញខ្ញុំសរសេរតាម WhatsAppហៅ វន់ ពៅ ត្រឡប់មកវិញ ព្រោះដឹងថា វន់ ពៅ នៅណោះហើយ ខ្ញុំក៏ចែកបន្តទៅ អ៊ិត សំហេង ដែរ និង ឃួង ស្រេង ដែរ។ ប្រពន្ធកំពុងព្យួរសេរ៉ូមនៅណេះ ឯងរត់ទៅណោះ។ ខ្ញុំថាក្មួយ វន់ ពៅ ត្រឡប់មកវិញ គ្មានអ្នកគេធ្វើអីទេ។ គេកំពុងតែអនុវត្តកម្មករក្រៅប្រព័ន្ធនេះ មករួមចំណែកនឹងគេទៅ ហើយបើគេហៅសួរឡើងតុលាការដើម្បីសួរនាំពីរឿងបញ្ហា ព្រោះពេលហ្នឹងខ្លួន វន់ ពៅ ក៏ធ្វើបាតុកម្មនឹងគេដែរ។ ប៉ុន្តែខ្លួនជាសាក្សីទេ គ្មានអ្នកណាហៅទៅចោទប្រកាន់ទេ»។
ទោះជាយ៉ាងណាក៏ដោយលោក ហ៊ុន សែន ធ្លាប់បានព្រមានកាលពីខែកញ្ញា ឆ្នាំ២០១៧ ថានឹងមិនឲ្យមានចលនាបាតុកម្មណាមួយកើតឡើងនៅក្នុងប្រទេស ដូចព្រឹត្តិការណ៍នៅផ្លូវវ៉េងស្រេងទៀតឡើយ។
មេដឹកនាំដែលយូរជាងគេជាងក្នុងតំណែងជានាយករដ្ឋមន្រ្តី នៅក្នុងតំបន់អាស៊ីរូបនេះបានហៅសិទ្ធិក្នុងការប្រមូលផ្តុំ ឬជួបប្រជុំថា សុទ្ធតែជាទម្រង់នៃបដិវត្តពណ៌ដែលចង់ផ្ដួលរំលំរដ្ឋាភិបាល។
ទោះជាយ៉ាងក៏ដោយ លោក វន់ ពៅ ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ អះអាងថាលោកនឹងមិនស្វែងរកសិទ្ធិជ្រកកោន ក្រៅពីកម្ពុជានោះឡើយ។ លោកបន្តថា ការតវ៉ាដោយសន្តិវិធី ដើម្បីផលប្រយោជន៍កម្មករ គឺពុំមានហិង្សាកើតឡើងឡើយ។ លោកបន្តថា ការប្រមូលផ្ដុំរបស់កម្មករដោយសន្តិវិធី ពុំមានអ្វីក្រៅពីស្នើសុំឲ្យភាគីរោងចក្រដំឡើងប្រាក់ខែសមរម្យដល់កម្មករប៉ុណ្ណោះនោះឡើយ៖ «រស់នៅរាល់ថ្ងៃ រស់នៅដូចកណ្ដុរអ៊ីចឹង ពួកយើងរស់នៅដូចសត្វកណ្ដុរអ៊ីចឹង។ ប៉ុន្តែខ្ញុំមិនទៅណាទេ ដូចបង កែម ឡី គាត់និយាយអ៊ីចឹង ខ្ញុំមិនទៅណាទេ បើស្រុកខ្ញុំនៅហ្នឹងហើយ»។
អ្នកវិភាគនយោបាយយល់ឃើញថា សព្វថ្ងៃនេះ រដ្ឋាភិបាលរបស់លោក ហ៊ុន សែន បានបង្វែរសិទ្ធិស្របច្បាប់ទាំងនេះ ទៅជារឿងបទល្មើសព្រហ្មទណ្ឌទៅវិញ។
ជុំវិញព្រឹត្តិការណ៍បង្ហូរឈាមនៅផ្លូវវ៉េងស្រេង កាលពីចុងឆ្នាំ២០១៣ និងដើមឆ្នាំ២០១៤ លោក ហ៊ុន សែន បានទម្លាក់ការទទួលខុសត្រូវ នៃការស្លាប់ និងការបាត់ខ្លួនរបស់កម្មករ ថាគឺជាកំហុសដ៏ធំរបស់បក្សប្រឆាំង។
ប៉ុន្តែ ទាំងអតីតគណបក្សសង្គ្រោះជាតិ និងបណ្ដាអង្គការមិនមែនរដ្ឋាភិបាលផ្នែកសិទ្ធិមនុស្ស បានហៅព្រឹត្តិការណ៍បង្ក្រាបដោយកម្លាំងប្រដាប់អាវុធ ទៅលើក្រុមកម្មករនៅពេលនោះថា ជាស្នាដៃ របស់លោក ហ៊ុន សែន និងក្រុមយោធារបស់លោកទៅវិញទេដែល បានបាញ់សម្លាប់កម្មករទាំងនោះ។
ការបង្ក្រាបទៅលើការតវ៉ារបស់កម្មករ នៅផ្លូវវ៉េងស្រេង កាលពីចុងឆ្នាំ២០១៣ សង្កេតឃើញថា រដ្ឋាភិបាលបានបញ្ចេញកម្លាំងចម្រុះជាច្រើនរយនាក់។ ក្រុមសមត្ថកិច្ចដែលប្រដាប់ដោយអាវុធគ្រប់ដៃ និងស្ថិតក្រោមបញ្ជាផងនោះ បានបើកការបាញ់រះទៅលើក្រុមកម្មករ ដែលនៅប្រមូលផ្ដុំគ្នានៅលើបណ្ដោយផ្លូវវ៉េងស្រេង។
បាតុកម្មដែលទាមទារប្រាក់ខែគោល១៦០ដុល្លារកាលណោះ បណ្ដាលឲ្យកម្មករ ៤នាក់ត្រូវបាត់បង់ជីវិតភ្លាមៗ និង២៣នាក់ផ្សេងទៀត ត្រូវចាប់ខ្លួន និងជាប់ពន្ធនាគារ។ ទន្ទឹមនឹងនេះ ការបង្ក្រាបនៅពេលនោះ បណ្ដាលឲ្យមានមនុស្សមួយចំនួនត្រូវបាត់ខ្លួន និងអ្នកខ្លះក្លាយជាមនុស្សពិកាផង។ អ្នកការពារសិទ្ធិមនុស្ស ចាត់ទុកថា ការបាញ់សម្លាប់ក្រៅប្រព័ន្ធ និងចាប់ខ្លួនប្រឆាំងអ្នកតវ៉ាដោយសន្តិវិធី គឺជាការទទួលខុសត្រូវទាំងស្រុងរបស់រដ្ឋាភិបាល៕