មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ឲ្យដឹងថា តុលាការខែត្រក្រចេះ មិនទាន់ផ្ដល់យុត្តិធម៌ជូនពលរដ្ឋ ៥៤៥គ្រួសារ ដែលប្ដឹងឧកញ៉ាពីររូបពាក់ព័ន្ធការឈូសឆាយដីព្រៃជាសម្បត្តិសាធារណៈជាង ៣ពាន់ហិកតារ ឋិតនៅឃុំឫស្សីកែវ ស្រុកព្រែកប្រសប់ ខែត្រក្រចេះ។ មន្ត្រីសង្គមស៊ីវិលមានសង្ឃឹមតិចតួចណាស់ថា តុលាការនឹងផ្ដល់យុត្តិធម៌ជូនពលរដ្ឋ។
មន្ត្រីអាដហុក មួយរូបដែលជាដើមបណ្ដឹងក្នុងរឿងប្ដឹងឧកញ៉ាពីររូបដែលមានឈ្មោះ ប៊ុត ប៊ុនអេង ហៅ អេង និងឧកញ៉ា លឹម ប៊ុណ្ណា ហៅ ខ្នា និងអ្នកពាក់ព័ន្ធមួយចំនួនទៀតប្ដេជ្ញាថា នឹងនៅប្រកាន់ជំហរទាមទាររកយុត្តិធម៌ជូនពលរដ្ឋជាង ៥០០គ្រួសារ ដែលរងគ្រោះដោយសារបាត់បង់ដីព្រៃជាង ៣ពាន់ហិកតារ។
មន្ត្រីជាន់ខ្ពស់នៃសមាគមអាដហុក (ADHOC) លោក ប៉ែន ប៊ុណ្ណារ៍ ដែលជាដើមបណ្ដឹងសំណុំរឿងនេះឲ្យដឹងនៅថ្ងៃទី១០ ខែវិច្ឆិកា ថា សំណុំរឿងនេះកំពុងឋិតក្នុងការស៊ើបអង្កេតរបស់ចៅក្រមស៊ើបសួរនៅឡើយ ហើយតំណាងអយ្យកាខែត្រក្រចេះ ធ្លាប់កោះហៅឧកញ៉ាឈ្មោះ ប៊ុត ប៊ុនអេង ហៅ អេង និងឧកញ៉ា លឹម ប៊ុណ្ណា ហៅ ខ្នា ឲ្យស្រាយបំភ្លឺ ក៏ប៉ុន្តែឧកញ៉ាទាំងនោះបានបញ្ជូនមេធាវីឲ្យឆ្លើយជំនួស។ លោកថា ការមិនចូលខ្លួនទៅស្រាយបំភ្លឺរបស់ឧកញ៉ាទាំងនោះ គឺជារឿងមិនត្រឹមត្រូវតាមនីតិវិធីច្បាប់នោះទេ ហើយការបញ្ជូនមេធាវីឲ្យឆ្លើយជំនួសក្នុងសំណុំរឿងបទល្មើសឧក្រិដ្ឋក៏ជាករណីខុសនីតិវិធីដែរ៖ «ទោះបីជាមានការប្រកាសចង្អុលបង្ហាញពីថ្នាក់ដឹកនាំប្រទេសថា ឈ្មោះនេះឈ្មោះប្រព្រឹត្តបទល្មើសព្រៃឈើ តែមិនទាន់ឃើញស្ថាប័នតុលាការនាំខ្លួនមកឃុំខ្លួននៅឡើយទេ»។
លោក ប៉ែន ប៊ុណ្ណារ៍ បន្ថែមថា តំណាងអយ្យការខែត្រក្រចេះ បានបញ្ជាក់ថា ដីដែលឧកញ៉ាទាំងនោះគ្រប់គ្រងជាង ៣ពាន់ហិកតារ មានប្លង់កម្មសិទ្ធិ ឬប្លង់រឹងរួចហើយ ហេតុនេះសហគមន៍ទាមទារឲ្យតំណាងអយ្យការស៊ើបអង្កេតពីភាពស្របច្បាប់នៃប្លង់កម្មសិទ្ធិនោះ។ លោកចាត់ទុកការផ្ដល់ប្លង់កម្មសិទ្ធិរបស់អាជ្ញាធរពាក់ព័ន្ធគឺជារូបភាពឃុបឃិតគ្នាជាប្រព័ន្ធ ព្រោះទំហំដីជាង ៣ពាន់ហិកតារនោះជាដីព្រៃសាធារណៈរបស់រដ្ឋដែលស្ថាប័នជំនាញមិនទាន់ធ្វើអនុប្រយោគនោះទេ៖ «ព្រោះដីព្រៃនេះមាននៅក្នុងបញ្ជីឃុំឫស្សីកែវ មានន័យថា រដ្ឋមិនទាន់ធ្វើអនុប្រយោគដីនេះជាដីឯកជនរបស់រដ្ឋ ដើម្បីផ្ដល់ជាសម្បទានទៅឲ្យអ្នកណាទេ ហេតុអីបានជាមានប័ណ្ណ»។
កាលពីដើមឆ្នាំ២០១៦ ពលរដ្ឋរស់នៅឃុំឫស្សីកែវ ស្រុកព្រែកប្រសប់ ខែត្រក្រចេះ ចំនួន ៥៤៥គ្រួសារ បានផ្ដិតមេដៃប្ដឹងឧកញ៉ា ២រូប និងអ្នកមានអំណាចមួយចំនួនពីបទកាប់រានដីព្រៃសាធារណៈរបស់រដ្ឋទៅសាលាដំបូងខែត្រក្រចេះ។ ពលរដ្ឋទាមទារឲ្យឧកញ៉ាទាំងនោះ និងអ្នកពាក់ព័ន្ធទទួលខុសត្រូវការបាត់បង់តំបន់ព្រៃស្រោងជាង ៣ពាន់ហិកតារ។
តំណាងពលរដ្ឋរស់នៅឃុំឫស្សីកែវ លោក អិប វេងអៀ ធ្លាប់បញ្ជាក់ថា តំបន់ព្រៃស្រោងមានទំហំជាង ៣ពាន់ហិកតារ (៣.២១០ហិកតារ) និងព្រៃសាធារណៈរបស់រដ្ឋផ្សេងទៀតឋិតនៅតំបន់អូរស្ទឹងឡា នៃឃុំឫស្សីកែវ និងឃុំសោប ត្រូវបានឧកញ៉ា អេង និងឧកញ៉ា ខ្នា ព្រមទាំងអ្នកពាក់ព័ន្ធផ្សេងទៀតបានរំលោភបំពានដោយខុសច្បាប់តាំងពីឆ្នាំ២០០៨។ លោកថា ពលរដ្ឋសោកស្ដាយយ៉ាងខ្លាំងពីការបាត់បង់ព្រៃស្រោងនោះ ដែលគ្រប់គ្រងដោយអ្នកមានឥទ្ធិពលបង្កឲ្យប៉ះពាល់មុខរបរចិញ្ចឹមជីវិតអ្នកភូមិធ្ងន់ធ្ងរដែលធ្លាប់ប្រមូលអនុផលព្រៃឈើ៖ «តំបន់ព្រៃស្រោងជាអនុផលព្រៃឈើដែលមានពលរដ្ឋទៅអាស្រ័យផល ឥឡូវគេកាប់បំផ្លាញអស់ទៅ គេយកដីហ្នឹងធ្វើជាកម្មសិទ្ធិ ពេលដែលយើងទៅយកឧសត្រូវកាប់លើដីចម្ការរបស់គេវាពិបាកទាំងយកអាកម្ទេចឈើដែលគេកាប់ចោលហ្នឹង»។
មេឃុំឫស្សីកែវ លោក ម៉ែន អុក ឲ្យដឹងនៅថ្ងៃទី១០ ខែវិច្ឆិកា ថា ព្រៃនៅតំបន់នោះពិតជារងការកាប់រានទ្រង់ទ្រាយធំពីពលរដ្ឋចំណូលថ្មី និងឧកញ៉ាមួយចំនួនតាំងពីឆ្នាំ២០០៨ ហើយមកទល់ពេលនេះ នៅតំបន់នោះមានការគ្រប់គ្រង និងលក់ដោះដូរកើតមានជាច្រើនប្រភព រួមមានពលរដ្ឋចំណាកស្រុក និងពលរដ្ឋនៅមូលដ្ឋានបាននាំគ្នាដាំដំណាំកៅស៊ូ ស្វាយចន្ទី និងដំឡូងមីអស់ទាំងស្រុងហើយ ពុំមានសេសសល់ព្រៃឈើនោះទេ។ លោកថា ឧកញ៉ា លឹម ប៊ុណ្ណា ហៅ ខ្នា ពុំជាប់ពាក់ព័ន្ធដីព្រៃនៅតំបន់នោះទេ៖ «ដីហ្នឹងពលរដ្ឋមកពីខែត្រកំពង់ចាម ខ្លះ និងមកពីខែត្រត្បូងឃ្មុំ ខ្លះ ពាក់ព័ន្ធដីឧកញ៉ា លឹម ប៊ុណ្ណា ខ្ញុំទៅហើយ នៅព្រំប្រទល់ដីគាត់ និងដីនៅឃុំសោប នៅជាង ១០០ម៉ែត្រ»។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង ក៏មានសង្ឃឹមតិចណាស់ថា តុលាការរកយុត្តិធម៌សំណុំរឿងនេះជូនពលរដ្ឋ ព្រោះបុគ្គលដែលជាប់ពាក់ព័ន្ធគឺជាអ្នកមានឥទ្ធិពល។ លោកកត់សម្គាល់ថា ច្រើនករណីណាស់មកហើយដែលអ្នកមានឥទ្ធិពលច្រើនតែនៅក្រៅសំណាញ់ច្បាប់ដែលតុលាការមិនហ៊ានចាត់វិធានការ បើទោះបីជារកឃើញថា ឧកញ៉ា និងអ្នកមានអំណាចទាំងនោះបានប្រព្រឹត្តបទល្មើសឧក្រិដ្ឋក្ដី៖ «មានភស្តុតាងជាសាធារណៈយ៉ាងណាក៏ដោយ ក៏តុលាការព្យាយាមសម្រួលមធ្យោបាយដល់អ្នកមាន និងឧកញ៉ាទាំងនោះនៅក្រៅពីសំណាញ់ច្បាប់រហូត»។
កាលពីខែសីហា ឆ្នាំ២០១៦ មន្ត្រីនៃសមាគមអាដហុក លោក ប៉ែន ប៊ុណ្ណារ៍ បានចូលឆ្លើយបំភ្លឺនៅសាលាដំបូងខែត្រក្រចេះ ពេញមួយព្រឹក ក្នុងនាមជាដើមបណ្ដឹងដោយបញ្ជាក់ថា អ្នកភូមិមានភស្តុតាងជាក់លាក់ដែលបញ្ជាក់ថា ការកាប់ទន្ទ្រានដីព្រៃស្រោងជាង ៣ពាន់ហិកតារ ជាប់ពាក់ព័ន្ធឧកញ៉ាចំនួនពីររូបនោះ និងអ្នកពាក់ព័ន្ធមួយចំនួនទៀត។ លោកថា សហគមន៍ទាមទារដីព្រៃស្រោងទាំងនោះជាសម្បត្តិរដ្ឋវិញ ហើយអ្នកពាក់ព័ន្ធទាំងអស់ត្រូវសងសំណងការខូចខាតព្រៃឈើនៅតំបន់នោះ៕