Clik here to view.
អ្នកឃ្លាំមើលផែនការអភិវឌ្ឍន៍សង្គម បង្ហាញការព្រួយបារម្ភខ្លាចមន្ទីរពេទ្យគន្ធបុប្ផាបិទទ្វារ ដោយសារខ្វះថវិកាសម្រាប់ចំណាយទិញថ្នាំព្យាបាលកុមារក្រីក្រ និងចំណាយទៅលើប្រាក់បៀវត្សរ៍បុគ្គលិកពេទ្យដែលមានចំនួនរាប់លានដុល្លារសហរដ្ឋអាមេរិក ក្នុងមួយឆ្នាំៗ។
មន្ត្រីផ្នែកអង្កេតជាន់ខ្ពស់នៃសមាគមអាដហុក (Adhoc) លោក ស៊ឹង សែនករុណា ស្ថិតក្នុងចំណោមមន្ត្រីអង្គការក្រៅរដ្ឋាភិបាលជាច្រើនស្ថាប័នទៀត ព្រួយបារម្ភជាថ្មីថា ប្រសិនបើមន្ទីរពេទ្យគន្ធបុប្ផា បិទទ្វារ នឹងនាំឲ្យប៉ះពាល់ដល់ប្រជាពលរដ្ឋក្រីក្រដែលស្វែងរកសេវាព្យាបាលជំងឺកុមារ និងស្ត្រីមានផ្ទៃពោះមិនគិតថ្លៃនៅមន្ទីរពេទ្យនេះ។ លោកថា ពេលនោះទំនងជាអត្រាស្លាប់របស់កុមារ និងស្ត្រីមានផ្ទៃពោះ អាចមានកំណើនខ្ពស់ឡើងវិញ។
លោក ស៊ឹង សែនករុណា ស្នើដល់ផ្នែកពាក់ព័ន្ធនានា ពិសេសរាជរដ្ឋាភិបាល ត្រូវមានកញ្ចប់ថវិកាចំណាយប្រចាំឆ្នាំសម្រាប់ផ្ដល់ជូនមន្ទីរពេទ្យគន្ធបុប្ផា ឲ្យបានទៀងទាត់។ លោកថា បើពឹងផ្អែកទៅលើជំនួយរបស់រដ្ឋាភិបាលប្រទេសស្វីស និងដៃគូអភិវឌ្ឍន៍ដទៃទៀត ជាពិសេសជួយសម្រាលអម្រែកដែលស្ថាបនិក និងជាប្រធានមន្ទីរពេទ្យគន្ធបុប្ផា លោកវេជ្ជបណ្ឌិត បេអាត រិចឆ្នឺរ (Dr. Beat Richner) បានខិតខំស្វែងរកដ៏លំបាកនៅពេលកន្លងទៅ។
លោក ស៊ឹង សែនករុណា មានប្រសាសន៍ថា៖ «មន្ទីរពេទ្យគន្ធបុប្ផានេះ គឺជាកន្លែងមួយដែលប្រជាពលរដ្ឋក្រីក្រទូទៅ ហើយគាត់មិនមានលទ្ធភាពនាំកូន ឬកុមារទៅព្យាបាលជំងឺនៅមន្ទីរពេទ្យល្អៗ ដែលមានតម្លៃ ឬសេវាខ្ពស់នោះ គឺគាត់តែងតែនាំកូនៗ របស់គាត់ទៅព្យាបាលនៅមន្ទីរពេទ្យមនុស្សធម៌មួយនេះ។ ស្ថាប័នមានសមត្ថកិច្ចពាក់ព័ន្ធនឹងវិស័យនេះ ជាពិសេសក្រសួងសុខាភិបាល ត្រូវយកចិត្តទុកដាក់ធ្វើយ៉ាងណាឲ្យមន្ត្រីពេទ្យគន្ធបុប្ផា ឲ្យមានដំណើរការទៅមុខបានដោយរលូន ដើម្បីបន្តសកម្មភាពជួយដល់កុមារកម្ពុជា ជាបន្តទៀត ជាពិសេសរាជរដ្ឋាភិបាលកម្ពុជា និងអង្គការអន្តរជាតិនានា ដែលធ្វើការពាក់ព័ន្ធនឹងការផ្ដល់អំណោយមនុស្សធម៌ជាមូលនិធិកន្លងមកនេះ ត្រូវយកចិត្តទុកដាក់គាំទ្រជាមូលនិធិដល់មន្ទីរពេទ្យដ៏មានសារសំខាន់មួយនេះ សម្រាប់កុមារកម្ពុជា នៅថ្ងៃអនាគតទៀត»។
សេចក្ដីប្រកាសព័ត៌មានរបស់មន្ទីរពេទ្យគន្ធបុប្ផា បានឲ្យដឹងថា គិតត្រឹមថ្ងៃទី២ ខែវិច្ឆិកា មន្ទីរពេទ្យមនុស្សធម៌មួយនេះ បានបើកសេវាពិនិត្យព្យាបាលជំងឺកុមារ និងស្ត្រីមានផ្ទៃពោះ ដោយមិនយកលុយមានរយៈពេល ២៥ឆ្នាំគត់។ ២៥ឆ្នាំកន្លងទៅនេះ មន្ទីរពេទ្យគន្ធបុប្ផា បានចំណាយថវិកាសរុប ៦៣២លានដុល្លារសហរដ្ឋអាមេរិក ដើម្បីចំណាយទិញថ្នាំសម្រាប់ព្យាបាលជំងឺកុមារ និងជំងឺស្ត្រីមានផ្ទៃពោះចំណាយទៅលើប្រាក់បៀវត្សរ៍បុគ្គលិក និងចំណាយផ្សេងៗ។
សេចក្ដីប្រកាសព័ត៌មានដដែលឲ្យដឹងថា ២៥ឆ្នាំកន្លងទៅនេះ មន្ទីរពេទ្យគន្ធបុប្ផា បានទទួលពិនិត្យព្យាបាលកុមារមានជំងឺធ្ងន់ធ្ងរចំនួន ១.៨៥៣.៥១០ករណី និងស្ត្រីមានផ្ទៃពោះ ២៤៥.៥៩១នាក់ បានសម្រាលកូននៅមន្ទីរពេទ្យសម្ភពនៃមន្ទីរពេទ្យជ័យវរ្ម័នទី៧ (គន្ធបុប្ផាទី៣)។
សរុបមកបានជួយព្យាបាលជំងឺជូនកុមារ និងស្ត្រីមានផ្ទៃពោះសរុប ១៦.៨២២.២២៥ករណី ហើយអ្នកជំងឺភាគច្រើនស្ថិតក្នុងគ្រួសារមានជីវភាពទីទ័លក្រនៅទូទាំងប្រទេសកម្ពុជា។
មន្ទីរពេទ្យគន្ធបុប្ផា ក៏ត្រូវបានប្រមុខដឹកនាំរាជរដ្ឋាភិបាល និងស្ថាប័នកាកបាទក្រហមកម្ពុជា ទទួលស្គាល់ថា ជាមន្ទីរពេទ្យគំរូល្អលើសគេ ដោយសេវាព្យាបាលមានប្រសិទ្ធភាពជាសះស្បើយខ្ពស់ និងបានរួមចំណែកកាត់បន្ថយអត្រាស្លាប់របស់មាតា និងកុមារនៅកម្ពុជា ថែមទៀត។
ត្រង់ចំណុចនេះហើយ ទើបលោកនាយករដ្ឋមន្ត្រី ហ៊ុន សែន បានស្នើដល់ក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល រៀបចំផែនការគាំទ្រថវិកាចាំបាច់ដល់មន្ទីរពេទ្យគន្ធបុប្ផា ពិសេសផែនការផ្ដល់ហិរញ្ញប្បទានពីសំណាក់រាជរដ្ឋាភិបាលសម្រាប់ទ្រទ្រង់និរន្តរភាពមន្ទីរពេទ្យគន្ធបុប្ផា ឲ្យមានដំណើរជារៀងរហូត៕
