មន្ត្រីគណបក្សសង្គ្រោះជាតិ ខេត្តកំពង់ចាម អះអាងថា មួយរយៈចុងក្រោយនេះ មានមន្ត្រីក្នុងជួរគណបក្សរបស់ខ្លួនមួយចំនួនតូច បានរត់ទៅចូលជាសមាជិកថ្មីជាមួយគណបក្សកាន់អំណាចខ្លះមែន ប៉ុន្តែភាគច្រើននៃមន្ត្រីទាំងនោះ ជាអតីតមន្ត្រីរបស់គណបក្សហ៊្វុនស៊ិនប៉ិច ចាស់។ ទន្ទឹមគ្នានេះ មន្ត្រីគណបក្សប្រឆាំងរូបនេះអះអាងទៀតថា អ្នកដែលរត់ទៅទាំងអំបាលម៉ាននោះ គឺផ្ដើមចេញពីការអូសទាញរបស់អាជ្ញាធរគណបក្សកាន់អំណាចនៅតាមមូលដ្ឋាន។
មន្ត្រីគណបក្សសង្គ្រោះជាតិ ខេត្តកំពង់ចាម មានជំនឿថា បើទោះបីជាមានមន្ត្រីគណបក្សរបស់ខ្លួនបានរត់ទៅចុះចូលជាមួយគណបក្សប្រជាជនកម្ពុជា ខ្លះក៏ពិតមែនក្តី ក៏ប៉ុន្តែស្មារតីរបស់សមាជិកគណបក្សនៅតាមមូលដ្ឋាននៅតែមានសាមគ្គីភាព ដោយមិនងាករេនោះឡើយ។
លោក សាន សឿន ឲ្យដឹងនៅថ្ងៃទី១ ខែវិច្ឆិកា នេះថា រហូតមកទល់ពេលនេះ មានមន្ត្រីគណបក្សលោកចំនួន ១៣នាក់ បានទៅចុះចូលជាមួយគណបក្សកាន់អំណាច។ ប៉ុន្តែប្រធានគណបក្សសង្គ្រោះជាតិ ខេត្តកំពង់ចាម រូបនេះ អះអាងថា អ្នកដែលទៅចុះចូលនោះ ភាគច្រើនដោយសារការអូសទាញពីអាជ្ញាធរគណបក្សកាន់អំណាចនៅតាមមូលដ្ឋាន៖ «ខ្ញុំបានជួបពួកគាត់នៅតាមការប្រជុំផ្សេង និងដឹងថា ពួកគាត់បានធ្វើការប្ដេជ្ញាចិត្តមិនបោះបង់ចោលឆន្ទៈប្រជាពលរដ្ឋដែលបានបោះឆ្នោតគាំទ្រឲ្យគណបក្សសង្គ្រោះជាតិ បានតួនាទី និងមុខតំណែងទាំងនេះ។ ភាគច្រើនពួកគាត់ប្ដេជ្ញាដូច្នេះ។ ពួកគាត់រហូតដល់ថា បើគណបក្សសង្គ្រោះជាតិត្រូវគេរម្លាយមែននោះ ពួកគាត់សុខចិត្តវិលត្រឡប់ទៅធ្វើជាកសិករវិញ»។
កាលពីថ្ងៃទី៣១ ខែតុលា មន្ត្រីគណបក្សសង្គ្រោះជាតិ ចំនួន ៤នាក់ បានទៅចូលគណបក្សប្រជាជនកម្ពុជា ក្នុងនោះមានប្រធានក្រុមប្រឹក្សាស្រុកព្រៃឈរ គណបក្សប្រឆាំងម្នាក់ សមាជិកក្រុមប្រឹក្សាស្រុកកងមាស ម្នាក់ និងក្រុមប្រឹក្សាឃុំ ២នាក់។ មន្ត្រីគណបក្សសង្គ្រោះជាតិ ខេត្តកំពង់ចាម លោក សាន សឿន ឲ្យដឹងទៀតថា កន្លងមកមន្ត្រីដែលចាកចេញពីគណបក្សប្រឆាំងទៅចុះចូលគណបក្សកាន់អំណាចនៅខេត្តកំពង់ចាមនោះ រួមមានសមាជិកក្រុមប្រឹក្សាឃុំ សមាជិកក្រុមប្រឹក្សាស្រុក និងមន្ត្រីក្រុមប្រឹក្សាខេត្តកំពង់ចាម រួមទាំងមេឃុំមួយរូបផង។
មន្ត្រីគណបក្សកាន់អំណាចវិញ ចាត់ទុកថា អ្នកចុះចូលគណបក្សប្រជាជនមានចំនួនច្រើន។ មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ប្រាប់អាស៊ីសេរី កាលពីពេលថ្មីៗនេះ ដោយទទួលស្គាល់ថា អ្នកដែលចាកចេញពីគណបក្សសង្គ្រោះជាតិ គឺដោយសារការអំពាវពីលោកនាយករដ្ឋមន្ត្រី ហ៊ុន សែន ដែលបើកចំហ និងមានការសន្ដោសប្រណីដល់អ្នកដែលមិនដឹងអី៖ «ពីព្រោះមូលហេតុដែលសម្ដេចតេជោ ហ៊ុន សែន ប្រកាសអំពាវនាវជាចំហនេះ ដោយសារលោកមានមនោសញ្ចេតនា និងមានព្រហ្មវិហារធម៌ចំពោះបងប្អូនថ្នាក់ក្រោមៗ ដែលមិនដឹងរឿងអី ហើយលុះទៅដោយការដឹកនាំរបស់ប្រធានគណបក្សដែលបានប្រព្រឹត្តអំពើល្មើសច្បាប់ធ្ងន់ធ្ងរដល់ប្រទេសជាតិ។ ឲ្យបងប្អូនឲ្យទទួលរងផលវិបាក ដោយប្រធានតែម្នាក់ឯង វាអត់យុត្តិធម៌សោះ ព្រោះគ្នានៅថ្នាក់ក្រោមអត់បានដឹង»។
ប៉ុន្តែមន្ត្រីជាន់ខ្ពស់ និងជាតំណាងរាស្ត្រគណបក្សសង្គ្រោះជាតិ លោក សុន ឆ័យ ធ្លាប់អះអាងប្រាប់អាស៊ីសេរី កាលពីពេលថ្មីៗនេះដែរថា ចំនួនអ្នកដែលចាកចេញនោះ គឺជាចំនួនតិចតួចបំផុត បើប្រៀបធៀបចំនួនសមាជិកក្រុមប្រឹក្សាឃុំ-សង្កាត់ គណបក្សសង្គ្រោះជាតិ ដែលជាប់ឆ្នោតទាំង ៥.០០៧នាក់ និងជាប់ជាមេឃុំ-ចៅសង្កាត់ជិត ៥០០ឃុំ-សង្កាត់ នៅទូទាំងប្រទេសនោះ។ លោក សុន ឆ័យ មិនត្រឹមតែមិនព្រួយបារម្ភចំពោះការចាកចេញនេះទេ ប៉ុន្តែលោកថែមទាំងអះអាងបន្ថែមទៀតថា ដោយសារចំនួនអ្នកចាកចេញវាតិចតួចស្ទើរតែគ្មានដូច្នេះ វាបង្ហាញភាពរឹងមាំរបស់គណបក្សសង្គ្រោះជាតិ ខ្លាំងក្លាមែនទែន។
ស្របពេលដែលមន្ត្រីគណបក្សសង្គ្រោះជាតិ បង្ហាញជំហររឹងមាំ និងជឿជាក់លើភាពមិនក្បត់ឆន្ទៈប្រជាពលរដ្ឋរបស់មន្ត្រី និងសមាជិកក្រុមប្រឹក្សាឃុំ-សង្កាត់បក្សប្រឆាំង ប្រព័ន្ធផ្សព្វផ្សាយក្នុងស្រុកដែលគាំទ្ររដ្ឋាភិបាលលោក ហ៊ុន សែន បន្តផ្សព្វផ្សាយព័ត៌មានអំពីការចុះចូលដែលពេលខ្លះពួកគេពិពណ៌នាថា ដូចទឹកបាក់ទំនប់ជាដើម។
គណបក្សសង្គ្រោះជាតិ ដែលគ្មានប្រព័ន្ធផ្សព្វផ្សាយដ៏សម្បូរបែបដូចគណបក្សកាន់អំណាច ព្រោះវិទ្យុហ្វេស.អឹម (FM) ក្នុងស្រុកដែលគណបក្សប្រឆាំងជួលម៉ោងផ្សាយ ត្រូវបានរដ្ឋាភិបាលបញ្ជាឲ្យបិទស្ថានីយវិទ្យុ និងការផ្សាយតាំងពីខែកញ្ញា កន្លងទៅ។ មន្ត្រីក្រុមប្រឹក្សាឃុំ-សង្កាត់គណបក្សសង្គ្រោះជាតិ បានប្រើមធ្យោបាយផ្សព្វផ្សាយតាមប្រព័ន្ធផ្សព្វផ្សាយសង្គមហ្វេសប៊ុក (Facebook) ដើម្បីបង្ហាញពីឆន្ទៈរបស់មេឃុំ ចៅសង្កាត់ និងសមាជិកក្រុមប្រឹក្សាឃុំ-សង្កាត់ នៅតាមបណ្ដាខេត្តនៅទូទាំងប្រទេស ដែលមិនចុះចូលទៅខាងគណបក្សប្រជាជនកម្ពុជា ទោះបីមានការអំពាវនាវអូសទាញ និងគំរាមកំហែងឲ្យចុះចូលយ៉ាងណាក្ដី។
ទាក់ទងនឹងការចេញនេះ លោក សុន ឆ័យ ធ្លាប់អះអាងហើយថា គ្មានមន្ត្រីជាប់ឆ្នោតណាមួយអាចចាកចេញក្នុងតួនាទី និងមុខតំណែងដែលខ្លួនជាប់ឆ្នោតដោយរាស្ត្របោះឲ្យនោះទេ។ លោកបញ្ជាក់ថា ជាស្វ័យប្រវត្តិមន្ត្រីជាប់ឆ្នោតដែលចាកចេញ នឹងចាកចេញដោយសម្បកខ្លួនប៉ុណ្ណោះ ព្រោះតួនាទីត្រូវអស់ជាស្វ័យប្រវត្តិ ពេលដែលគាត់ប្ដូរបក្ស ហើយគណបក្សសង្គ្រោះជាតិ ត្រូវចាត់ចែងរើសមនុស្សដែលមាននៅក្នុងបញ្ជីបេក្ខជនបន្ទាប់ មកជំនួសតំណែងនោះ។ ដូច្នេះ មានន័យថា ក្រុមប្រឹក្សាឃុំ-សង្កាត់ និងតំណាងរាស្ត្រគណបក្សសង្គ្រោះជាតិ នឹងនៅតែគ្រប់ចំនួនដដែល។
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី ចាត់ទុកអ្នកនយោបាយដែលចេញពីគណបក្សមួយទៅចូលគណបក្សមួយទៀតនេះថា ជាការស្វែងរកលាភសក្ការៈ ដើម្បីបម្រើប្រយោជន៍ផ្ទាល់ខ្លួនច្រើនជាងការផ្លាស់ប្ដូរជីវភាពនយោបាយ ដើម្បីការរីកចម្រើននៅក្នុងសង្គមជាតិ។ ប៉ុន្តែលោកបណ្ឌិត មាស នី កត់សំគាល់ទៀតថា អ្នកនយោបាយប្រភេទនេះ មានមិនច្រើនឡើយនៅកម្ពុជា ហើយពួកគាត់ភាគច្រើនជាមនុស្សផ្លាស់ប្ដូរពីគណបក្សមួយទៅគណបក្សមួយច្រើនលើកច្រើនសា៖ «បើសិនដូចគណបក្សប្រឆាំងបានអះអាង ដែលថា មន្ត្រីដែលចេញពីគណបក្សសង្គ្រោះជាតិ ជាអតីតមន្ត្រីរបស់គណបក្សហ្វ៊ុនស៊ិនប៉ិច បើរឿងនេះពិតមែន វាជារឿងចរន្តធម្មតាទេ ព្រោះបើតាមយើងស្ដាប់មើលទៅ ខាងគណបក្សហ្វ៊ុនស៊ិនប៉ិចហ្នឹងក៏កំពុងប្រមែប្រមូលមនុស្សគគ្រឹកគគ្រេងដែរ តាំងពីក្រោយមានរឿងមានការបែងចែកកៅអីរបស់គណបក្សសង្គ្រោះជាតិ»។
លោកបណ្ឌិត មាស នី បន្ថែមទៀតថា អ្នកនយោបាយដែលចុះចូលទៅគណបក្សថ្មីនេះ គឺជារឿងធម្មតារបស់អ្នកនយោបាយ ប៉ុន្តែលោកថា បើធៀបនឹងការបោះឆ្នោតកាលពីពេលកន្លងទៅ គឺនៅឆ្នាំនេះមានចំនួនអ្នកចុះចូលតិចជាងឆ្នាំមុនៗ៕