Clik here to view.
លោកនាយករដ្ឋមន្ត្រី ហ៊ុន សែន កោតសរសើរចំពោះស្នាព្រះហស្តរបស់ព្រះបាទសម្ដេច នរោត្តម សីហនុ ថាជាក្សត្រដែលលះបង់ពេញមួយជីវិតរបស់ទ្រង់ ដើម្បីជាតិ និងមាតុភូមិ។ ការថ្លែងពីការទុក្ខសោក របស់លោក ហ៊ុន សែន នៅចំខួប ៥ឆ្នាំនៃការយាងចូលទិវង្គតគិតត្រឹមថ្ងៃទី១៥ ខែតុលា នេះត្រូវបានអ្នកវិភាគសង្គមយល់ឃើញថា លោក ហ៊ុន សែន កំពុងចង់ចំណេញនយោបាយ ពីព្រះកិត្តិនាមរបស់ព្រះមហាក្សត្រ។
ព្រះកិត្តិនាមព្រះមហាក្សត្របានក្លាយជាគោលដៅ នៃការវាយប្រហារផ្នែកនយោបាយជាថ្មីឡើងវិញ ស្របពេលកម្ពុជាកំពុងមានវិបត្តិផ្នែកនយោបាយ ដែលបញ្ហានេះអ្នកវិភាគមួយចំនួនយល់ឃើញថា លោក ហ៊ុន សែន រំលឹកឡើងវិញពីបូជនីយកិច្ច របស់ព្រះបាទសម្ដេច នរោត្ដម សីហនុ នេះអាចជាហេតុផលនយោបាយច្រើនជាង។
លោកបណ្ឌិត ឡៅ ម៉ុងហៃ អ្នកវិភាគសង្គម មើលមិនឃើញថា លោកនាយករដ្ឋមន្ត្រី អនុវត្តតាមព្រះរាជបំណង របស់ព្រះបាទសម្ដេចព្រះ នរោត្តម នោះទេ ជាពិសេសរឿងការផ្សះផ្សាជាតិ និងឯកភាពជាតិនេះ។ អ្នកវិភាគរូបនេះចាត់ទុកថា ការគោរព ការដឹងគុណ វាមិនខុសនោះឡើយ ប៉ុន្តែសំខាន់ត្រង់ការអនុវត្ត គឺវាហាក់ផ្ទុយឆ្ងាយពីអ្វីដែលជាគោលបំណងដើម របស់ព្រះមហាក្សត្រ។
ការលើកឡើងដូចនេះ ស្របពេលលោក ហ៊ុន សែន បានរៀបរាប់យ៉ាងច្រើន នៅលើគណនីហ្វេសប៊ុក (Facebook) របស់លោក អំពីការប្រឹងប្រែងរបស់ព្រះបាទសម្ដេច នរោត្តម សីហនុ នៅចំថ្ងៃនៃការយាងចូលទិវង្គត របស់ព្រះអង្គ កាលពី ៥ឆ្នាំមុន។ លោក ហ៊ុន សែន ចាត់ទុកសកម្មភាពនានានោះថា ជាវីរភាពដ៏ឧត្ដុង្គឧត្ដម ដែលពលរដ្ឋកម្ពុជា នៅតែចង់ចាំ និងមិនអាចបំភ្លេចបាន។ ប៉ុន្តែលោក ហ៊ុន សែន នៅពេលនេះវិញ រងការរិះគន់ពីក្រុមអ្នកប្រឆាំងថា កំពុងតែជិះសេះលែង ដាក់ការគាប់សង្កត់ និងសម្លុតគំរាមកំហែង ក្នុងពីអវត្តមានព្រះបាទសម្ដេច នរោត្តម សីហនុ ទៅ។
ព្រះបាទសម្ដេច នរោត្ដម សីហនុ ព្រះអង្គក្រៅពីមានភាពប៉ិនប្រសប់ក្នុងការដឹកនាំប្រទេស ឲ្យស្គាល់ភាពរុងរឿង ក្នុងសម័យសង្គមរាស្ត្រនិយមហើយ ទ្រង់ក៏ជាក្សត្រ ទាមទារបាននូវឯករាជ្យ ពីបារាំង ហើយអាចមានភាពបត់បែនផ្នែកនយោបាយថែមទៀត។ ព្រះអង្គត្រូវបានពលរដ្ឋចាត់ទុកថា ជាក្សត្រដែលជួយសម្របសម្រួល ជម្លោះផ្ទៃក្នុងនយោបាយបានយ៉ាងល្អ។
ថ្វីបើនៅពេលនេះ លោក ហ៊ុន សែន មើលទៅហាក់ដឹងគុណ និងសរសើរពីស្នាព្រះហត្ថរបស់ព្រះអង្គមិនដាច់ពីមាត់ តែរឿងមួយដែលធ្វើឲ្យលោកនាយករដ្ឋមន្ត្រី រង់ការរិះគន់គឺការព្យាយាមកម្ចាត់បក្សប្រឆាំង និងសំឡេងក្រុមអ្នករិះគន់ចេញកែវភ្នែករបស់លោក។
នៅក្នុងរដ្ឋធម្មនុញ្ញ មាត្រា ២០ កំណត់ថា ព្រះមហាក្សត្រទ្រង់ទទួលសវនាការជាផ្លូវការពីរដងក្នុងមួយខែ ឱ្យនាយករដ្ឋមន្ត្រី និងគណៈរដ្ឋមន្ត្រីចូលគាល់រាយការណ៍ទូលថ្វាយទ្រង់ជ្រាបអំពីសភាពការណ៍ នៃប្រទេសជាតិ។ ប៉ុន្តែ អ្នកវិភាគសង្គមយល់ឃើញថា រដ្ឋាភិបាលកម្រឃើញ ទូលថ្វាយចំពោះមុខព្រះមហាក្សត្រ ជុំវិញសភាពការណ៍នយោបាយ ដូចដែលមានបញ្ញត្តិនៅក្នុងច្បាប់នោះទេ។
លោកបណ្ឌិត មាស នី អ្នកស្រាវជ្រាវការអភិវឌ្ឍសង្គម ទទួលស្គាល់ពីការលះបង់ និងការបំពេញកាតព្វកិច្ច ក្នុងតួនាទីជាព្រះមហាក្សត្របានយ៉ាងល្អ របស់ព្រះបរមរតនកោដ្ឋ។ លោកបន្តថា ក្នុងពេលនេះវិញ ព្រះរាជអន្តរាគមន៍របស់ព្រះមហាក្សត្រ ពិតជាមានសារសំខាន់ និងចាំបាច់បំផុត សម្រាប់វិបត្តិនយោបាយ ដែលកំពុងជាប់គាំង។ ប៉ុន្តែលោកបណ្ឌិត មាស នី យល់ឃើញថា ព្រះវត្តមានរបស់ព្រះមហាក្សត្រនៅពេលនេះវិញ ហាក់ដូចស្ងប់ស្ងាត់ក្នុងពេលស្ថានភាពនយោបាយ កាន់តែអាប់អួទៅ បើទោះកាតព្វកិច្ច និងតួនាទីរបស់ព្រះអង្គ ត្រូវបានធានា និងការពារដោយរដ្ឋធម្មនុញ្ញហើយក៏ដោយចុះ។ លោកបន្តថា គេហាក់មានមន្ទិលសង្ស័យជាច្រើន ទៅលើតួនាទីរបស់រដ្ឋាភិបាល ចំពោះអង្គព្រះមហាក្សត្រ ដែលមានភារកិច្ចទូលថ្វាយទ្រង់ ក្នុងពេលប្រទេសមានវិបត្តិនយោបាយកើតឡើង។
រដ្ឋធម្មនុញ្ញ មាត្រា ៨ ចែងថា ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរភាពជាតិ។ លើសពីនេះទៀត ព្រះមហាក្សត្រ ទ្រង់ជាអ្នកធានាឯករាជ្យជាតិ និងការគោរពសន្ធិសញ្ញាអន្តរជាតិ ជាពិសេស ព្រះមហាក្សត្រ ទ្រង់មានតួនាទីខ្ពង់ខ្ពស់ជាអាជ្ញាកណ្ដាល ដើម្បីធានាការប្រព្រឹត្តទៅនៃអំណាចសាធារណៈឲ្យមានភាពទៀងទាត់៕
